Cliveden

in Wikipedia, die vrye ensiklopedie
Jump to navigation Jump to search

Cliveden-2382.jpg

Cliveden House

in die Chiltern Hills, Buckinghamshire

Engeland
Vlag van Verenigde Koninkryk Verenigde Koninkryk


Opgerig

Vanaf 1851


Boustyl

Italianate


Argitek

Charles Barry


Webtuiste
Cliveden House

Cliveden [ˈklɪvdən] is 'n herehuis en landgoed in besit van die National Trust, geleë in die Engelse graafskap Buckinghamshire digby die grens met Berkshire. Die herehuis in die Italianate-boustyl staan amptelik bekend as Cliveden House en is op 'n bergrug teen die rand van die Chiltern Hills opgerig, digby die klein nedersetting Taplow en twee myl buite Maidenhead.

Die herehuis is op die oewer van die Teems geleë, sowat 130 voet of 40 meter bo die rivierloop, op hellings wat afwaarts na die rivier daal. Cliveden het as woning vir 'n graaf, drie gravinne, twee hertoë, 'n Prins van Wallis en die Visegrawe Astor gedien. Cliveden is een van die National Trust se gewildste eiendomme, met 487 679 betalende besoekers in 2017.

As woning van Nancy en Waldorf Astor het Cliveden gedurende die 1920's en 1930's as ontmoetplek vir die sogenaamde Cliveden Set gedien - 'n groep van intellektueles uit die hoërklas wat voor die Tweede Wêreldoorlog 'n invloedryke rol in die Verenigde Koninkryk se politieke lewe gespeel het. Later, in die vroeë sestigerjare, het hoofgebeure van die sogenaamde Profumo-skandaal rondom die Britse minister van verdediging, John Profumo, hier afgespeel. Gedurende die 1970's het die herehuis as oorsese kampus vir die Kaliforniese Stanford-universiteit gedien.

Vandag word die herehuis deur die National Trust verhuur en as vyfster-luuksehotel bedryf, maar staan nogtans oop vir die belangstellende publiek as deel van National Trust-besigtigingstoere.[1] Die herehuis en hotel se alledaagse bestuur staan sentraal in 'n dokumentêr, A Very British Country House, wat deur Oxford Scientific Films (OSF) vervaardig en in 2018 deur die Britse televisiekanaal Channel 4 in vier aflewerings uitgesaai is.

Verwysings[wysig | wysig bron]