iWork

in Wikipedia, die vrye ensiklopedie
Spring na: navigasie, soek
iWork
Kort opsomming van die logo.
Apple iWork.png

Ontwikkelaar Apple Inc.
Aanvanklike vrystelling 11 Januarie 2005[1]
Mees onlangse weergawe iWork/ 21 November 2013
Programmeertaal Objective-C, C, JavaScript
Bedryfstelsel Mac OS X, iOS[2]
Grootte op skyf 1.2 GG[2]
Kategorie Kantoorpakket
Lisensie Eiendomsagteware
Webblad iWork

iWork is ’n kantoorpakket van werkskermtoepassings wat geskep is deur Apple Inc. vir die Mac OS X en iOS-bedryfstelsels. Die eerste weergawe van iWork, iWork ’05 is in 2005 vrygestel. Die pakket is oorspronklik gebundel met Keynote, ’n vertoningstoepassing wat vroeër op sy eie bemark is, en Pages, ’n toepassing vir woordverwerking en bladuitleg.[1][3] In 2007 het Apple iWork ’08 bekendgestel met die toevoeging van Numbers, ’n sigbladtoepassing.[4] iWork sluit ook toegang in tot iWork.com, wat in iWork ’09 gebundel is (vrygestel op 6 Januarie 2009). iWork.com is ’n betadiens wat gebruikers in staat stel om dokumente aanlyn te deel met ander wat dit kan aflaai en kommentaar daarop lewer.[4] iWork integreer met bestaande toepassings van Apple se iLife-pakket deur die mediablaaier wat gebruikers in staat stel om musiek van iTunes, video’s van iMovie en foto’s van iPhoto en Aperture direk in iWork-dokumente te sleep en neer te sit.[1]

Hoewel iWork deur Apple gereken word as “ ’n opvolger vir AppleWorks”,[1] herhaal dit nie die funksionaliteit van AppleWorks se databasis en tekeninstrumente nie[5]

Geskiedenis[wysig]

Die eerste weergawe van iWork, iWork ’05, is op 11 Januarie 2005 bekendgestel by die MacWorld-kongres en Ekspo en op 22 Januarie beskikbaar gestel in die Verenigde State en 29 Januarie vir die res van die wêreld. iWork ’05 het twee toepassings bevat: Keynote 2, ’n vertoningskeppingsprogram, en Pages, ’n woordverwerker. iWork ’05 is verkoop vir $79. Daar is ook ’n 30-dae proefperiode beskikbaar gestel en gebruikers kon die pakket aflaai van Apple se webblad.[1] IGG Software het aanvanklik die reg op die naam iWork besit.[6][7][8]

Hoewel iWork deur Apple beskryf is as “’n opvolger vir AppleWorks”[1] repliseer dit nie die funksionaliteit van AppleWorks se databasis- en tekennutsmiddels nie[5] iWork integreer egter met bestaande toepassings van Apple se iLife-suite deur die Mediablaaier wat dit moontlik maak om musiek van iTunes, videogrepe van iMovie en foto’s van iPhoto en Aperture direk in iWork-dokumente te sleep.[1]

iWork ’06 is op 10 Januarie 2006 vrygestel en het opgedateerde weergawes van Keynote en Pages bevat. Albei programme is vir die eerste keer vrygestel as universele binêre bestand sodat dit op die ou PowerPC-verwerkers en die nuwe Intel-verwerkers, wat gebruik is in die nuwe iMac tafelrekenaars en MacBook Pro skootrekenaars, kon werk. Die gebruik van die Intel-verwerkers is op dieselfde dag as die nuwe iWork-pakket bekendgestel.[9]

Die volgende weergawe van die pakket, iWork ’08, is bekendgestel en vrygestel op 7 Augustus 2007 tydens ’n spesiale mediabyeenkoms by Apple se kampus in Cupertino, Kalifornië. Soos vroeër iWork ’08 opdaterings het hierdie vrystelling opgedateerde weergawes van Keynote en Pages bevat. ’n Nuwe sigbladtoepassing, Numbers, is ook bekendgestel. Numbers het verskil van ander sigbladtoepassings, insluitend Microsoft Excel, deurdat dit gebruikers in staat stel om dokumente te skep met veelvuldige sigblaaie op ’n buigsame doek deur van ’n aantal ingeboude sjablone gebruik te maak.[4]

