Gilbert Bécaud

Gilbert Bécaud
Gilbert Bécaud in 1965
Agtergrondinligting
Geboortenaam	François Gilbert Léopold Silly
Gebore	24 Oktober 1927 Toulon, Var, Frankryk
Sterf	18 Desember 2001 Parys, Île-de-France, Frankryk
Genres	Chanson français, jazz
Beroep(e)	Sanger Komponis Pianis Akteur
Instrumente	Klavier, kitaar
Jare aktief	1948 tot 2001

François Gilbert Léopold Silly, bekend as Gilbert Bécaud (* 24 Oktober 1927 in Toulon; † 18 Desember 2001 in Parys), was 'n Franse sanger, komponis, pianis en akteur.

Bécaud het gedurende sy loopbaan 33 keer in die Paryse musiekteater Olympia opgetree waar hy in 1954 sy eerste groot sukses behaal en weens sy swing-styl, die energieke aard van sy vertonings en die groot geesdrif waarmee sy sangkuns deur gehore ontvang is (dikwels het sy aanhangers so opgewonde geraak dat hulle hul sitplekke stukkend geslaan het) die bynaam Monsieur 100 000 Volt gekry het. Bécaud het die indruk geskep dat hy steeds in beweging was, asof hy elektries gelaai was. Ander tipiese kenmerke van sy optredes was die donkerblou pak, wit hemp en sy blou das met wit kolletjies wat hy steeds gedra het.

Gilbert Bécaud is ná 'n loopbaan van meer as vyftig jaar op 18 Desember 2001 in die ouderdom van 74 aan boord van sy Paryse huisboot Aran aan longkanker oorlede. Hy is langs die aktrise Marie Trintignant in afdeling 41 van die bekende Paryse Père-Lachaise-begraafplaas ter ruste gelê.