Duggan-Cronin-versameling

in Wikipedia, die vrye ensiklopedie
Jump to navigation Jump to search
Die Duggan-Cronin Galery in Kimberley
Binnekant van die Duggan-Cronin Galery

Die Duggan-Cronin-versameling bestaan uit ongeveer 8 000 foto's wat die swart volkere van Suider-Afrika en hul leefwyse in stamverband in die eerste helfte van die 20ste eeu uitbeeld. Hierdie foto's is geneem kort voordat die Westerse kultuur sy stempel so op die Afrika-samelewings begin afdruk het, dat die tradisionele Afrika-kulture begin verdwyn het. Die foto's is dus uniek omdat dit nie weer gemaak kan word nie en daarom wek dit die belangstelling van kultuur-historici, volkekundiges, kunstenaars en fotograwe.

Alfred Martin Duggan-Cronin, 'n Ierse immigrant, het vanaf 1897 by die De Beers Maatskappy in Kimberley gewerk. Sy stokperdjie was om foto's te neem van die swart mynwerkers voordat hulle die Westerse kleredrag en lewenstyl aangeneem het. Later op reise in Suider-Afrika het hy hulle in hul huise in die afgeleë platteland besoek. Hy het nie slegs foto's van mense gemaak nie, maar ook van hul kleredrag, haarstyle, ornamente, volksgebruike, wapens, gesigsversierings, kralewerk, huttipes, rondawels, kleipotte, gereedskap, houtwerk, seremonies, bygelowe en rotskuns.

In 1924 en 1931 hou Duggan-Cronin uitstallings van sy foto's in Londen. Sy toenemende bekendheid lei tot finansiële steun. Vanaf 1929 is Richard Madela sy tolk en later fotografiese assistent. Op hul reise neem hulle foto's van die Zulu, Pondo, Koranna, Khoikhoi en Boesman van Suid-Afrika, die Betsjoeana van Botswana, die Basoeto van Lesotho, die Sjangaan van Mosambiek, die Barotse van Zambië en die Ovambo van Namibië. Duggan-Cronin laat dus 'n rekord na van byna elke groot bevolkingsgroep in Suider-Afria.

In Oktober 1939 skenk Duggan-Cronin sy versameling aan die stad Kimberley en vorm nou deel van die McGregor Museum. Dit is later jare aangevul met 'n versameling foto's geneem deur Jack Arnold van die amaXhosa sowel as 'n versameling Afrika-musiek. Die museum het 'n reeks van 7 boeke uitgegee getiteld Bantu tribes of South Africa: reproductions of photographic studies (1928-41) waarin hierdie versameling gebruik is.

Let wel[wysig | wysig bron]

Ander soortgelyke versamelings van kultuur-historiese belang vir Suid-Afrika is die Gordon-versameling, Elliott-versameling, Gribble-versameling, Ravenscroft-versameling, Sammy Marks-fotoversameling en die Morrison-versameling.

Bibliografie[wysig | wysig bron]

  • Fransen, Hans: Guide to the museums of Southern Africa. Kaapstad: Southern African Museums Association, 1978.
  • Humphreys, Basil: The Duggan-Cronin Bantu Gallery, Kimberley. In Lantern, jaargang 11, nr. 2. Desember 1964.
  • Naweek. Die Burger, 28 Junie 2014.
  • Standard Encyclopaedia of Southern Africa, deel 4. Kaapstad: Nasou, 1971. ISBN 0-625-00320-9

Koördinate: 28°44′52″S 24°46′54″O / 28.7479°S 24.7816°O / -28.7479; 24.7816