iWork ’09 is op 6 Januarie 2009 bekendgestel en dieselfde dag vrygestel. Dit het ook opgedateerde weergawes van al drie toepassings in die pakket bevat. iWork ’09 het ook toegang tot ’n betaweergawe van die iWork.com-diens gebied wat gebruikers in staat stel om dokumente aanlyn te deel. Gebruikers van iWork ’09 kan ’n dokument direk vanuit Pages, Keynote of Numbers na iWork.com oplaai en ander nooi om dit aanlyn te besigtig. Gebruikers kan notas en kommentaar in die dokument maak en ’n kopie aflaai in iWork, Microsoft Office of PDF-formate.[10] iWork ’09 is voorts ook op 6 Januarie 2011 op die Mac App Store vrygestel teen $19,99 per toepassing waarna dit gereelde opdaterings gekry het, insluitend skakels na iCloud en ’n hoë-DPI-weergawe wat ontwikkel is om by Apple se MacBook Pro met Retina Display in te skakel.[11]

Op 27 Januarie 2010 het Apple iWork vir die iPad bekendgestel as drie afsonderlike toepassings teen $9,99 in die toepwinkel.[12] Hierdie weergawe het ook gereelde opdaterings ontvang, insluitend ’n weergawe vir saktoestelle soos die iPhone en iPod Touch en ’n opdatering om voordeel te trek uit toestelle met Retina Display en die groter skerms van die iPhone 5 en nuwer.

Op 22 Oktober 2013 het Apple ’n opknapping van die iWork-programmatuur vir Mac en iOS bekendgestel. Albei pakkette is gratis deur middel van die relevante toepwinkels beskikbaar gestel aan gebruikers wat reeds iWork gebruik en aan mense wat ’n nuwe toestel/rekenaar koop en aktiveer. Die nuwe OS X-weergawes is grootliks afgemaak[13] omdat dit professionele eienskappe soos Boekmerke, possamevoeging, soekbare kommentaar, die vermoë om RTF-lêers te lees/uit te stuur, verstekzoem en bladsytelling vir integrasie met AppleScript en talle ander eienskappe weggelaat is in ’n poging om ’n meer uniforme produk en gebruikerskoppelvlak te skep. Apple het egter ’n padkaart verskaf vir toekomstige herbekendstelling en het genoem dat hulle hoop om baie van die verlore eienskappe in die daaropvolgende ses maande by te werk.[14]

Die nuwe iWork vir OS X is slegs versoenbaar met OS X 10.9 en word nie oor die ’09-weergawes geskryf nie, waarskynlik sodat van die verlore eienskappe nog gebruik kan word.

Weergawes[wysig]

iWork-weergawe Keynote-weergawe Pages-weergawe Numbers-weergawe Verlangde Bedryfstelsel Vrystellingsdatum
iWork ’05 2.0 1.0  – 10.3.6 22 Januarie 2005
iWork ’06 3.0 2.0  – 10.3.9 10 Januarie 2006
iWork ’08 4.0 3.0 1.0 10.4.10 7 Augustus 2007
iWork ’09 5.3 4.3 2.4 10.4.11 (x.0); 10.6.6 (x.1); 10.7.4 (x.2, x.3); 10.8 (x.3) 9 Januarie 2009
iWork 2013 opdatering 6.0 5.0 3.0 10.9 22 Oktober 2013
iWork vir iOS 2.0 2.0 2.0 iOS 7 22 Oktober 2013

Komponente[wysig]

Algemene komponente[wysig]

Produkte in die iWork-pakket deel ’n aantal komponente, grootliks as gevolg van ’n gedeelde onderliggende kode van die Cocoa- en soortgelyke gedeelde toepassingprogrammeringskoppelvlakke (TPK). Hieronder is die welbekende universele veeltalige speltoetser wat ook in produkte soos Safari en Mail gevind word. Grammatikakontrole, vind en vervang, styl en kleurkeurders is soortgelyke voorbeelde van ontwerpseienskappe wat regdeur Apple se toepassings gevind kan word.

Bowendien deel die toepassings in die iWork-pakket ’n model van die dokument. In die meeste dokumentgebaseerde toepassings is daar ’n spesifieke datatipe wat die basis vorm van die toepassing se uitsig op die wêreld, in woordverwerkers byvoorbeeld, is die teks die eersteklas burger van die toepassing en in ’n sigblad is dit die selle in ’n tabel. Ander objekte, beelde of grafieke word bestuur deur geheg te wees, of na verwys te wees, aan die onderliggende primêre datatipe.

