Arsakes I van Partië

Arsakes I 𐭀𐭓𐭔𐭊
'n Muntstuk van Arsakes I. Die keersy wys 'n sittende boogskutter met 'n boog. Die Griekse inskripsie regs is sy naam; die inskripsie onder die boog is in Aramees.
Koning van die Arsakidiese dinastie
Heerskappy	247-217 v.C.
Opvolger	Arsakes II
Oorlede	217 v.C. Partië
Vader	Friapites
Religie	Zoroastrisme

Arsakes I (van die Griekse Ἀρσάκης; Parties: 𐭀𐭓𐭔𐭊, Aršak; Persies: اشک, Ašk) was die eerste koning van die Partiese Ryk, sowel as die stigter van die Arsakidiese dinastie van Partië. Hy het van 247 tot 217 v.C. regeer. Arsakes was die leier van die Parni, een van die drie stamme van die Dahae-konfederasie. Hy het sy dinastie in die middel 3de eeu v.C. gestig nadat hy die satrapie Partië (nou deel van Turkmenistan en Iran) afgeneem het van Andragoras, 'n satraap wat teen die Seleukidiese Ryk gerebelleer het.

Hy het die res van sy bewind gebruik om sy heerskappy in die gebied te konsolideer en die Seleukiede se pogings om Partië te verower af te weer. Danksy Arsakes se suksesse het hy 'n gewilde figuur onder die Arsakidiese monarge geword, wat sy naam as 'n eretitel gebruik het. Teen die tyd van sy dood het Arsakes die fondament gelê van 'n sterk staat, wat eindelik 'n ryk geword het onder sy agterkleinneef Mitridates I, wat die antieke Nabye Oosterse koninklike titel "koning van konings" aangeneem het.

Arsakes is deur sy seun Arsakes II opgevolg.

Daar is min geskrewe bronne oor Arsakes; die meeste is Griekse en Romeinse geskrifte wat eeue ná sy dood geskryf is. Min is dus oor sy bewind bekend. Sommige geleerdes het selfs sy bestaan bevraagteken, totdat nuwe studies en argeologiese vondste sy identiteit in die 1960's bevestig het.

Skakels

• Hierdie artikel is in sy geheel of gedeeltelik uit die Engelse Wikipedia vertaal.