Gereformeerde kerk Otjiwarongo

in Wikipedia, die vrye ensiklopedie
Gereformeerde Kerk
Otjiwarongo
Sluit in  Kalkfeld
Okakarara
Omaruru
Otjiwarongo
Klassis  Etosha
Huidige predikant(e)  vakant
Belydende lidmate  68
Dooplidmate  16
Adres H.v. Henk Willemsstraat
en Ramblersweg
Otjiwarongo
Geskiedenis
Stigtingsdatum  19 Maart 1955
Afgestig van  Outjo
Eerste predikant  M.W. van der Walt (1955–'58)
Die Gereformeerde kerk Otjiwarongo.
Ds. M.W. van der Walt was van 1955 tot 1958 Otjiwarongo se eerste predikant. Hy het die gemeente bedien in kombinasie met Grootfontein en Walvisbaai/Usakos.
Otjiwarongo se Gereformeerde kerk is ingewy op 28 Junie 1958.
Ds. E.W. Meyer (4 September 19203 Augustus 1998) en sy gesin. Hy was die leraar van 1959 tot 1965.
Die gemeente se kerkraad in 1981 by ds. Wijnbeek. Voor: Ouderling R. Wyma en mev. Gea Wyma (orrelis). Agter: Diaken D.J. Coetzee, ouderling L.A. Grobler en diaken W.C. Horn.
Ds. Dirk Wijnbeek, Otjiwarongo se leraar van 1977 tot 1983 en daarna van die Gereformeerde kerk Steynsburg van 1983 tot 2012.
Ds. Jan van der Walt, die predikant sedert 2015.

Die Gereformeerde kerk Otjiwarongo is die agtste oudste gemeente van die Gereformeerde Kerk in Namibië. Dit het van einde 2008 saam met nog vyf Namibiese gemeentes tot die Kerk se Klassis Waterberg behoort, terwyl die orige 13 gemeente deel was van die uitsluitlik Namibiese Klassis Etosha. In die loop van 2015 het Otjiwarongo egter teruggegaan na die Klassis Etosha. Die belydende lidmate het van 2014 tot 2015 afgeneem van 58 tot 44 en die dooplidmate van 18 tot ses.

Geskiedenis[wysig | wysig bron]

Die Gereformeerde lidmate op Otjiwarongo in die destydse Suidwes-Afrika is tot in 1954 bedien as 'n wyk van die Outjo, wat saam met Gobabis en Aranos in 1930 ontstaan het vanweë die repatriasie van 1 922 Afrikaners, oorlewendes en nasate van die Dorslandtrek, uit Angola, hoofsaaklik lidmate van die Gereformeerde Kerk. Op 19 Maart 1955 het Otjiwarongo van Outjo afgestig in 'n kombinasie-ooreenkoms met Grootfontein (waar die leraar 11 Sondae per jaar sou preek), Walvisbaai en Usakos (11 Sondae) en Otjiwarongo (22 Sondae). Ds. M.W. van der Walt was die eerste predikant van dié kombinasie. 'n Eie pastorie is in Junie 1956 betrek. Daar is ook besluit om 'n kerkgebou op te rig, want dienste is tot in daardie stadium in die saal van die Hoërskool Otjiwarongo of die Hervormde kerk gehou. Op 28 Junie 1958 is die eerste eie kerkgebou in gebruik geneem.

Nadat ds. Van der Walt in 1958 'n beroep na Krugersdorp-Wes aangeneem het, is 'n nuwe predikant, ds. E.W. Meyer, 'n seun wat op Gobabis grootgeword het en die seun van wyle Ernst Meyer, Suid-Afrika se konsul in Angola, beroep en in Maart 1959 hier bevestig. Daar het letterlik sewe maer jare vir die gemeente aangebreek omdat dit finansieel moeilik gegaan het, al was die gemeente met byvoorbeeld 98 belydende en 104 dooplidmate in 1959 heelwat groter as in 2014, en die leraar se gesin ook nog deur siekte geteister is. Op 12 Junie 1965 het ds. Meyer 'n beroep na Suid-Afrika aangeneem.

Prop. P.J.L. du Plessis is intussen beroep en hy het op 26 Februarie 1966 diens aanvaar met standplaas Grootfontein. Hy het egter in 1970 'n beroep na Kuruman aanvaar. Ds. J.J. Venter was die nuwe leraar vanaf 1972. Nou het die lidmaattal vinnig aangegroei en in 1972 kon selfs 'n orrel aangekoop word. Die kombinasie met ander dorpe is in 1975 opgesê en met groot geloof en vertroue het die gemeente selfstandig voortgegaan. Nadat ds. Venter 'n beroep in 1976 na Vryheid aanvaar het, is daar nie minder nie as 10 beroepe uitgebring, maar 'n opvolger kon nie maklik verkry word nie. Vir die tweede keer het ds. C.J.J. Putter van Outjo as konsulent waargeneem en die gemeente se sewentiende beroep is met welslae bekroon toe ds. D.H.P. Wijnbeek op 16 April 1977 bevestig is. Die gemeente het toe bestaan uit Otjiwarongo met 'n wyk op Okakarara.

Predikante[wysig | wysig bron]

  • M.W. van der Walt, 1955 tot 1958 (in kombinasie met Grootfontein, Usakos en Walvisbaai)
  • E.W. Meyer, Maart 1959 - Junie 1965
  • P.J.L. du Plessis, Februarie 1966 - 1970 (in kombinasie met Grootfontein)
  • Jurie Johannes Venter, 1972 - 1976 (in kombinasie met Tsumeb)
  • Dirk Hendrik Petrus Wijnbeek, 1977 - 1983
  • Johannes Lodewicus van der Linde, 1984 - 1988, 1996 - 1997
  • Hendrik Lodewyk Jacobus Momberg, 1989 - 1995
  • Petrus Jacobus Venter, 1999 - 2002 (in kombinasie met Outjo en Biermanskool)
  • Daniël Petrus Prinsloo, 2003 – 2015 (in kombinasie met Outjo en Biermanskool)
  • J.P. (Jan) van der Walt, 2015 - Desember 2023 (emeriteer)

Sien ook[wysig | wysig bron]

Bronne[wysig | wysig bron]

  • (af) Van der Merwe, dr. Paul. 1981. Otjiwarongo 1906-1981. Otjiwarongo: Munisipaliteit Otjiwarongo.

Eksterne skakels[wysig | wysig bron]