In iWork deel al die toepassings ’n algemene onderliggende dokumentformaat, die “doel”, ’n generiese houertipe wat uitleg en bergingsmeganismes verskaf. Elke toepassing voeg dan sy eie pasgemaakte voorwerpe en plaas dit op die doek. Pages open die dokumente met ’n enkele groot teksobjek op die doek. Vir die gebruiker lyk dit soos ’n tipiese woordverwerker maar hulle kan die hoek neem en die grootte aanpas soos in ’n bladuitlegtoepassing. In Numbers sien ’n mens aanvanklik ’n rooster met selle soos enige ander sigblad maar die gebruiker kan dit op enige moment kleiner as die doek maak en dan veelvuldige roosters, grafieke op selfs tekeninge op dieselfde doek toevoeg.

Die verskil is subtiel omdat baie van hierdie eienskappe ook in meer tradisionele programme soos Microsoft Excel geïmplementeer is. Die verskil in gebruikerskoppelvlak is egter gewigtig. In Excel word grafieke geberg as deel van die blad en kan onbedoeld rondgeskuif word deur normale gebruikersaksies. In Numbers is grafieke, soos alles anders, deel van die doek en veranderinge aan die blad/blaaie is gewoonlik onafhanklik.

Die iWork-model dra ’n mate van ooreenkoms met die vroeëre probeerslag van Apple, genaamd OpenDoc. OpenDoc het het ook ’n enkele onderliggende dokumentenjin gebruik, saam met ’n enkele formaat op die skyf. Anders as iWork het OpenDoc ook in ’n enkele toepassing gewerk, waarin verskeie redigeerders opgeroep kon word. ’n Mens kon byvoorbeeld ’n generiese dokument oop maak, dan ’n sigbladredigeerder oopmaak en dan ’n sigblad invoeg. iWork skort hierdie vlak van buigsaamheid in terme van redigering maar behou dit in uitleg.

Werkskermtoepassings[wysig]

Pages[wysig]

Pages is ’n woordverwerkingstoepassing met bladuitlegeienskappe. Buiten die basiese woordverwerkingsfunksionaliteit sluit Pages 140 sjablone in wat deur Apple ontwerp is en wat gebruikers in staat stel om verskillende tipes dokumente, insluitens nuusbriewe, uitnodigings, en CV’s insluit tesame met ’n aantal sjablone met ’n opvoedingstema (soos verslae en uiteensettings) vir studente en opvoeders.[1][4]

Tesame met Keynote en Numbers integreer Pages met Apple se iLife-pakket. Deur die Mediablaaier te gebruik kan gebruikers video’s, foto’s en musiek direk in dokumente plaas vanuit die Pages-toepassing.[1] ’n Volskermmodus versteek die keusebalk en taakbalke en ’n uiteensettingsmodus laat gebruikers toe om vinnig uiteensettings te skep wat maklik geherrangskik kan word deur bladsye te sleep en neer te sit. Pages sluit ook ondersteuning in vir die toevoeging van ingewikkelde vergelykings met MathType 6 en bronverwysing deur EndNote X2 te gebruik.[10]

Die Pages-toepassing kan Microsoft Word-dokumente oopmaak en wysig (insluitend DOC en Office Open XML-lêers), ryk teksformaat-dokumente en gewone teksdokumente.[15] Pages kan ook dokumente uitvoer in die DOC, PDF en ePub-formate.[9] Dit kan egter nie OpenDocument lêerformate oopmaak of wysig nie.

As ’n woordverwerkingstoepassing wat die skep van aantreklike dokumente vir ’n verskeidenheid van toepassings soos lesplanne en nuusbriewe aanmoedig, ding Pages mee met Microsoft Word, Microsoft Publisher (nooit na OS X oorgedra nie), Apple se eie gratis PDF en e-boekskryftoepassing, iBooks Author en Adobe se veel duurder professionelemark publiseringstoapssing InDesign.

Keynote[wysig]

Keynote is ’n toepassing wat gebruik word om vertonings te skep en terug te speel. Die eienskappe is vergelykbaar met Microsoft PowerPoint maar Keynote het sekere unieke eienskappe wat verskil van soortgelyke toepassings. Keynote, soos Pages en Numbers, integreer met die iLife-pakket. Gebruikers kan media vanuit iMovie, iTunes, iPhoto en Aperture direk in Keynote-dokumente sleep en neersit deur van die Mediablaaier gebruik te maak. Keynote het ’n aantal sjablone, oorgange en effekte. Magic Move laat gebruikers toe om eenvoudige oorgange te plaas om beelde en teks wat in opeenvolgende skyfies is, outomaties te laat beweeg.[1][4][9][10]

