Olympus Mons
Olympus Mons is 'n vulkaan op Mars en die grootste berg in die sonnestelsel.
Olympus Mons is 'n skildvulkaan met 'n deursnit van 624 km en 'n hoogte van ongeveer 25 km, met 'n eskarp van 6 km om sy rand. Mede danksy die berg se groot basis het dit 'n heel ligte hellingshoek, m.a.w. is hy glad nie styl nie, maar het hy eerder 'n afgeplatte voorkoms. Die vulkaan is in die Tharsis-streek geleë, 'n enorme vulkaniese plato by Mars se ewenaar, naby Valles Marineris.
Die grootste vulkaan op aarde, Mauna Loa, is 10 km hoog en 120 km breed; dus is Olympus Mons se volume ongeveer 100 keer soveel as dié van Mauna Loa. Ook Mount Everest, die hoogste berg op aarde, lyk met 'n hoogte van 8,848 km klein teen Olympus Mons.
By die piek is daar 'n kaldera, 'n groot krater, wat 80 km breed is. Die kaldera bestaan uit ses oorlappende kraters, met 'n maksimum diepte van 3 kilometer.
Buite die vulkaan se eskarp is 'n grag wat met lawa gevul is, waarskynlik afkomstig van Olympus Mons self af.
Aangesien die berg so hoog is dat dit bo die stofstorms op Mars se oppervlak uitsteek, is dit reeds in die 1800's deur sterrekundige waarnemers raakgesien. Na foto's deur die Mariner-sondes in die sewentigerjare is die enorme grootte bevestig.
