Main-Taunus-Kreis

in Wikipedia, die vrye ensiklopedie
Main-Taunus-Kreis
Wapen Ligging in Duitsland
Basiese gegewens
Deelstaat: Hesse
Administratiewe setel: Hofheim am Taunus
Oppervlakte: 222,39 vk km
Bevolking: 226 113 (31 Desember 2012)
Bevolkingsdigtheid: 1017 inwoners per vk km
Kenteken: MTK
Administratiewe verdeling: 12 munisipaliteite
Landrat: Michael Cyriax (CDU)
Amptelike webwerf: mtk.org
Ligging in Hesse

Die Main-Taunus-Kreis is 'n administratiewe distrik in die Duitse deelstaat Hesse. Die grootste nedersetting en administratiewe setel is Hofheim am Taunus. Die distrik, wat in die sentrum van die metropolitaanse gebied Rhein-Main en net wes van Frankfurt am Main en oos van die deelstaathoofstad Wiesbaden geleë is, is ten opsigte van sy oppervlak die kleinste in Duitsland, maar tegelykertyd die mees digbevolkte.

In sy huidige vorm bestaan die distrik sedert 1928. Die geskiedenis van die gebied strek egter terug tot die antieke tydperk toe die Romeinse leër 'n fort in Hofheim opgerig het. Ander aregeologiese vondse dateer selfs van ouer periodes.

Die bouvalle van die kasteel Eppstein in die gelyknamige dorp

Die Main-Taunus-Kreis staan bekend vir die baie hoë prysvlak van sy huureiendomme en 'n per-capita-koopkrag wat onder die vyf hoogstes in Duitsland gereken word. In 2014 was die koopkragindeks 138 persent van die gemiddelde vir Duitsland, of €29 178 per inwoner.[1] Die distrik het sy ekonomiese welvaart aan die nabyheid van Frankfurt am Main en die Frankfurtse Rhein-Main-lughawe te danke. Ook belangrike federale snelweë loop deur die gebied.

'n Aantal groot maatskappye het sy Duitse hoofkwartiere of ander belangrike kantore en geriewe in die distrik, veral in stede soos Eschborn (Vodafone) en Schwalbach am Taunus (Samsung). Belangrike toeriste-aantreklikhede sluit herstellingsoorde soos Bad Soden, die beboste valleie van die Taunusrivier met die middeleeuse kasteel Eppstein, die aantreklike landskappe langs die Mainrivier en die wingerde van Hochheim am Main en Flörsheim waar 'n wêreldbekende witwyn, die Rheingauer Riesling, geproduseer word.

Die gebied is gewild by staptoeriste. Twee belangrike roetes loop deur die distrik - die middeleeuse Bonifatius-roete volg die voetspore van die 8ste eeuse roustoet van Sint Bonifatius wie se sterflike oorskot vanuit Mainz na Fulda geneem is. Die "Roete van nywerheidskultuur" loop langs monumente uit die industriële geskiedenis van die streek.

Dorpe en Munisipaliteite[wysig | wysig bron]

Dorpe en munisipaliteite in in Main-Taunus-Kreis
Dorpe Munisipaliteite
  1. Bad Soden
  2. Eppstein
  3. Eschborn
  4. Flörsheim
  5. Hattersheim am Main
  6. Hochheim
  7. Hofheim
  8. Kelkheim
  9. Schwalbach am Taunus
  1. Kriftel
  2. Liederbach am Taunus
  3. Sulzbach

Verwysings[wysig | wysig bron]

  1. "www.gfk.com: GfK Kaufkraft Deutschland 2014". Geargiveer vanaf die oorspronklike op 5 April 2014. Besoek op 21 April 2014.