Die Keynote Remote-toepassing laat gebruikers toe om skyfies en aanbiedersnotas te besigtig en Keynote-vertonings te beheer met ’n iPhone of iPod Touch oor ’n Wi-Fi-netwerk.[10]

Keynote ondersteun ’n aantal lêersformate. Vertonings word by verstek as .key-lêers geberg. Keynote kan Microsoft PowerPoint-lêers (.ppt) oopmaak en wysig. Vertonings kan ook uitgevoer word as Microsoft PowerPoint-lêers, QuickTime-video’s (wat vertoonbaar is op ’n iPod en iPhone), HTML-lêers en PDF-lêers. Vertonings kan ook direk na iDVD, iTunes, GarageBand, iWeb,[9] en na YouTube gesture word.[4] Die Keynote ’09-lêerformaat is nie terugwaarts aanpasbaar nie; .key-lêers wat met Keynote ’09 geberg word kan nie met vroeëre weergawes van Keynote oopgemaak word nie.[16]

Numbers[wysig]

Numbers is ’n sigbladtoepassing wat in 2007 tot die iWork-pakket toegevoeg is met die bekendstelling van iWork ’08. Numbers, soos Microsoft Excel en ander sigbladtoepassings, laat gebruikers data organiseer in tabelle, doen berekeninge met formules en skep kaarte en grafieke deur gebruik te maak van data wat ingevoer is in die sigblad. Numbers is egter verskillend deurdat dit gebruikers toelaat om veelvuldige tabelle te skep in ’n enkele dokument op ’n buigsame doek. Baie vooraf gedefinieerde sjablone, insluitend sommiges wat ontwerp is vir persoonlike finansies, opvoeding en sakegebruik, word ook ingesluit.[4][10]

Numbers 2, die nuutste vrystelling wat in iWork ’09 gebundel is, integreer met ander iWork-toepassings. Grafieke wat in Keynote en Pages geplak is, word outomaties opgedateer wanneer dit in Numbers gewysig word. Dit laat ook gebruikers data kategoriseer in tabelle volgens kolomme wat dan ineengekrimp kan word en opgesom kan word.[10]

Webdienste[wysig]

iWork.com[wysig]

iWork.com is ’n gratis diens wat gebruikers in staat gestel het om iWork ’09-dokumente direk vanuit Pages, Keynote en Numbers te deel. Gebruikers kan op die iWork.com taakbalkikoon klik en inteken deur hul AppleID om ’n dokument op te laai en ander gebruikers te nooi om dit aanlyn te besigtig. Die ander gebruikers kan kommentaar en notas op die dokument maak an ’n kopie aflaai in iWork, Microsoft Office en PDF-formate. Die skepper van die dokument kan kommentaar byhou op die iWork.com-webblad

Apple het aangekondig dat die diens van 31 Julie 2012 nie meer beskikbaar gaan wees nie.[17]

iPhone-toeps[wysig]

Op 7 Junie 2012, met die bekendstelling van die nuwe iPhone 4, het Apple ’n paar skermgrepe van die toestel in aksie geplaas en onopsetlik getoon hoe ’n e-posaanhangsel in Keynote oopgemaak word. Dit het sommige laat glo dat die iPhone weergawe van die iWork-pakket binnekort beskikbaar sou wees in die iOS-toepwinkel.[18]

Op 28 Junie 2010 het verskeie webblaaie verslag gedoen dat verskeie voorbeelde van dienste wat aangebied word wanneer AppleCare vir die iPhone 4 verkoop word, gegee word insluitend een wat lui: “Gebruik iWork vir iPhone en ander Apple-gemerkte iPhone-toeps.” Die webblaaie noem ook dat dit vinnig verwyder is.[19][20]

Op 31 Mei 2011 het Apple ’n persverklaring vrygestel wat noem dat iWork beskikbaar sou wees in die iOS-toepwinkel vir die iPhone en iPod Touch.[21]

Op 10 September 2013 het Apple aangekondig dat iWork, iMovie en iPhoto beskikbaar sou wees as ’n gratis aflaai op nuwe iOS-toestelle wat sedert 1 September 2013 geaktiveer is.[22]

iWork vir iCloud[wysig]

Gedurende die sleuteltoespraak van 2013 Apple Wêreldwye Ontwikkelaarskonferensie (WWOK) is iWork vir iCloud bekendgestel vir vrystelling saam met die volgende weergawes van die toepassingsweergawes van iWork later in dieselfde jaar. Die drie toeps vir iOS en OS X wat deel vorm van Apple se iWork-suite (Pages, Numbers en Keynote) sal beskikbaar gestel word op ’n webkoppelvlak (as Pages vir iCloud, Numbers vir iCloud en Keynote vir iCloud onderskeidelik), en verkrygbaar wees via die iCloud-webblad wanneer ’n gebruiker met sy Apple ID ingeteken het. Die webtoeps sal ook sinkroniseer met die gebruikers se iOS en OS X-weergawes van die toep deur middel van hul Apple ID’s.

