Elliott-versameling

in Wikipedia, die vrye ensiklopedie
Jump to navigation Jump to search
Arthur Elliott

Die Elliott-versameling bestaan uit foto's wat in die periode tussen 1900 en 1938 hoofsaaklik in die Kaapse skiereiland en Boland geneem is. Daar is foto's van straattonele, Kaaps-Hollandse huise, plaasopstalle, slaweklokke, werfmure, kerke, watermeulens, meubels, porselein, silwerware, landskappe en historiese gebeurtenisse. Hierdie foto's word onder die waardevolste fotoversamelings in die wêreld gereken en is vir die publiek te besigtig by die argief in Roelandstraat, Kaapstad en by sekere ander staatsargiewe.

Arthur Elliott (Boston, VSA 1870 – Kaapstad, 20 Nov. 1938) kom in 1880 in Suid-Afrika aan. Vroeg in 1900 vlug hy weens die Tweede Vryheidsoorlog na Kaapstad. Bloot per toeval maak hy kennis met die fotografie wat sy lewenstaak sou word. Sy oudste foto's is van Boere-krygsgevangenes in Groenpunt. Hy spesialiseer in foto's wat die land se verlede illustreer. Ook maak hy foto's van skilderye, etse en tekeninge in privaat besit. Verder versamel hy negatiewe van mense wat vroeër foto's geneem het.

Vir meer as 30 jaar is hierdie vrygesel 'n vryskutfotograaf met 'n eenvoudige ateljee by Langstraat 134. 'n Gedenkplaat is daar aangebring. In sy loopbaan hou hy vyf uitstallings en maak 'n bestaan uit die verkoop van afdrukke van sy werk.

Elliott het sy versameling swak georden. Selfs het hy nie altyd gemeld waar en wanneer die foto geneem is nie. Nogtans is hierdie unieke versameling foto's van groot kultuur-historiese en argitektoniese waarde vir die mense van Suid-Afrika. Sy hele versameling van 10 000 negatiewe (meesal op glas) is nou deeglik geklassifiseer en geïndekseer en tot nasionale gedenkwaardigheid verklaar.

Ander soortgelyke versamelings is die Gordon-versameling, Gribble-versameling, Ravenscroft-versameling, Duggan-Cronin-versameling, die Sammy Marks-fotoversameling en die Morrison-versameling.

Bibliografie[wysig | wysig bron]

  • Lantern, jaargang 20, nr. 2, Desember 1970.