Dolby Atmos

in Wikipedia, die vrye ensiklopedie
Jump to navigation Jump to search
Die amptelike Dolby Atmos-kenteken
Dolby Atmos-skerm in SoundFirm se naproduksieklankateljee in Port Melbourne, Australië

Dolby Atmos is 'n nuwe driedimensionele omringklank-tegnologie wat in April 2012 deur Dolby Laboratories aangekondig is en naas gewoonlike oudiokanale gebruik maak van twee nuwe konsepte:

  • oudio-voorwerpe en
  • plafon-luidsprekers.

In 'n Dolby Atmos-klankstelsel is klank nie beperk tot kanale nie, maar kan - waar nodig - op 'n spesifieke manier vry beweeg in 'n driedimensionele ruimte om die luisteraar te omhul. Alle groot Hollywood-rolprentateljees het die nuwe formaat as standaard aanvaar, net soos meer as 3 200 rolprentteaters wêreldwyd.[1]

Dolby Atmos was aanvanklik slegs op kommersiële rolprentteaters gemik, maar intussen is 'n aangepaste weergawe ook vir privaat tuisteaterstelsels beskikbaar en word Blu-ray- en UHD Blu-ray-skywe met Dolby Atmos-klankbane vervaardig. Gewilde flieks soos La La Land en Blade Runner 2049 asook televisiereekse soos HBO se Game of Thrones (vanaf seisoen 5) word van dié omringklankformaat voorsien (in tuisteaterstelsels sonder Dolby Atmos-dekodeerders en plafonluidsprekers word die klankbaan as Dolby TrueHD verwerk). Dolby Atmos-omringklank word ook deur aanlynverskaffers van televisie-programme aangebied soos Netflix, VUDU en Maxdome[2].

Dolby Atmos is intussen ook beskikbaar vir Windows 10, tabletrekenaars met Android-bedryfstelsels, slimfone soos Samsung Electronics se Galaxy S9/S9 Plus en Microsoft se Xbox. Die nuwe bedryfstelsel vir Apple se Apple TV 4K-toestel, tvOS 12, sal later in 2018 vir Dolby Atmos gesertifiseer word. Daar is twee mededingers op die mark: die Kaliforniese onderneming DTS, Inc. se DTS:X- en die Belgiese Auro Technologies se Auro-3D-omringklankformaat.

Tegnologie[wysig | wysig bron]

Die nuwe formaat maak voorsiening vir 'n onbeperkte aantal klankbane sodat rolprentteaters die klankseine van 'n film volgens 'n optimale en dinamiese manier op alle beskikbare luidsprekers kan opdeel. Die eerste generasie-hardeware, die Dolby Atmos Cinema Processor ("Dolby Atmos Rolprentteater-verwerker"), kan tot by 128 enkele klankbane en tot by 64 verskeie onafhanklike luidsprekerseine verwerk.

Dolby Atmos is versoenbaar met ouer omringklankformate soos 5.1 of 7.1. Maar terwyl hierdie ouer stelsels gebruik maak van luidsprekerreekse wat almal dieselfde klanksein weergee, kry elke luidspreker met Dolby Atmos sy eie, indiwiduele klanksein. Rolprentteaters kan dus 'n groot aantal bykomende voorkanaal-, omringklank- of plafon-luidsprekers installeer. Sodoende kan enige klanksein op 'n presiese manier in die rolprentteatersaal geposisioneer word om byvoorbeeld die geluid van reën of helikopters te simuleer. Die klankgehalte sal dieselfde vir alle kykers wees, ongeag waar hul sitplekke in die teater geleë is. Met ouer omringklankstelsels kon slegs kykers op sitplekke in die middel van die teater die beste klankgehalte geniet.

Dolby Atmos-dekodeerders vir tuisteaterstelsels word van 'n Dolby omringklank-opmenger vir ouer oudioformate voorsien.

Verwysings[wysig | wysig bron]

Eksterne skakels[wysig | wysig bron]

Media (koptelefoon word aanbeveel)