Cao Xueqin
Cao Xueqin | |
|---|---|
 | |
| Gebore | 1724 of 1715 |
| Sterf | 1763 of 1764 |
| Nasionaliteit | China |
| Beroep | Skrywer, digter, filosoof en skilder |
| Bekend vir | Droom van die Rooi Kamer |
Cao Xueqin (Chinees: 曹雪芹, Pinyin: Cáo Xuěqín, Wade-Giles: Ts'ao Hsueh-ch'in; (1724[1] of 1715[2] tot 1763[2] of 1764[3]) was 'n Chinese skrywer, digter, filosoof en skilder. Hy is veral bekend as die skrywer van Droom van die Rooi Kamer. Sy geboortenaam was Cao Zhan (曹 霑).
Biografie[wysig | wysig bron]
Daar is amper geen bronne oor die lewe van Cao bewaar nie, daarom is daar baie onsekerhede oor hom. Sy presiese geboortejaar is byvoorbeeld nie bekend nie. In elk geval kom Cao uit 'n Han-Chinese familie, wat later deel geword het van die Wit Tak (正 白旗) van die Mantsjoes-baniere. Sy familie het 'n tydperk van glorie gehad onder die regering van keiser Kangzi. Cao Xueqin was self die seun van Cao Fu of Cao Yong. Cao Yong se enigste seun is in 1715 gebore.
Byna alles wat mense vandag van Cao Xueqin weet, is afkomstig van wat familie en vriende later van hom vertel het. Later in die lewe het Cao hom in 'n voorstad van Beijing gaan vestig, waar hy die grootste deel van sy lewe deurgebring het. Hy het in armoede geleef; sy enigste inkomste kom uit die verkoop van skilderye. Volgens sy vriende en kennisse was hy intelligent en baie talentvol. Sy skilderye was hoofsaaklik beelde van rotse en landskappe.
Na bewering het Cao Xueqin meer as tien jaar gewerk aan die manuskrip wat uiteindelik gegroei het tot Droom van die Rooi Kamer. Ten tyde van sy dood was die roman nie heeltemal klaar nie.
Cao Xueqin was ongeveer 40 tot 50 jaar oud ten tyde van sy dood, maar sy presiese sterfdatum word ook bespiegel. Hy is oorleef deur sy vrou en minstens een seun. Hy het postuum beroemd geword toe sy boek gepubliseer is.
Verwysings[wysig | wysig bron]
- ↑ Zhou, Ruchang. Cao Xueqin. p. 230–233.
- ↑ 2,0 2,1 Briggs, Asa *(ed.) (1989) The Longman Encyclopedia, Longman, ISBN 0582916208
- ↑ Zhang Yiquan: Hong lou meng volume 1. bl.2 verwys na in die inleiding van die Droom van die Rooi Kamer. deur Li-Tche Houa and Jacqueline Alézaïs.La Pléiade 1979
Eksterne skakels[wysig | wysig bron]
Wikimedia Commons het meer media in die kategorie Cao Xueqin.
Hierdie artikel is in sy geheel of gedeeltelik uit die Nederlandse Wikipedia vertaal.
Normdata  |
|
|---|