Eschborn

in Wikipedia, die vrye ensiklopedie
Jump to navigation Jump to search
Eschborn
Die stadsilhoeët van Eschborn
Die stadsilhoeët van Eschborn
Official seal of Eschborn
Seël
Ligging in die deelstaat Hesse
Ligging in die deelstaat Hesse
Ligging van Eschborn op 'n kaart (Duitsland)
Eschborn
Eschborn
Ligging in Duitsland
Koördinate: 50°08′N 08°35′O / 50.133°N 8.583°O / 50.133; 8.583Koördinate: 50°08′N 08°35′O / 50.133°N 8.583°O / 50.133; 8.583
Land Vlag van Duitsland Duitsland
Deelstaat Hesse
Administratiewe streek Darmstadt
Administratiewe distrik Main-Taunus-Kreis
Stadstatus 1970
Regering
 - Burgemeester Mathias Geiger (FDP, verkies as onafhanklike kandidaat)
Oppervlak
 - Stad 12,14 km²  (4,7 vk m)
Hoogte 138 m (453 vt)
Bevolking (31 Desember 2016)
 - Stad 21 228[1]
 - Digtheid 1 748/km² (4 527,3/myl2)
Tydsone MET (UTC+1:00)
 - Somer (DST) MEST (UTC+2:00)
Poskode 65760
Skakelkode(s) 06196, 06173
Webwerf: www.eschborn.de

Eschborn is 'n stad in die distrik Main-Taunus-Kreis van die Duitse deelstaat Hesse met 'n bevolking van sowat 21 000. Die stad is in die metropolitaanse gebied van Frankfurt am Main geleë en grens in die noorde aan Kronberg im Taunus en Steinbach (Taunus), in die ooste en suide aan Frankfurt en in die weste aan Schwalbach am Taunus.

Nog tot die einde van die 19de eeu was Eschborn 'n klein nedersetting in die Vordertaunus, 'n streek in die Taunus-bergreeks van Suid-Hesse. Sy bloeitydperk het met die bou van 'n spoorlyn tussen Frankfurt en Kronberg in 1874 begin. Die bevolking het in die volgende eeu vertiendubbel. In 1970 het Eschborn stadstatus gekry, en twee jaar later is die stad met die naburige Nierderhöchstadt saamgesmelt.

Vanaf die 1960's het die plaaslike owerheid die vestiging van ondernemings in Eschborn bevorder en van die stad een van die aantreklikste en welvarendste sakegebiede in Duitsland gemaak - met 'n stadshorison wat deur groot kantoorgeboue oorheers word. Vandag is daar meer as 30 000 werkgeleenthede in Eschborn. Selfs die meeste medewerkers van Frankfurt se Effektebeurs het hul kantore intussen in Eschborn, al bly Frankfurt die amptelike setel van die beurs.

Geskiedenis[wysig | wysig bron]

Middeleeue en vroeë moderne tydperk[wysig | wysig bron]

Die eerste gedokumenteerde verwysing na Eschborn as Aschenbrunne kom in 'n skenkingsoorkonde van die Lorsch-klooster van 770 voor. Die pleknaam beteken "Fontein by die esboom". Een van die vroegste gedokumenteerde gebeurtenisse in Eschborn is 'n oorstroming op 3 Julie 875 waartydens groot vloedskade in die dorp ondervind is en 88 inwoners asook byna al die vee verdrink het.

Eschborn se toringkasteel, wat in die 11de eeu ontstaan het, word later met die Here van Eschborn verbind wat vir die eerste keer in dokumente uit die laat 12de en vroeë 13de eeu genoem word. As ryksleen was Eschborn in besit van die Here van Kronberg, totdat dié dinastie in 1704 in sy manlike linie uitgesterf het en hul besittings onder die bewind van die Keurvorstedom Mainz gekom het.

In die laat 14de eeu is Eschborn deur die oorlog geraak wat die Rynse Stedeverbond teen die Paltsgraaf gevoer het. In 1389 het Frankfurtse magte 'n aanval op die ridders van Kronberg geloods. In die slag van Eschborn, wat in 1389 plaasgevind het, het die Kronbergers sam met hul bondgenote (die Paltsgraaf en Hanau) 'n oorwinning behaal en talle vyandelike troepe gevange geneem, waaronder die burgemeester van Frankfurt, wat eers teen betaling van die destyds ongelooflike losprys van 73 000 gulden weer vrygelaat is.

