Gerhardminnebron

in Wikipedia, die vrye ensiklopedie
Jump to navigation Jump to search

Die Gerhardminnebron naby Potchefstroom is een van Suid-Afrika se sterkste fonteine.

Die bron lê langs die R501-pad, 2½ km oos van die spoorweghalte Frederikstad in die rigting van Gatsrand, 34 km suidwes van Carletonville, 23 km noord van Potchefstroom, noord van die Boskopdam-natuurreservaat en suidwes van die Abe Bailey-natuurreservaat. Dit is by die koördinate 26°28′47″S 27°9′6″O / 26.47972°S 27.15167°O / -26.47972; 27.15167 en 1 415 m bo seevlak.

Die bron lewer 'n konstante vloei van ongeveer 2500 m³ water per uur, d.w.s. tussen 60 000 en 80 000 m³ per dag. 'n Damwal keer die water af na kanale. Hierdie water word benut vir besproeiing en huishoudelike gebruik in Potchefstroom. Onbenutte water loop met die Wonderboomspruit en die Mooirivier na die Vaalrivier.

Die belangrikste bron van grondwater in Suid-Afrika is die dolomiet-serie, dit is klip met 'n baie hoë kalkinhoud, wat geoloë die Transvaalsisteem noem. Dit beslaan 'n area van 14 000 km², dus effens meer as 1% van die land se oppervlakte. Dele van die rotse word in die water opgelos en weggevoer. Dus is die ondergrondse water ryk aan minerale en soute. Mynbou gebruik baie van die ondergrondse water en besoedel die omgewing en die water.

Die eerste vestiging van boere in die gebied was in 1838 deur die Voortrekker Gerhard Breytenbach en sy gesin. In die 1890’s word die plaas die eiendom van Sammy Marks en hy bou die eerste besproeiingskanale.

Waarskynlik is die bron genoem na bogenoemde Gerhard en die bekende Minnebron, 'n fontein suid van Leuven in België.

Lees ook[wysig | wysig bron]

Bibliografie[wysig | wysig bron]