Emma Louw

in Wikipedia, die vrye ensiklopedie
Jump to navigation Jump to search

Emma Louw (* 7 Februarie 1917, Ermelo – onbekend) is een van die eerste vroulike Afrikaanse joernaliste en digters. In die 1940's skryf sy tydskrifpoësie onder die skuilnaam C. en onder haar getroude naam, Emma Horn, doen sy ook belangrike genealogiese navorsing.

Lewe en werk[wysig | wysig bron]

Emma Louw is op 7 Februarie 1915 op Ermelo gebore, die jongste kind en enigste dogter van Charles Robert Louw en Maria Gesina Stolp.[1] Sy het drie ouer broers, Andries Adriaan, Charles Robert Murray en Jacob Stolp. In 1916 verhuis die gesin na Kaapstad en sewe jaar later na die plaas Dennegeur naby Somerset-Wes.[2] Haar skoolopleiding ontvang sy aan die Laerskool Somerset-Wes en die Hoërskool Hottentots-Holland. Sy studeer verder aan die Universiteit van Stellenbosch, waar sy ’n B.A.-graad behaal. Hierna reis sy na die buiteland en bring feitlik ’n jaar in Duitsland deur, waar sy die musiekseisoen in Berlyn en die wintersport in die berge ervaar. Na haar terugkeer na Suid-Afrika aanvaar sy in 1937 ’n betrekking as redaksielid van Die Burger in Kaapstad, waar sy vir twee jaar werk. In 1940 gaan bly sy ’n tyd lank by haar ouers op die familieplaas, waarna sy na Johannesburg verhuis en ’n betrekking by Die Transvaler aanvaar. Hier ontmoet sy vir Gideon Jozua Horn, met wie sy in 1943 trou en die egpaar verhuis later terug na Kaapstad. Twee dogters word uit die huwelik gebore, onder wie Hester Magdalena op 9 Mei 1949. Sy slyt haar laaste jare in ’n ouetehuis in Kaapstad.

Skryfwerk[wysig | wysig bron]

Sy skryf tydskrifpoësie in die veertigerjare onder die skuilnaam C. en publiseer Venster in die stad in 1947. Dit bevat hoofsaaklik stemmingsverse oor die heimwee en eensaamheid in die stad. Die oorheersende tema is ’n jong liefde wat smag na vervulling, met die verlange om uit die stad terug te keer na die natuur. Hoewel die verse tref deur hulle openhartigheid, ontbreek dit aan werklik diepgaande inhoud.[3] Van haar gedigte word opgeneem in Gerrit Komrij se bloemlesing Die Afrikaanse poësie in ’n duisend en enkele gedigte.

Onder haar getroude naam spits sy haar later toe op genealogiese navorsing en verskeie werke in hierdie genre verskyn van haar, insluitende Ds. A.A. Louw (1827–1908) en sy gesin, Louw-stamregister: Johannes Rudolph en sy afstammelinge, Murray-stamregister (1794–1954) en Dirk Louw en Jacob Stolp en hul afstammelinge. Al hierdie werke word by die Genealogiese Instituut van Suid-Afrika gehuisves.[4]

Publikasies[wysig | wysig bron]

Emma Louw[wysig | wysig bron]

  • 1947 Venster in die stad

Emma Horn[wysig | wysig bron]

  • 1956 Murray-stamregister (1794–1954)
  • 1967 Louw-stamregister
  • 1974 Ds. A.A. Louw (1827–1908) en sy gesin
  • 1991 Dirk Louw en Jacob Stolp en hul afstammelinge

Verwysings[wysig | wysig bron]

Boeke[wysig | wysig bron]

  • Antonissen, Rob “Die Afrikaanse letterkunde van aanvang tot hede” Nasou Beperk Derde hersiene uitgawe Tweede druk 1964
  • Dekker, G. “Afrikaanse Literatuurgeskiedenis” Nasou Beperk Kaapstad Elfde druk 1970
  • Kannemeyer, J.C. “Geskiedenis van die Afrikaanse literatuur 2” Academica, Pretoria, Kaapstad en Johannesburg Eerste uitgawe Eerste druk 1983
  • Nienaber, P.J.; Senekal, J.H en Bothma, T.C. “Mylpale in die geskiedenis van die Afrikaanse letterkunde” Afrikaanse Pers-Boekhandel Tweede hersiene uitgawe 1963
  • Nienaber, P.J. et al “Perspektief en Profiel” Afrikaanse Pers-Boekhandel Johannesburg Derde hersiene uitgawe 1969
  • Van Coller, H.P. (red.) “Perspektief en Profiel Deel 2” J.L. van Schaik-Uitgewers Pretoria Eerste uitgawe 1999

Ander verwysings[wysig | wysig bron]