Frederick Dalberg

in Wikipedia, die vrye ensiklopedie
Jump to navigation Jump to search
Frederick Dalberg
GeboortenaamFrederick Dalrymple
Geboorte7 Januarie 1907
Newcastle upon Tyne, Engeland
Afsterwe9 Mei 1988
Suid-Afrika
Beroep(e)Sanger
Genre(s)Opera
Tipe stemBas
Portal.svg Musiekportaal
Die Zauberflöte, die towerfluit (opera)

Frederick Dalberg (1907—1988) was 'n operasanger wat as bas hoë aansien in die buiteland verwerf het. Vir sy bydrae tot die Duitse opera en oratorium is die titel "Kammersänger" in Duitsland aan hom toegeken. Hy is ook in die tweede uitgawe van "Unvergängliche Stimmen" opgeneem. Die Dalberg-beurs vir jong Suid-Afrikaanse sangers is in 1988 tot sy nagedagtenis ingestel.[1]

Lewensloop[wysig | wysig bron]

Dalberg (gebore Frederick Dalrymple) is op 7 Januarie 1907 in Newcastle upon Tyne, Brittanje, gebore. Op twaalfjarige ouderdom het sy ouers na Suid-Afrika geïmmigreer en hulle in Pretoria gevestig, waar hy jare lank in die koor van die St. Alban-katedraal was. Op negentienjarige leeftyd het hy sanglesse by Ernesto Ferri in Johannesburg begin neem, en in 1930 het hy na Dresden vertrek om verder in sang te studeer. In 1931 is hy in Leipzig vir drie jaar aangestel as eerste bas, en in 1946 het hy die hoofbas van die Staatsopera in München geword. In 1951 is hy in dieselfde pos by Covent Garden aangestel. Hy het in 1957 bedank en eerste bas geword by die operahuis in Mannheim, waar hy tot met sy aftrede in 1970 gebly het. Hy was vanaf 1970 deeltydse lektor in sang aan die Konservatorium vir Musiek van die Universiteit van Stellenbosch en sangadviseur by Kruik.

Frederick Dalberg was as sanger hoog aangeskrewe in die buiteland en het gereeld saam met beroemdes opgetree, onder andere saam met Maria Callas en Ebe Stigniani in Norma in Govent Garden en in talle Wagner-rolle by Bayreuth met Herbert von Karajan as dirigent. Terwyl hy aan Govent Garden verbonde was, het hy ook in die premières van Benjamin Britten en William Walton se werke opgetree.

Sy optredes in Suid-Afrika was beperk tot 'n paar operarolle, onder meer as Sarastro in Die Zauberflöte (Die Towerfluit) van Mozart tydens die Uniefees in Bloemfontein in 1960, Opsa se produksie van Der Wildschütz en Truk se Faust.

Dalberg was met die Duitse sopraan Ellen Winter getroud. Hulle dogter, Evelyn Dalberg (gebore 1939), het ook 'n operasanger geword. Hy is op 9 Mei 1988 in Suid-Afrika oorlede.[2]

Bronnelys[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8
  2. Laura Williams Macy. "The Grove Book of Opera Singers". Oxford University Press. p. 106. Dalberg [Dalrymple], Frederick