Meryl Streep

in Wikipedia, die vrye ensiklopedie
Spring na: navigasie, soek
Meryl Streep
Meryl Streep by die 56e Internasionale Film Fees in San Sebastian
Streep by die 56e Internasionale Film Fees in San Sebastian, 2008

Naam Mary Louise Streep
Geboorte 22 Junie 1949
Summit, NJ (VSA)
Nasionaliteit Amerikaans
Beroep(e) Aktrise
Noemenswaardige
rolprent(e)
Death Becomes Her, The Devil wears Prada
Toekennings Oscar & Golden Globe vir Sophie's Choice en Kramer vs. Kramer
Internet-rolprentdatabasis-profiel

Mary Louise "Meryl" Streep (gebore Junie 22, 1949) is 'n Amerikaanse aktrise betrokke by film, teater, en televisie. Sy word beskou as een van die voorstaande aktrises van die moderne era. Sy is alreeds 18 keer vir 'n Academy Award benoem en 28 keer vir 'n Golden Globe, toekennings waarvan sy al twee en ses respektiewelik gewen het.

Lewe[wysig]

Streep is gebore in Summit, New Jersey. Haar ma was 'n kunstenaar en haar pa was 'n apteker. Mary Louise het 'n B.A. graad in Drama verwerf aan Vassar College en later 'n M.A. van Yale se dramaskool.

Sy is getroud met die skilder Donald Gummer. Saam het hulle vier kinders. Sy was eens verloof aan akteur John Cazale maar hy is oorlede na 'n stryd met kanker.

Loopbaan[wysig]

Alhoewel Streep nou bekend is as 'n aktrise van die silwerdoek het haar loopbaan in die teater begin. Sy was 'n lid van Joseph Papp se New York Shakespeare Festival. Daar vertolk sy rolle in Shakespeare se toneelstukke Henry V, Taming of the Shrew, en Measure for Measure asook in Bertolt Brecht en Kurt Weill se Happy End.

Haar film-debuut was in Julia, waarin sy 'n klein rol vertolk het langs Jane Fonda en Vanessa Redgrave. Haar volgende filmprojekte was in The Deer Hunter, Manhattan, en Kramer vs. Kramer. Vir laasgenoemde prent wen sy 'n Oscar-toekenning, vir haar hartroerende vertolking van 'n ma wat haar seun agterlaat by sy pa wanneer sy besluit om van sy pa te skei.

'n Rolprentvertolking waarvoor sy ontsettende aansien gelok het was haar vertolking van die twee vrouekarakters in The French Lieutenant's Woman, 'n verwerking vir die silwerdoek van John Fowles se boek van dieselfde naam. Weens hierdie vertolking beland sy op die voorblad van TIME magazine in 1981, met 'n opskrif wat vertel: "When acting turns to alchemy".

Maar die rol wat waarskynlik haar beste werk sover vereis het is die van Sophie in Sophie's Choice. Hierin speel sy 'n Poolse vrou wie die konsentrasiekampe by Auschwitz-Birkenau oorleef het en daarna besluit het om 'n nuwe lewe vir haarself in Brooklyn, New York te probeer skep. Vir Sophie moes Streep leer om Duits en Pools te praat, en boonop nog om Engels met 'n Poolse aksent. Die suksesvolle vertolking wen toe vir Streep haar tweede (en sover haar laaste) Oscar standbeeld.

Sydney Pollack het haar gekies om langs Robert Redford te verskyn in Out of Africa, 'n rolprent wat handel oor die skrywer Isak Dinesen se doen en late in Kenia gedurende die tydperk rondom die Eerste Wereldoorlog. Streep verskyn saam met Robert de Niro in Falling in Love, saam met Jack Nicholson in Heartburn, en saam met Sam Neill in die Australiaanse rolprent A Cry in the Dark. Laasgenoemde is 'n ware vertelling van Lindsay Chamberlain se ongeluk toe 'n wilde dingo hond haar baba Azaria gesteel en waarskynlik vermoor het uit 'n tent in 'n kampterrein.

In 1990 volg die komedie Postcards From the Edge, waarin Streep 'n dwelmverslaafde aktrise van tweederangse rolprente moes speel. In The Bridges of Madison County is sy die Italiaans Amerikaanse huisvrou wie in 'n blitsromans met Clint Eastwood omgaan, en in My One True Thing is sy weer 'n huisvrou, maar die keer 'n getroue vrou en ma wat stadig sterf van kanker.

Streep het in die laat negentigerjare vir 'n tyd lank nie gewerk nie, moontlik omdat sy wou rus maar moontlik ook oor sy gesukkel het om werk in Hollywood omdat sy ouer begin word het. Maar toe sy weer begin werk het, het sy haar kritici en haar bewonderaars platgeslaan met 'n reeks uitstekende rolprentkeuses. In The Hours speel Streep 'n New York vrou wie se dag en lewe die roetine van die hoofkarakter uit Virginia Woolf se roman Mrs Dalloway naboots. In Adaptation is sy 'n joernalis wat eers net orgideë navors, maar dan 'n dwelmverslaafde word en iemand vermoor. En in Angels in America lewer sy weer van haar beste werk; in hierdie meesterstuk van Tony Kushner moet Streep vier karakters skep, waarvan een selfs 'n man was.

Na hierdie besonders kreatiewe fase bereik haar grootste faam met twee komdiese rolle in The Devil Wears Prada en in Mamma Mia. In Mamma Mia wys Streep haar uitsonderlike talent vir sang, 'n gawe wat sy al voorheen in enkele rolprente ten toon gestel het.

Na 'n lange afwesigheid het Streep in 2001 teruggekeur na die verhoog met 'n ope-lug vertoning van Anton Chekhov se toneelstuk The Seagull in New York se Central Park. Sy het dit in 2006 opgevolg met 'n vertoning van Brecht se Mother Courage.