Rykie van Reenen

Rykie van Reenen
Gebore	31 Desember 1923 Darling
Sterf	28 Desember 2003 Yzerfontein
Nasionaliteit	Suid-Afrika
Beroep	Joernalis

Rykie van Reenen (1923 - 2003) was een van die grootste Afrikaanse joernaliste van die tweede helfte van die twintigste eeu.

Agtergrond

Rykie van der Byl van Reenen is op 31 Desember 1923 op die plaas Waterkloof in die distrik Darling aan die Weskus gebore. Aan die Universiteit van Stellenbosch behaal sy die graad B.A. met Afrikaans, Engels en Latyn, asook die graad M.A. in Engels, almal met onderskeiding.

Loopbaan

In 1945 tree sy as joernalis in diens by Die Burger en word daar ‘n baanbreker vir die vrou (en veral die Afrikaanssprekende vrou) in die joernalistiek. Hoewel sy haar aanvanklik beperk het tot vrouesake, het sy mettertyd politieke en sosiale kommentaar gelewer. Sy het veral bekendheid verwerf met haar bydraes tot die rubriek Van Alle Kante (waar sy in die voetspore van C.J. Langenhoven gestaan het). In 1965 aanvaar sy ‘n betrekking by die destydse Johannesburgse Afrikaanse Sondagkoerant Die Beeld (ter wille van duidelikheid: dit was nie die dagblad Beeld wat eers in 1974 ontstaan het nie). Haar rubriek Randakker verskyn in Die Beeld en later in die Sondagblad Rapport. ‘n Keur uit haar rubrieke is in 1980 gepubliseer onder die titel Op die Randakker. Tydens die Jom Kippoeroorlog in 1967 maak sy naam as oorlogskorrespondent. Nasionale Pers se direksie bevorder haar tot assistentredakteur van Rapport en daarmee word sy die eerste vrou in die land wat so ‘n hoë pos in die joernalistiek beklee.

Om gesondheidsredes tree sy in 1980 af en vestig haar op Yzerfontein, naby haar geboorteplek. Sy beperk hierna haar skryfwerk hoofsaaklik tot resensies. Op 28 Desember 2003 sterf sy in haar aftreehuis.

Boeke

• Op die Randakker. (1981)
• Heldin uit die vreemde: die verhaal van Emily Hobhouse. Kaapstad: Tafelberg, 1970 (SA gallery, 2)
• Emily Hobhouse – Boer War letters. Kaapstad: Human & Rousseau, 1984
• Alba Bouwer – die lang reis van hart tot hart: ‘n keur uit haar toesprake. Kaapstad: Tafelberg, 1995
• Saam met Alba Bouwer en Anna Rothmann: drie versamelbundels uit die werk van M.E.R., naamlik Kom nader, Familiegesprek en ‘n Kosbare erfenis

Bekronings

• Eredoktorsgraad in die letterkunde van die Universiteit van Stellenbosch (Desember 1986)
• Scheepersprys vir Jeugliteratuur vir Heldin uit die vreemde (1971)
• Markus Viljoen-medalje vir joernalistiek (1982)
• Recht Malan-prys vir die boek Emily Hobhouse – Boer War letters

Bronnelys

• BY, Die Burger, Saterdag 27 Augustus 2011
• Meiring, Martie: Die lewe van 'n vrydenker in SA. Die Burger, Maandag 26 September 2011
• Rabe, Lizette: Rykie. ‘n Lewe met woorde. Kaapstad: Tafelberg, 2011