Afrikaanse Hoër Meisieskool
| Afrikaanse Hoër Meisieskool Pretoria | |
| Leuse | Ek sien haar wen |
|---|---|
| Gestig | 28 Januarie 1920 |
| Tipe | Staatskool |
| Hoof | Juf Marna Jordaan |
| Adjunkhoof(de) | J.I. Troskie D. Heyns |
| Stigter | Jan Joubert en Chris Neethling |
| Personeel | 80 |
| Leerlinge | 1100 |
| Grade | 8-12 |
| Adres | 1 Bondstraat, Clydesdale, |
| Stad | Pretoria |
| Provinsie | Gauteng |
| Land | Suid-Afrika |
| Kleure | |
| Koshuis(e) | Huis Steijn |
| Skoolkoerant | Stroom-op |
| Webblad | http://www.ahmp.co.za |
Die Afrikaanse Hoër Meisieskool is 'n openbare hoërskool vir meisies in Pretoria, Gauteng, Suid-Afrika met Afrikaans as die primêre onderrigtaal. Die skool is die susterskool van die Afrikaanse Hoër Seunskool.
Geskiedenis
Stigting
Die geskiedenis van die Afrikaanse Hoër Seunskool en die Afrikaanse Hoër Meisieskool is nou verweef met die belangrikste groeitydperk van die Afrikaner en sy taal. Dié twee skole het in 1930 ontstaan ná die verdeling van Pretoria se eerste Afrikaanse hoërskool wat in 1920 in die eertydse woning van Generaal Piet Joubert by Visagiestraat 218 gestig is.
Wanneer die tydsomstandighede in ag geneem word, is die stigting van 'n Afrikaansmedium- hoërskool in 1920 in Pretoria – vyf jaar vóór die erkenning van Afrikaans as amptelike taal - ’n unieke gebeurtenis.
Die eerste jaar, 1920
Die eerste jaar het ’n aanvang met 44 leerlinge en drie onderwysers geneem. Onder mnr. Frank le Roux is ’n “rugbievoetbalklub”, 'n tennisklub en 'n debat- en kultuurvereniging gestig. Op akademiese terrein het die personeel alles in hul vermoë gedoen om Afrikaanse vakterme te skep en om leerstof in dié taal daar te stel.
Die tweede jaar, 1921
In 1921 was die leerlingtal 149. Die personeel vermeerder tegelykertyd van vyf na agt. In Mei is 'n tak van die “Kristenstudentevereniging” gestig. 'n Kadetkorps is ook begin, die eerste basaar en musiekuitvoering word aangebied en die eerste toneelstuk, Afrikanerharte, word op die planke gebring. Die eerste bibliotekie is ook ingerig. Daar is verder op die skool se kleure besluit, 'n skoolwapen is ontwerp en die leuse “Laat daar Lig wees” is aanvaar. Om 'n jaar vol nuwighede mee af te sluit, is die eerste jaarblad uitgegee. Die ruimte in die Jouberthuis het in 1921 krisisafmetings aangeneem. Elke kamer in die huis, sowel as die waenhuis, is beset.
Die Afrikaanse Hoërskool ontgroei sy kinderskoene, 1922 tot 1929
In 1924 het die leerlingtal op 351 gestaan, waarna dit in 1927 die 300-kerf verbygesteek het en in 1929 sou dit 400 haal.
In 1924 is die eerste koshuis in 'n huurhuis naby die Joubert-woning gevestig. Die skool het hierdie jaar sy eerste matrieks opgelewer.
In 1925 is die skool opgegradeer van 'n B- na 'n A-skool en die hoeksteen van die nuwe gebou is deur genl. J.B.M. Hertzog gelê op 'n perseel in Bondstraat, Clydesdale.
Op 26 Januarie 1927 het die skool die nuwe terrein betrek. Met die skool wat uit die staanspoor oorvol was, het die onderwysdepartement nie kans gesien om aanbouings te onderneem nie.
In Januarie 1928 het die skool in sy nuwe tuiste in Lynnwoodweg met sowat 360 leerlinge en 19 onderwysers geopen. Die meisiekosgangers het 'n nuwe koshuis in 1929 betrek. In daardie jaar word nog 'n ideaal verwesenlik toe die TOD die seunskoshuis begin bou het.
Teen 1929 het die Lynnwoodweg-gebou van die Afrikaanse Hoërskool ook nie meer genoeg ruimte gebied nie en daar is besluit om die seuns en meisies vanaf 1930 te skei. Die eerste afsonderlike skole vir seuns en meisies, wat Afrikaans as medium sou gebruik, kom tot stand.
Die seunskool sou in die Lynnwoodweg-gebou bly en die meisieskool sou na die eerste setel van die Afrikaanse Hoërskool in Bondstraat skuif.
Mnr. F.J. le Roux, wat die eerste hoof van die Afrikaanse Hoërskool was, het die Afrikaanse Hoër Seunskool tot sy aftrede in 1946 gelei en mej. E.M. Verster beklee die hoofpos van die Afrikaanse Hoër Meisieskool tot in 1944.
Onlangse geskiedenis
In 2003 het die Afrikaanse Hoër Meisieskool die Afrikaanse olimpiade in die kategorie Afrikaans as eerste taal gewen. Potchefstroom Gimnasium, Noordwes, was tweede en die Hoër Meisieskool Bloemhof in die Wes-Kaap was derde.[1]
Noemenswaardige alumni
- Helena Barnard – 1987-wenner van die Suid-Afrikaanse Akademie vir Wetenskap en Kuns se Geskiedenis-olimpiade.
AKADEMICI
- Susan Marx (1995) BA University of Southern California (Summa Cum Laude 2004), MA University of California (2007), LLM International Human Right Law (University of Oxford 2010)
- Prof. Gerda Saunders (nee Steenekamp) (1965) 'n Professor in Gender Studies by die Universiteit van Utah.
- Fransi Phillips (1995) Honneurs in Filosofie en Kunsgeskiedenis (Skrywer, Filosoof) Kunskritikus vir die Tjeggiese Ambassade en hou tans skool in Rusland.
- Sheila Cussons (1938) Studeer in Amsterdam verder in die Etskuns. In 1992 word sy deur die Universiteit van Natal vereer met 'n Eredoktorsgraad vir haar bydrae tot Afrikaans. Sy het 25 jaar in die buiteland gewoon.
- Anel van Aswegen (1991) Aangestel as erelid van die Research Board of Advisors of the American Biographical Institute – 2002, 2004 – permanenete aanstelling as Professor.
- Trudi Koelerman (1961) behaal in 1965 haar diploma in sang, klavier en orrel aan die Pretoriase Musiek Konserwatorium cum laude. Ontvang 'n beurs om by die Rotterdamse Konserwatorium in Nederland te gaan studeer.
- Anthea Joubert (1974) SA Ambassade Moskou.
- Aleta Michaletos (1969) stal haar kunswerke uit by die Galery La Villette in Parys, Frankryk.
Verwysings
- ↑ SAASTA – Youths proud to speak Afrikaans – some 14 000 entries for the annual Afrikaans Olympiad 9 July 2003 besoek op 23 Augustus 2007
-
Eksterne skakels
Wikimedia Commons het meer media in die kategorie Afrikaanse Hoër Meisieskool.- Die skool se amptelike webwerf in Afrikaans
