Dumile Feni

Dumile Feni
Dumile Feni (links) en die Suid-Afrikaanse jazz-musikant Louis Moholo in Londen, 1971
Geboortenaam	Zwelidumile Geelboi Mgxaji Mslaba Feni
Gebore	21 Mei 1942 Withuis, Worcester, Kaapprovinsie, Unie van Suid-Afrika
Sterf	1991 New York, Verenigde State
Laaste rusplek	Lenasia, Suid-Afrika
Nasionaliteit	Suid-Afrika
Veld	Beeldende kunstenaar
Opleiding	Polly Street Kunssentrum in Johannesburg
Beïnvloed deur	Cecil Skotnes

Zwelidumile Geelboi Mgxaji Mslaba “Dumile” Feni (21 Mei 1942 – 1991) was ’n Suid-Afrikaanse kontemporêre beeldende kunstenaar wat vir sy sketse, skilerye en beeldhouwerke bekend was. Hy word as een van die pioniers van die sogenaamde township-kuns in Suid-Afrika beskou. Dumile se kuns is baie emosioneel en is 'n regstreekse kommentaar op die destydse Apartheidsbeleid in Suid-Afrika. Hy het ook modelleerwerk, veral figure in terra-cotta, gedoen.

Dumile is in 1942 in Worcester in die Wes-Kaap gebore. Sy moeder is oorlede toe hy 6 jaar oud was en hy het saam met sy gesin eers na Kaapstad en 5 jaar later na Johannesburg verhuis. Sy uitsonderlike kunstalent is egter eers in 1964 "ontdek" terwyl hy mediese behandeling in 'n Johannesburgse hospitaal ontvang het. 'n Jaar later het hy sy eerste eenmanuitstalling gehou en in 1967 het hy Suid-Afrika op die Sao Paulo-Biënnale verteenwoordig. Hy is in 1968 na die buiteland en het nie na Suid-Afrika teruggekeer nie.

Hoewel Dumile 'n goeie beeldhouer is, is hy beter bekend om sy grafiese werk. Die meeste van sy werk is 'n weerspieëling van die Swartman se soeke na identiteit te midde van die sosiale probleme wat in die township-Iewe ervaar is. Sy werk is vol emosie en in 'n mate morbied. Sy innerlike en fisieke belewenisse word deur middel van die houding en struktuur van die menslike liggaam uitgebeeld. Baie van sy werke bevat ook elemente van 'n universele begeerte om na die verlede of 'n landelike bestaan terug te keer. AI sy werke bevat 'n bepaalde vitaliteit, wat daarop dui dat dit ten tyde van sterk emosionele gevoelens geskep is. Daar is dikwels 'n algehele gebrek aan dieptewerking in sy tekeninge, wat alle elemente van realiteit uitsluit en die simboliese betekenis van die kunswerk benadruk.

Hy het tussen 1968–1991 in selfopgelegde ballingskap in onder andere Londen, Los Angeles en New York gewoon.

Van sy werk is in talle private versamelings asook in die Nasionale Kunsgalery in Kaapstad, die Durbanse Kunsgalery en die Pretoriase Kunsmuseum opgeneem. Sy werk word ook in versamelings in die VSA, Brittanje, België, Swede, Israel en ander oorsese lande waar hy besoek afgelê het, verteenwoordig.

Bronnelys

• Wêreldspektrum, Vol. 20, 29, ISBN 0 908409 61 3