Daniël Eloff

Daniël Eloff
Gebore	1994 Suid-Afrika
Nasionaliteit	Suid-Afrikaans
Alma mater	Universiteit van Pretoria (LLB, LLM), Universiteit van die Witwatersrand (PGDip)
Beroep	Prokureur, regsadviseur, akademikus, skrywer
Werkgewer	Kantoor van die Uitvoerende Burgemeester van Kaapstad
Bekend vir	Openbarebelanglitigasie; regsadvies aan munisipale regering; akademiese publikasies oor internetreg en menseregte

Daniël Jakobus Eloff (gebore 1994) is 'n Suid-Afrikaanse prokureur, regsadviseur en akademiese navorser. Hy dien sedert 2024 as Hoofregsadviseur in die Kantoor van die Uitvoerende Burgemeester van Kaapstad. Hy was voorheen die jongste direkteur by Hurter Spies Ing., 'n regsfirma in Pretoria, en ’n dosent en navorsingsgenoot by Akademia. Eloff se navorsing fokus op administratiefreg, federalisme, kuberreg en menseregte, en sy publikasies het in eweknie-beoordeelde joernale verskyn.

Vroeë lewe en opleiding

Eloff het in 2012 aan die Afrikaanse Hoër Seunskool gematrikuleer. Hy het die LLB- en LLM-grade aan die Universiteit van Pretoria behaal en later 'n nagraadse diploma in mensereglitigasie by die Universiteit van die Witwatersrand voltooi. Sy LLM-proefskrif se titel was "A Comparative Inquiry into Internet Neutrality in South Africa."

Eloff het as student die UP Debatsvereniging gestig en het die ATKV-Universiteitedebat se kompetisie gewen. Hy het ook in 2015 die prys vir die beste spreker gewen.

Professionele lewe

Eloff het in 2019 as kandidaatprokureur by Hurter Spies Ing. begin en is in 2021 die jongste direkteur in die firma se geskiedenis. In 2024 is hy aangestel as Hoofregsadviseur in die Kantoor van die Uitvoerende Burgemeester van Kaapstad. Hy is ook 'n direkteur van Free SA (Foundation for the Rights of Expression and Equality). Eloff dien op die adviesraad van die Universiteit van Pretoria se Konvokasie en is ’n raadslid van die Free Speech Union van Suid-Afrika. Eloff was betrokke by verskeie sake oor onderwys, taalregte, regeringsaanspreeklikheid en openbarebelanglitigasie. Hurter Spies het sedert 2009 sivielereglitigasie vir AfriForum, Solidariteit en ander burgerregte-organisasies hanteer, dus met 'n fokus op aanspreeklikheidslitigasie en die bevordering van die regte van minderhede.

Eloff was betrokke by verskeie hofsake betreffende die Suid-Afrikaanse nasionale ramptoestand wat in reaksie op die Covid-19-pandemie in Suid-Afrika verklaar is. Hierdie sake het die gedwonge kwarantyn van Suid-Afrikaners wat uit die buiteland terugkeer, die verbod op alkoholverkope, die sluiting van skole en kleuterskole, sowel as ander inperkingsmaatreëls ingesluit.

In 2026 was Eloff die veldtogbestuurder vir Geordin Hill-Lewis se suksesvolle kandidatuur as Federale Leier van die Demokratiese Alliansie toe Hill-Lewis op 12 April 2026 by die party se Federale Kongres verkies is met 92% van die steun.

Skryfwerk en publikasies

Eloff is 'n gereelde skrywer en bydraer vir verskeie aanlyn- en ander publikasies. Hy het ook 'n aantal akademiese artikels gepubliseer oor onderwerpe soos openbarebelanglitigasie, administratiewe reg, kuberreg en kinderregte. Hy het spesifieke publikasies geskryf oor onderwerpe soos internetneutraliteit, die rasionaliteitstoets in inperkingslitigasie, die aard van regte en toegang tot die internet, en meer. Sy ander skryfwerk sluit in artikels oor die algemene databeskermingsregulasie, regsprivilegie en kuberkraking, en kinderregte in Suid-Afrikaanse skole.

Benewens sy betrokkenheid by OntLaer publiseer Eloff gereeld meningsartikels in verskeie media. Hy het onder meer bygedra tot BusinessLIVE, Politicsweb, en The Daily Friend.

Persoonlike lewe

Eloff is die seun van prof. Irma Eloff, 'n professor in Opvoedkundige Sielkunde by die Universiteit van Pretoria en 'n ereprofessor aan die Universiteit van Innsbruck (Oostenryk). Hy is ook die broerskind van Theuns Eloff. Eloff, ’n afstammeling van pres. Paul Kruger en sy tweede vrou, Gezina, en ’n agter-agterkleinkind van F.C. (Ryk Freek of Frikkie) Eloff, na wie die woonbuurt Eloffsdal in Pretoria genoem is, en sy vrou, Elsie Eloff-Kruger, is een van vyf kinders.

Omstredenheid

In 2019 het 'n sosiale- mediastruweling ontstaan toe Eloff van die sosiale mediaplatform Twitter geskors is nadat hy 'n foto van Julius Malema, leier van die Ekonomiese Vryheidsvegters, geplaas het wat glo in besigheidsklas gevlieg het.

Eloff het die Suid-Afrikaanse regering se behandeling van motoriste tydens 'n voorval op die N1-snelweg wat VIP-polisie betrek het, bevraagteken.

Akademiese publikasies

Eloff se eweknie-beoordeelde akademiese publikasies sluit die volgende in:

• Eloff, Daniël; Lamey, Albert (2025). "Die regsgeldigheid van strafbepalings in die COVID-19-regulasies: 'n akademiese ondersoek". LitNet Akademies. 22 (2). doi:10.56273/1995-5928/2025/j22n2e1.

• Eloff, D; Eloff, C (2025). "The rights of graduate medical practitioners and reforming community service non-placements". South African Medical Journal. 115 (6). doi:10.7196/samj.2025.v115i6.3094. ISSN 2078-5135.

• Eloff, Daniël (2023). "The nature of rights and access to the internet". Obiter. 44 (1): 33–49. doi:10.17159/obiter.v44i1.12594.

• Eloff, Daniël (2022). "Children's Rights and Participation in School in South Africa". In Tonon, Graciela (red.). Re-defining Children’s Participation in the Countries of the South. Berlin: J.B. Metzler. doi:10.1007/978-3-662-64167-5_5. ISBN 9783662641668.

• Eloff, Daniël (2021). "The rationality test in lockdown litigation in South Africa". African Human Rights Law Journal. 21 (2): 1157–1180. doi:10.17159/1996-2096/2021/v21n2a46.