George Stephanus Malan

in Wikipedia, die vrye ensiklopedie
Ds. George Malan.

Ds. George Stephanus Malan (12 April 1861 op Wellington6 Desember 1931 in Kaapstad) was leraar in die Nederduitse Gereformeerde Kerk en redakteur van die Kerkorgaan, die Kerkbode.

Ds. Malan is aan Groenberg by Wellington gebore. Hy ontvang sy skoolopleiding op dié Bolandse dorp en verwerf in 1881 sy B.A.-graad aan die Victoria Kollege op Stellenbosch. Die volgende jaar word hy tot die Kweekskool toegelaat. Ná voltooiing van sy teologiese kursus en legitimasie op 27 Augustus 1885 is hy na die NG gemeente Barkly-Oos beroep en op 3 April 1886 daar georden en bevestig. Sy volgende gemeentes was Vredefort (1887), Montagu (1889), Bethulie (1895), Greytown (1897), Riebeek-Wes (1903) en Drieankerbaai (1911), waar hy bly tot in 1913.

In 1912 het die Kommissie van Bestuur van die Kerkbode hom beroep en aangestel as redakteur. In dié gewigvolle betrekking het ds. Malan "ons kerk groot dienste bewys, veral gedurende die jare van die Groot Oorlog, toe ook die Rebellie in die Unie uitgebreek het, en toe hy sodanige verstandige leiding aangegee het dat by sy aftrede die Kommissie sy groot waardering uitgespreek het van de grote diensten door Ds. Malan in een zeer moeilike tijd met voorzichtigheid en wijsheid aan die blad bewys."[1]

Ds. Malan het in 1918 om gesondheidsredes sy emeritaat aanvaar, maar was nog sterk en lewenslustig genoeg om die dienswerk in die Buitekantstraat-saal, Kaapstad, waar die latere NG gemeente Tafelberg afgestig is, te verrig. Ook in ander betrekkings, soos byvoorbeeld dié van sekretaris van die S.A. Taalbond en lid van die Sensorraad vir Bioskope het hy gedien.

Op 6 Desember 1931 sterf hy in die Volkshospitaal, Kaapstad, ná 'n operasie. Hy is beskryf as "een van die gaafste en edelste predikante in ons Kerk. Hy het in hom verenig verstandige deeglikheid met geestelike diepte en buitengewone teerheid en 'n geseënde gedagtenis nagelaat".[2]

Bronne[wysig | wysig bron]

  • Dreyer, eerw. A. Jaarboek van die Nederduits-Gereformeerde Kerke in Suid-Afrika vir die jaar 1933, Kaapstad: Jaarboek-Kommissie van die Raad van die Kerke, 1932.
  • Dreyer, eerw. A. Kerksouvenir van Wynberg, Gemeente-Eeuwfeest 1829–1929, Kaapstad, Stellenbosch en Bloemfontein: Nasionale Pers Beperk, 1929.

Verwysings[wysig | wysig bron]

  1. Dreyer, eerw. A. 1932. Jaarboek van die Nederduits-Gereformeerde Kerke in Suid-Afrika vir die jaar 1933, Kaapstad: Jaarboek-Kommissie van die Raad van die Kerke.
  2. Dreyer, eerw. A. 1932. Jaarboek van die Nederduits-Gereformeerde Kerke in Suid-Afrika vir die jaar 1933, Kaapstad: Jaarboek-Kommissie van die Raad van die Kerke.