Al-Aqsa-moskee

in Wikipedia, die vrye ensiklopedie
(Aangestuur vanaf Al-Aqsamoskee)
Spring na: navigasie, soek
Al-Aqsa-moskee
Israel-2013-Jerusalem-Temple Mount-Al-Aqsa Mosque (NE exposure).jpg
Ligging  Jerusalem, Israel
Voltooi  705 n.C.
Spesifikasies 
Minaret(te)  4
Koepel(s)  2 groot + tien kleineres
Kapasiteit  5 000+
Materiale  Kalksteen (buitemure, minaret, fasade) druipsteen (minaret), goud, blaar en klip (koepels), wit marmer (binneland kolomme) en mosaïek
Styl  Vroeë Islamities, Mameluk
Die suidelike klaagmuur van die Tempelberg. Die koepel van die Al-Aqsa-moskee kan ook gesien word.

Die Al-Aqsa-moskee (Arabies: المسجد الاقصى‎‎ Al-Masjid al-Aqsa, [ʔælˈmæsdʒɪd ælˈʔɑqsˤɑ], , letterlik: "Die Verste Moskee"; Hebreeus: מסגד אל-אקצא‎‎ Misgad al-Aktsa) verwys gewoonlik na die suidelike moskee in Jerusalem. Die Islamitiese reg bepaal egter dat die hele kompleks wat vandag as die Al-Haram al-Qudsi al-Sharif ("Die Geseënde Heiligdom") aan Moslems bekend is, insluitende die Rotskoepel, deel is van die Al-Aqsa-moskee.[1][2][3]

Die moskee se vergadersaal kan ongeveer 5 000 aanbidders huisves, terwyl die moskeekompleks in sy geheel etlike honderde duisende kan akkommodeer.[4]

Die regering van Israel het die Moslemraad, die Waqf, volle administratiewe beheer oor die kompleks gegee. Niemoslems word nie toegelaat om die moskee te betree nie.[5]

Geskiedenis[wysig | wysig bron]

Die voorste ingang na die moskee.
Die binnekant van die moskee.

Baie mense glo Salomo se tempel het eens op ’n tyd op die plek gestaan waar die moskee tans opgerig is. Daar word geglo die Romeinse keiser Titus (toe nog ’n generaal) het in 70 n.C. die Joodse tempel wat deur koning Herodes op die plek herbou is, vernietig. Keiser Justinianus I het in 530 n.C. ’n kerk ter ere van Moeder Maria op die plek opgerig wat in die 7de eeu deur die Perse vernietig is.

Die huidige gebou is die resultaat van verskillende fases van bouwerk en verbeterings. Daar word geglo die bouwerk aan die moskee is deur die Omajjadiese kalief Abd al-Malik (685–705) begin.

Dit het onder verskeie aardbewings deurgeloop en is in die Abbasidiese tydperk deur kalief al-Mahdi (775–785) verbeter en herstel, en moontlik ook deur kalief al-Mansur (754–775). Verdere bouwerk is ook in die 11de eeu gedoen tydens die Fatimidiese tydperk.

Nadat Jerusalem tydens die Eerste Kruisvaart verower is, is die Koninkryk van Jerusalem gestig en is die Al-Aqsa-moskee gebruik as die paleis van die konings van Jerusalem.

Die Kruisvaarders het geglo die gebou is op die bouvalle van Salomo se tempel gebou en het na die gebou verwys as die Templum Salomonis, terwyl hulle die Rotskoepel die Templum Domini ("Die Tempel van God") genoem het.

Omstreeks 1119 het koning Boudewyn II van Jerusalem ook ’n deel van die ruimte in een vleuel aan ’n nuwe orde toegeken, naamlik die Tempeliers. Die gebou was die hoofkwartier van die Tempeliers totdat Saladin die stad in 1187 verower het. Die Tempeliers het hul hoofkwartier toe na die kusstad Akko verskuif, wat hulle die volgende 100 jaar beset het, en daarna na die eiland Siprus.

Die moskee is in die 14de en 20ste eeu verskeie kere gerestoureer. Skade wat in 1927 en 1936 deur aardbewings veroorsaak is, het dit genoodsaak om feitlik die hele moskee te herbou, en dit het daartoe gelei dat antieke dele van die oorspronklike moskee weer ontdek is. Die moskee is verskeie kere aangepas om dit teen aardbewings te beskerm en om aan die behoeftes van die plaaslike bevolking te voldoen. Die struktuur bly egter steeds in wese dieselfde as wat dit was ná die herbouing deur kalief Al-Dhahir in 1033 n.C.

Verwysings[wysig | wysig bron]

  1. Al-Masjid Al-Aqsa is die oudste Islamitiese naam vir die gebied en is gebruik totdat die Mamelukke die term "al-Haram al-Qudsi al-Sharif" begin gebruik het. (M.H. Burguoyne, Mamluk Jerusalem, London, 1987; Aref al-Aref, The Detailed in the History of Jerusalem, 1961, bl. 219; Oleg Grabar, The Haram al-Sharif: An essay in interpretation, BRIIFS vol. 2, no. 2 (Herfs 2000).
  2. Ibn Taymiyah, A Great Compilation of Fatwa, Vol2, bl. 62.
  3. Palestinian Encyclopedia Volume 4, bl. 203
  4. Op 31 Desember 1999 het meer as 400 000 Moslemaanbidders die Vrydaggebede by die al-Aqsa-moskeekompleks bygewoon [1]. Sien ook [2] en [3]
  5. Reiswebwerf met inligting oor die moskee

Eksterne skakels[wysig | wysig bron]

Koördinate: 31°46′34″N 35°14′9″O / 31.77611°N 35.23583°O / 31.77611; 35.23583