Dit stel die gebruiker in staat om dokumente op die internet te skep en te wysig deur een van die ondersteunde webblaaiers te gebruik: Safari, Chrome en Internet Explorer. Dit beteken ook dat Windows-gebruikers nou toegang het tot hierdie toepassings wat voorheen beperk was tot Apple-rekenaars deur middel van die webkoppelvlak. iWork vir iCloud het ’n beperkte funksionaliteit vergeleke met die OS X weergawe. ’n Voorbeeld is dat die lettertipes wat beskikbaar is in die webweergawe baie meer beperk, dit ondersteun nie afdruk van die dokument nie en dokumente wat met die ondersteuning van eksterne inproppe geskep is, kan verkeerd vertoon.

Verwysings[wysig]

  1. 1,0 1,1 1,2 1,3 1,4 1,5 1,6 1,7 1,8 1,9 (en) Apple stel iWork ’05 bekend”.
  2. 2,0 2,1 (en) iWork Stelselvereistes”.
  3. (en) Apple stel Keynote bekend”.
  4. 4,0 4,1 4,2 4,3 4,4 4,5 4,6 (en) Apple stel iWork ’08 bekend”.
  5. 5,0 5,1 (en) ’n Inleiding tot Bento, die vermiste databasistoep wat iWork moes hê”.
  6. (en) IGG Software verander naam van ‘iWork’ na ‘iBiz’ – maak dit plek vir Apple se iWork?”. MacDailyNews: 3 Januarie 2005.
  7. (en) Fried, Ina, "GEetuienis van skuif by Apple / Maatskappy ontwikel moontlik eie kantoorprogrammatuur", The San Francisco Chronicle, 5 Januarie 2005. URL besoek op 1 Maart 2009.
  8. (en) Gaan Apple ‘iWork’ kantoorpakket bekendstel?”. 3 Januarie 2005. URL besoek op 1 Maart 2009.
  9. 9,0 9,1 9,2 9,3 (en) Apple stel iWork ’06 bekend”.
  10. 10,0 10,1 10,2 10,3 10,4 10,5 (en) Apple stel iWork ’09 bekend”.
  11. (en) Loyola, Roman. “Apple stel iWork vir iPad bekend”. Macworld. URL besoek op 31 Desember 2011.
  12. (en) Apple, Apple lanseer die iPad, Apple, 27 Januarie 2010.
  13. (en) Sommige ervare gebruikers is ongelukkig oor verlore eienskappe in die nuwe iWork”. MacRumors: 25 Oktober 2013.
  14. (en) Aangaande die nuwe iWork vir Mac: Eienskappe en versoenbaarheid”. Apple. URL besoek op 6 November 2013.
  15. (en) iWork - Open, berg, en e-pos Microsoft Office-lêers”. Apple. URL besoek op 16 April 2012.
  16. (en) Mac OS X Wenke
  17. (en) Aangaande iWork.com openbare beta
  18. (en) Apple bevestig iWork kom na iPhone 4”. Pocket-lint: 7 Junie 2010. URL besoek op 31 Desember 2011.
  19. (en) Apple se webblad sinspeel op iWork vir iPhone”. Mac Rumors: 28 Junie 2010. URL besoek op 31 Desember 2011.
  20. (en) Gratis iWork-sjablone”. Iworktemplates.blogspot.com: 28 Junie 2010. URL besoek op 31 Desember 2011.
  21. (en) Persinligting - Apple iWork Nou Beskikbaar Vir iPhone & iPod Touch Gebruikers”. Apple: 31 Mei 2011. URL besoek op 31 Desember 2011.
  22. (en) Alvarez, Edgar (10 September 2013). “Apple se iWork, iMovie en iPhoto gaan nou gratis wees op nuwe iOS-toestelle”. Engadget. URL besoek op 17 September 2013.


Hierdie artikel is in sy geheel of gedeeltelik vanuit die Engelse Wikipedia vertaal.