Fietsry Suid-Afrika

in Wikipedia, die vrye ensiklopedie
Jump to navigation Jump to search
Fietsry Suid-Afrika
Engelse naam Cycling South Africa
Afkorting CSA
Land Vlag van Suid-Afrika Suid-Afrika
Sportsoorte Padfiets, Baanfiets, Bergfiets, BMX, Parafietsry
Stigting 1892
Lid van UCI
Vastelandse beheerliggaam Confédération Africaine de Cyclisme
President Ciska du Plessis-Austin
Sekretaris-generaal Elton Davids
Setel Kaapstad, Suid-Afrika
Amptelike taal Engels
Amptelike webwerf cyclingsa.com

Fietsry Suid-Afrika (Engels: Cycling South Africa[1] afgekort as CSA) is die Nasionale Federasie wat alle dissiplines van fietsry in Suid-Afrika beheer en reguleer. FSA is geaffilieer by die UCI[2][3] en ook by die Afrikafietsrykonfederasie: Confederation Africaine de Cyclisme (CAC).

FSA beheer die volgende vyf dissiplines naamlik:

Geskiedenis van FSA[wysig | wysig bron]

Die Suid-Afrikaanse Fietsryvereniging is in 1892 gestig en op 9 September 1893 was die eerste Suid-Afrikaanse Kampioenskap gehou. Die FSA het aangesluit by die International Cycling Association in 1894. In 1905 het die S.A. Fietsryvereniging en S.A. Atletiekvereniging saamgesmelt en vir 53 jaar lank saam die twee sporte bedryf.

Gedurende 1958 het die twee sporte elkeen sy eie pad gevolg en is die Suid-Afrikaanse Fietsryfederasie gestig en het ook geaffilieer by UCI.

FSA se hoofkantoor is in Kaapstad.

Funksies van FSA[wysig | wysig bron]

Suid-Afrikaanse fietsryer Ryan Cox in 2005

Die FSA moet toesien dat die nasionale kampioenskappe vir elke dissipline jaarliks plaasvind, dat die nasionale spanne aangewys word soos en wanneer nodig, dat die nasionale truie ontwerp word en dat elke provinsie (affiliaat) se huis in orde is. FSA het die alleenreg op die Nasionale fietsrytitels. Nasionale kampioene se truie het 'n groen en goue band om die lyf en moue se some.

Alle fietrsryers moet by FSA registreer d.m.v. 'n lisensie. FSA is ook verantwoordelik vir die opleiding van Commissaires en beamptes soos benodig mag word. Hulle is ook verantwoordelik vir die daarstelling van 'n nasionale fietsrykalender vir al die dissiplines.

Olimpiese Spele[wysig | wysig bron]

FSA moet toesien dat Suid-Afrika verteenwoordig word op die Olimpiese Spele en om die doel te bereik is dit by SASKOK geaffilieer.

Toer van Suid-Afrika[wysig | wysig bron]

Elke fietsryland het 'n Nasionale toer en die Tour de France is seker die bekendste toer in die wêreld. Die Rapport Toer (1973–1999) was altyd Suid-Afrika se enigste internasionale toer. Na 'n lang afwesigheid van internasionale toere het FSA gedurende 2011 die "Tour of South Africa" aangebied. Hierdie toer was deur die UCI goedgekeur. Die toer was baie goed ondersteun deur die internasioale ryers omrede dit gedurende die noordelike halfrond se winter geskied en geleentheid vir die jaers gee om te oefen en voor te berei vir die komende Europese fietsryseisoen.

Bekende Suid-Afrikaanse Fietsryers[wysig | wysig bron]

Suid-Afrika se eerste wêreldkampioen is in 1893 gekroon toe Laurens Meintjes die 100-mylwedren gewen het in Chicago. Hy het voortgegaan en 16 nuwe wêreldrekords opgestel. Hy was Suid-Afrika se eerste wêreldkampioen in enige sportsoort.

Jack Rose was Suid-Afrika se tweede wêreldrekordhouer; hy het dit opgestel gedurende 1897 in die 25-mylwedren. Tydens die Olimpiese Somerspele 1912 te Stockholm het Rudolph "Okey" Lewis Suid-Afrika se eerste goue medalje ooit vir fietsry gewen in die 320 km tydtoets. Sy tyd was 10 uur, 42 min. 39 sek.

Ertjies Bezuidenhout (geb.13 Oktober 1955; oorl. 29 Februarie 2012) het die Rapport Toer in 1984 gewen en het ook die Argus-fietswedren drie keer gewen in 1981, 1982 en 1986. Ertjies was 'n sterk klimmer en het die Koning van die Berge-titel verskeie kere gewen in die Rapport Toer.

Greg Minnaar het gedurende 2001 en 2012 die afdraande veldwedren (DHI) formaat wêreldkampioenskap gewen en Burry Stander het gedurende 2009 die onder-23 bergfiets (XCO) formaat wêreldkampioenskap gewen.

Robbie Hunter is die eerste Suid-Afrikaner wat aan die Tour de France (2001) deelgeneem het en ook die eerste Suid-Afrikaner wat 'n skof kon wen gedurende die 2007 Tour de France. Daryl Impey is die eerste Suid-Afrikaner wat die geeltrui gedra het tydens die 2013 Tour de France.

Erica Green is die eerste vrou wat Suid-Afrika verteenwoordig het op 'n Olimpiese Spele.

Verwysings[wysig | wysig bron]

  1. Fietsry Suid-Afrika se amptelike webtuiste
  2. UIC se webtuiste
  3. UCI Regulations – Part 1: General Organisation of Cycling as a Sport

Eksterne skakels[wysig | wysig bron]