Atlantis (eiland)

in Wikipedia, die vrye ensiklopedie
Spring na: navigasie, soek
Athanasius Kircher se kaart van Atlantis, hier in die middel van die Atlantiese Oseaan uitgebeeld. Die kaart is onderstebo geteken, suid is bo.

Volgens antieke Griekse verhale is Atlantis 'n groot eiland of klein kontinent wat wes van Gibraltar in die Atlantiese Oseaan geleë was. Die inwoners van Atlantis was só ryk en die mense só edel dat die gemeenskap jare lank in algehele harmonie kon leef. Nadat hul goddelike bloed té veel met dié van sterflinge verdun is, het Zeus besluit om die beskawing te vernietig. Ná 'n aardbewing het hierdie eiland-vasteland in die bestek van een dag en een nag in die see weggesink.[1]

Die verhaal van Atlantis word die eerste keer deur die Griekse filosoof Plato in sy dialoë Timaeus en Critias genoem, wat hy omstreeks 360 v.C. geskryf het. Plato gebruik interessante stories in al sy boeke om sy idees oor regering en filosofie te verduidelik. Geen ander antieke skrywer het besonderhede oor Atlantis verskaf, totdat Plato daaroor geskryf het nie. As gevolg hiervan dink baie mense dat Atlantis 'n fiktiewe plek is wat hy vir sy stories opgemaak het.[2]

Ná Plato het die idee van Atlantis meestal vergete geraak, totdat die skrywer Ignatius Donnelly in 1882 noem dat Atlantis werklik is, en dat dit die oorsprong van talle antieke kulture, soos die Egiptiese- en Maja-kulture, is. Donnelly se boek het mense se belangstelling in Atlantis geprikkel en het talle rolprente, TV-reekse, boeke en skilderye geïnspireer. Kort voor lank ontstaan stories dat Atlantis sedert antieke tye oor vliegtuie, duikbote, kragtige energiekristalle, en ander steeds onbekende tegnologieë beskik het.

Nadat wetenskaplikes die bodem van die Atlantiese Oseaan bestudeer het, is hulle egter oortuig dat dié plek nooit bestaan het nie. Dit bevestig dan ook die vermoede dat dit 'n mitiese plek is wat Plato vir sy stories geskep het.

Verwysings[wysig | wysig bron]

  • Emmet Sweeney: Atlantis: The Evidence of Science, Algora, 2010
  1. HAT Taal-en-feitegids, Pearson, Desember 2013, ISBN 978-1-77578-243-8
  2. Om die geheime van Atlantis op te diep, Beeld, 29 September 2001

Eksterne skakels[wysig | wysig bron]