Cyprian Shilakoe

in Wikipedia, die vrye ensiklopedie
Cyprian Shilakoe
Geboortenaam Cyprian Mpho Shilakoe
Gebore (1946-08-03)3 Augustus 1946
Barberton, Transvaal, Unie van Suid-Afrika
Sterf 7 September 1972 (op 26)
Krugersdorp, Transvaal, Suid-Afrika
Nasionaliteit Vlag van Suid-Afrika Suid-Afrika
Veld Drukkunstenaar

Cyprian Mpho Shilakoe is op 3 Augustus 1946 in Barberton gebore en het sy kinderjare op 'n afgeleë sendingstasie by Buchbeesreich in Transvaal deurgebring. In 1968 is hy na Rorke's Drift om in die kuns te studeer. Dit was die begin van 'n besonder belowende loopbaan as beeldhouer en grafiese kunstenaar.

Veral sy grafiese werk, wat linosneë, etse en akwatinte insluit, het aan Shilakoe internasionale roem besorg. Sy kuns toon ’n mistieke en diep innerlike visie van die mens, en daar is sterk surrealistiese eienskappe. Die karakters wat hy uitbeeld, is droombeelde wat eensaamheid en oorpeinsing met ’n byna pynlike sensitiwiteit versinnebeeld. Daar is in sy kuns sterk aanduidings van buitesintuiglike waarneming en hy het dikwels die dood, reïnkarnasie en afskeid as temas gebruik.

Dit het vir hom in sy kuns nie soseer gegaan om die aardse bestaan nie, maar veel meer om die mens in geestelike transendentale en bo-aardse dimensie. 'n Opvallende kenmerk van sy styl en tegniek is die isolasie en eensaamheid van sy figure, wat stry om tot 'n beset van ware menslike waardes te kom. Hierdie eienskap kom ook sterk na vore in sy beeldhouwerk, wat beskou kan word as 'n driedimensionele oorsetting van sy grafiese werk.

Die tema van lewe, dood en reïnkarnasie in terme van voorouerverering en inheemse opvattinge oor die lewensiklus van 'n individu blyk veral duidelik in 'n reeks totempale (almal sowat 2 m en hoër) wat Shilakoe in hout uitgevoer het. Sy beeldhoukuns is uitsluitend in hout. Shilakoe se werk is in die meeste groot sentra in Suid-Afrika, asook in Swede, Denemarke, die Bondsrepubliek Duitsland, Italië en die VSA uitgestal. Kort nadat hy op 7 September 1972 in Krugersdorp in 'n motorongeluk gesterf het, is berig ontvang dat hy die eerste prys vir grafiese kuns verower het op 'n uitstalling van Afrikakuns in Los Angeles wat deur die Universiteit van Suid-Kalifornië te Los Angeles (UCLA) in 1971 georganiseer is.

Bronnelys[wysig | wysig bron]

Eksterne skakels[wysig | wysig bron]