Camp David

in Wikipedia, die vrye ensiklopedie
Spring na: navigasie, soek
Die hoofgebou van Camp David in Februarie 1971

Camp David is die nie-amptelike, maar mees gebruikte benaming vir die Naval Support Facility Thurmont, 'n landelike rusplek vir die President van die Verenigde State van Amerika en sy gaste.

Die rusplek, wat sowat 100 kilometer noord-noordwes van die hoofstad Washington, DC in 'n laagliggende, heuwelagtige en beboste gebied in die Catoctin Mountain Park geleë is, is streng genome 'n militêre instelling wat hoofsaaklik deur lede van die Amerikaanse Vloot en die U.S. Marine Corps beman word. In administratiewe opsig maak dit deel uit van die nie-geïnkorporeerde Frederick County in die deelstaat Maryland en is dit naby die naamgewende nedersetting Thurmont teen 'n hoogte van 560 meter bo seevlak geleë.

Die rusplek het vroeër as Hi-Catoctin bekend gestaan en is oorspronklik tussen 1935 en 1938 deur die Works Progress Administration (WPA) as 'n ruskamp vir federale regeringsagente en hul gesinne opgerig. In 1942 is die kamp deur president Franklin D. Roosevelt in 'n presidensiële rusplek omgeskep en - na aanleiding van die fiksionele paradys in die Himalaja-bergreeks - hernoem tot Shangri-La. Die huidige naam gaan terug op president Dwight D. Eisenhower wat die kamp ter ere van sy pa en kleinseun David genoem het.

Die rusplek is nie toeganklik vir die publiek nie. Om die privaatheid van die kamp te beskerm, maar ook om veiligheidsredes, word Camp David nie op die amptelike kaarte van die Catoctin Mountain Park aangedui nie.

Eksterne skakels[wysig]

Commons-logo.svg
Wikimedia Commons het meer media verwant aan:
Camp David (kategorie)