Tydens die Dertigjarige Oorlog het naby Höchst gevegte tussen generaal Tilly en Christian von Braunschweig plaasgevind waartydens die ou kasteelkompleks en byna die hele dorp vernietig is.

19de eeu[wysig | wysig bron]

Volgens die bepalings van die Vrede van Lunéville het die Kronberg-gebied in 1801 onder die bewind van die vors van Nassau-Usingen gekom. Vyf jaar later is Kronberg en Niederhöchstadt by die nuutgestigte Hertogdom Nassau ingesluit. Met die anneksasie van Nassau ná die Duitse Oorlog in 1866 het Eschborn en Niederhöchstadt Pruisies en, met die stigting van die Duitse Keiserryk vyf jaar later, deel van die nuwe Duitse eenheidstaat geword. Op 19 Augustus 1874 is Eschborn se eerste spoorlyn ingewy toe dit deel geword het van die spoorroete tussen Rödelheim en Kronberg.

Eschborn as militêre basis[wysig | wysig bron]

Slegs een van die vroeëre vliegtuighangars in Eschborn het bewaar gebly. Intussen het herbebossing in die gebied plaasgevind wat tans deel uitmaak van die Arboretum Main-Taunus met 600 boom- en struikspesies

Op 1 Januarie 1939 het die boubedrywighede vir die militêre vliegveld Frankfurt-Sossenheim begin wat later as Fliegerhorst Eschborn bekendgestaan het. Die vliegveld is egter nooit voltooi nie en het aanvanklik slegs uit 'n groot weiveld en enkele houtbarakke bestaan. Later is vliegtuighangars van steen bygevoeg waarvan een bewaar gebly het. Die vliegveld was tydens die hele Tweede Wêreldoorlog in bedryf en is hoofsaaklik vir opleidingsdoeleindes gebruik.

Nadat die vliegveld in 1945 deur Amerikaanse magte ingeneem is, het dit tussen April en Mei van dié jaar nog as basis vir laaste lugoperasies gedien. Geasfalteerde aanloop- en landingsbane het eers in die Amerikaanse besettingstyd ontstaan, en so kon die vliegveld ná die oorlog 'n tyd lank as uitwyklughawe dien terwyl die lughawe in Frankfurt am Main heropgebou is. Met die heropening van Frankfurt se lughawe is alle vlugbedrywighede in Eschborn gestaak.

Op die vliegveldterrein, wat gedeeltelik in Schwalbach geleë is, het met Camp Eschborn 'n Amerikaanse militêre basis ontstaan waar pioniereenhede gestasioneer was. Ná die onttrekking van Amerikaanse magte is die terrein deur die stad Eschborn gekoop en tot 'n besigheidspark (Camp Phönix Park) omgeskep.

Ekonomie[wysig | wysig bron]

Talle groot nasionale en internasionale ondernemings het hul kantoorgeboue in Eschborn se sakedistrik gevestig en die stadsilhoeët ingrypend verander

Eschborn trek voordeel uit sy ligging net buite Frankfurt am Main asook laer belastingtariewe vir ondernemings. 'n Treinrit met elektriese pendelaarstreine vanaf die Mainmetropool se hoofstasie neem slegs enkele minute. So het talle ondernemings meer as 30 000 werkgeleenthede in Eschborn geskep wat hoofsaaklik in die suidelike besigheidspark (Gewerbegebiet Süd) asook in groot- en kleinhandelondernemings aan die stad se ooste- en westekant saamgetrek is.

Die meeste ondernemings, wat byna 90 persent van alle werksgeleenthede verteenwoordig, is in die dienstesektor bedrywig wat deur ondernemings soos Vodafone, Deutsche Bank, Deutsche Börse (Duitse Effektebeurs), VR Leasing, Siemens, Deutsche Telekom, Ernst & Young, IBM, Techem en Randstad Deutschland oorheers word. Die Suid-Koreaanse elektronikareus LG Electronics het sy Europese en Duitse hoofkwartiere, wat voorheen in respektiewelik Londen en Ratingen naby Düsseldorf gesetel was, in 2016/17 na Eschborn verskuif.[2]

Verwysings[wysig | wysig bron]