Hugenote Hoërskool
Die Hugenote Hoërskool is 'n dubbelmeduim-staatskool op Wellington in die Boland, Wes-Kaap. Die skool se leerdertal was 879 in 2009, waarvan sowat vier-vyfdes Afrikaans en die res meerendeels Engels. Die skoolhoof is mnr. W.J.A. Moolman. (Daar is 'n hoërskool met dieselfde naam op Springs in Gauteng, maar amptelik is daardie skool Hoërskool Hugenote.)
[wysig] Geskiedenis
Die skool kan sy geskiedenis terugvoer tot 1868 met die stigting van Wellington se Hoër Jongenskool. Die skool verskuif in 1884 na 'n nuwe perseel op die plek waar Wellington se stadsaal vandag staan. Van die skool se noemenswaardige skoolhoofde was Robert MacCrone (1881 – 1904), Fransie Roux (1904 – 1928) en Hennie Roos (1928 – 1953).
Intussen kom dr. Andrew Murray in 1870 na Wellington en beywer hom vir die stigting van 'n meisieskool. Hugenote-Seminarium is in 1874 gestig met mes. Bliss en Ferguson as onderwysers. Die eerste 40 meisies skryf in Januarie daardie jaar in.
In 1954 besluit die destydse Kaaplandse onderwysdepartement die twee skole moet saamsmelt, wat lei tot die stigting van die huidige hoërskool. Aanvanklik is die nuwe hoërskool gehuisves in die geboue van die ou Hugenote-Seminarium in Kerkstraat. Die skool se leerdertal neem vinnig toe en binne 16 jaar raak die perseel in Kerkstraat te klein. Die departement van onderwys rig toe die nuwe skool en koshuis op in die Blouvlei, naby die Boland-stadion.
[wysig] Oudleerders
- 1958 - Hercules von Molendorff, Boland-heelagter.
- 1959 - Hernus Kriel, voormalige Wes-Kaapse premier.
- 1973 - Jannie Bosman, Wes-Kaapse boer van die jaar 2009.
- 1977 - Prof. Danie Brink, Universiteit Stellenbosch se departement genetika in fakulteit agriwetenskappe.
- 1995 - Prof. Geo Quinot, toegelate advokaat van die Hoë Hof van Suid-Afrika en professor in die departement publiekreg, Universiteit Stellenbosch.
- 1996 - Rolanda Marais, aktrise.
- 1996 - Dr. Willem Anker, Afrikaanse dramaturg en skrywer.
