Gereformeerde kerk Usakos

Die destydse Gereformeerde kerk Usakos is nou 'n Apostoliese kerk, maar die Gereformeerdes het nog lank een maal per maand hier 'n erediens gehou. Sedertdien gebruik hulle die ou NG kerksaaltjie.

Ds. H.A. van Dalsen, leraar van 1959 tot 1960 in kombinasie.

Die Gereformeerde kerk Usakos was ’n gemeente van die Gereformeerde Kerk in Suidwes-Afrika.

Van sy stigting op 14 November 1953, as die negende gemeente van die Gereformeerde Kerk in Suidwes-Afrika, tot die afstigting van Walvisbaai in 1956 het dié kortstondige gemeente bekendgestaan as Usakos-Walvisbaai. Einde 1958 het Usakos net 55 belydende lidmate gehad en Walvisbaai 27, maar twee jaar later het Usakos ontbind en Walvisbaai bly voortbestaan.

Usakos was dekades lank die middelpunt van die spoorweë in SWA met al die meganiese werkswinkels ens. daar. Dus was daar 'n behoefte aan 'n selfstandige gemeente. Kort ná die gemeente se stigting is die spoorweë se aktiwiteite geskuif na Walvisbaai en Windhoek, wat die gemeente laat doodloop het.

Sedert die stigting van Okahandja in 1978 was Usakos ’n deel van dié gemeente, tesame met Omaruru en Karibib, waar van 1972 tot 1982 die gemeente Erongo bestaan het. In 2014 is Usakos se sowat 20 lidmate deel van die Gereformeerde kerk Hentiesbaai.

Predikante

1. Van der Merwe, dr. Daniël Charl Stephanus, 1950–1957 (in kombinasie met Windhoek)
2. Van der Walt, Marthinus Wessel, 1955–1958 (in kombinasie met Otjiwarongo)
3. Van Dalsen, Hubrecht Anthonie, 1959–1960 (in kombinasie met Vanjaarsveld en Walvisbaai)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Aministratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.