Charles Davidson Bell

in Wikipedia, die vrye ensiklopedie
Jump to navigation Jump to search
Charles Davidson Bell, 'n selfportret

Charles Bell (1813–1882) was ’n Skotsgebore landmeter-generaal van die ou Kaapkolonie, 'n kunstenaar, heraldikus, en ontwerper van medaljes en seëls. As skilder is hy veral bekend vir ’n geïdealiseerde voorstelling van Jan van Riebeeck se eerste kennismaking met die Strandlopers in Tafelbaai. Hy het ook die beroemde Kaapse driehoekseëls ontwerp.[1]

Beknopte biografie[wysig | wysig bron]

Charles Davidson Bell is op 22 Oktober 1813 in Newhall, Crail, Fife, Skotland, gebore en is ook daar by die St Andrews Universiteit opgelei.[2]

Bell verlaat Skotland en vaar na Suid-Afrika, waar hy in 1830 aan die Kaap die Goeie Hoop land. Sy oom, sir John Bell, was die Sekretaris van die Kaapse Regering en het Bell 'n pos in die staatsdiens gegee. Hy word in 1834 as kunstenaar aangestel en vertrek saam met dr. Andrew Smith op sy tweejarige ekspedisie noordwaarts tot by die Limpopo. In 1838 word Bell van waarnemende klerk van die Wetgewende Raad na assistent landmeter-generaal bevorder. In 1848 word hy die landmeter-generaal.

In 1851 ontwerp hy 'n silwermedalje vir die destydse Kaapse goewerneur, sir Harry Smith, wat aan dapper troepe tydens die Agtste Grensoorlog aangebied is. Daar word dikwels na die medalje as die eerste Suid-Afrikaanse medalje verwys. Bellville is na hom genoem.

Hy is 1852 tot die posdiens se ondersoekraad aangestel en het die bekende Kaapse driehoekige posseël ontwerp. Die posseël was die eerste in hierdie vorm, wat uiters skaars en gevolglik baie gesog by filateliste geword het. Sy ontwerp van vierkantige seëls het tot 1902 in gebruik gebly.

Ná sy aftrede in 1872 keer hy in 1873 na Skotland (met se vrou Helena en hul 3 oorlewende kinders) terug. Sy vrou is op 10 September 1881 en hy die daaropvolgende jaar op 7 April 1882 oorlede.

'n Uiters-skaars Kaapse driehoekseël
Jan van Riebeeck se aankoms aan die Kaap, vermoedelik geskilder deur Charles Bell.

Verwysings[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8
  2. (July 2006) Biographical Index of Former Fellows of the Royal Society Of Edinburgh 1783–2002. The Royal Society of Edinburgh. ISBN 0 902 198 84 X.