Huisboot

in Wikipedia, die vrye ensiklopedie
Jump to navigation Jump to search
'n Huisboot op Union-meer in Seattle, Washington, VSA.
'n Huisboot, Mississippi, USA
'n Drywende huis op die Amasone, Iquitos, Peru.
'n Huisboot op Ashtamudi-meer in die stad Kollam, Indië.

'n Huisboot (anders as 'n boothuis, wat 'n skuur is om bote in te bêre) is 'n boot wat ontwerp of aangepas is om hoofsaaklik as 'n tuiste gebruik te word. Party huisbote het nie enjins nie omdat hulle gewoonlik vasgemeer is en stil dryf op 'n bepaalde punt, vasgemaak aan land om dinge soos water en elektrisiteit te kan ontvang. Baie is egter in staat om met hul eie krag te beweeg. 'n Vlothuis is 'n Kanadese en Amerikaanse woord vir 'n huis op 'n vlot.[1]

Die gebruik van 'n huisboot is 'n baie gewilde tydverdryf vir groepe mense van alle ouderdomme, op allerhande verskillende huisbote, wat wissel van meer beskeie soorte van 10 meter lank, tot uiters luukse bote van 21 meter. Van die aanloklikhede van 'n huisboot is dat jy die plaaslike omgewing beter kan leer ken en naby kan bly aan ander buitemuurse aktiwiteite soos stap, skibootry en op die strand wees. Dit bied ook die vryheid om op die ingewing van die oomblik te besluit jy wil jou woonkwartiere verskuif.

Afrika[wysig | wysig bron]

Zimbabwe[wysig | wysig bron]

In Zimbabwe, veral op die Karibameer, word huisbote gebruik sedert die skepping van die meer in die laat 1950's en vroeë 1960's. 'n Huisboot maak dit makliker om die Zambezi-kom te ervaar omdat baie wild na die water toe kom om te drink of af te koel.

Asië[wysig | wysig bron]

Hongkong[wysig | wysig bron]

Daar is 'n huisboot- en visvanggemeenskap aan die suidekant van Hongkong-eiland wat bekend staan as Aberdeen-drywende dorpie. Daar was ook so 'n gemeenskap in die Yau Ma Tei-tifoonskuiling.

'n Huisboot in Humble Administrator se tuin.

Indië[wysig | wysig bron]

In Indië kom huisbote as verblyfplek vir toeriste algemeen voor in die stil deel van Kerala, en in die Dal-meer naby Srinagar in Jammu en Kashmir.

Kerala-huisbote[wysig | wysig bron]

'n Kerala-huisboot in Kumarakom, Indië.
'n Huisboot naby Alleppey, Kerala, Indië.

Huisbote in Kerala, suid-Indië, is groot vragskuite wat stadig beweeg en gebruik word vir ontspanningsvaarte. Hulle is omskepte weergawes van Kettuvallams (in Maleis beteken Kettu "vasgemaak met toue" en vallam beteken "boot"), wat vroeër jare gebruik is om rys en speserye van Kuttanad na die Kochi-hawe te neem. Kerala-huisbote word beskou as 'n gerieflike manier van vervoer.

Die gewildheid van Kettuvallams het opgevlam met die gebruik daarvan as belangrike toeristeaanloklikhede.

So 'n huisboot is sowat 18 tot 21 meter lank en 4.6 meter breed in die middel. Die romp is van houtplanke wat vasgemaak is met toue of klappervesel. Die dak word van bamboespale en palmblare gemaak. Die buitekant van die boot word geverf met beskermende verf of kasjoeneutolie.

Kashmir-huisbote[wysig | wysig bron]

'n Huisboot op die Dal-meer in Srinagar, Kashmir.
Huisbote op die Nageen-meer, Srinagar, Jammu & Kashmir, Indië.

Anders as hul eweknieë in Kerala is die huisbote in Srinagar, Jammu en Kashmir gewoonlik stilstaande. Hulle is meestal vasgemeer teen die oewers van die Dalmeer en Nageenmere. Party van die huisbote is in die vroeë 1900's gebou en word steeds aan toeriste verhuur. Hierdie huisbote is van hout gemaak, en het gewoonlik fyn gekerfde houtpanele. Hulle is van verskillende groottes en party het tot drie slaapkamers, 'n sitkamer en kombuis.

Laos[wysig | wysig bron]

In Laos word huisbote gebruik as verblyf vir toeriste op die Mekongrivier. Die huisbote word "stadige bote" genoem en is gewoonlik van staal of hout.[2][3][4]

Europa[wysig | wysig bron]

Duitsland[wysig | wysig bron]

Huisbote op die Landwehr-kanaal, Berlyn.

Die Hamburghawe het 'n taamlik groot drywende gemeenskap wat 'n Flussschifferkirche of skipperkerk insluit. Berlyn het ook boothuisbuurte, vernaamlik op die Landwehrkanaal in Friedrichshain-Kreuzberg.

Nederland[wysig | wysig bron]

'n Huisboot vir studente in Zwolle, Nederland.
'n Huisboot in Amsterdam, Nederland.

In Europa kan van die beste en duurste voorbeelde van huisbote op die kanale van Amsterdam gesien word, waar daar selfs huisboothotelle is. Huisbote is baie duur in Amsterdam omdat daar net 'n beperkte hoeveelheid vasmeerplekke is. Dié onkoste verminder die kanse dat die sowat 2 400 families wat op die water van Amsterdam woon nuwe buurbote sal kry. Die Bloemenmarkt is 'n blommemark op huisbote langs die Singel in Amsterdam. Die dorp Maasbommel doen baanbrekerswerk met drywende huise, wat nie hoofsaaklik vir reis bedoel is nie, maar eerder om veilig te wees teen oorstromings.[5][6][7]

Serwië[wysig | wysig bron]

Huisbote op Ada Ciganlija, Belgrado (Serbië)

Huisbote is gewild vir ontspanning en as eetplekke en klubs in Serwië. Hulle kom in groot getalle voor in Belgrado op die oewer van die Danube- en Sava-rivier, en op eilande in die riviere.

Brittanje[wysig | wysig bron]

Huisbote in Richmond, Surrey, Brittanje.
Smalbote by Braunston op die Grand Union-kanaal, Brittanje.
Gestrande rompbote by Hayling-eiland, Brittanje

In Brittanje word kanaalsmalbote gebruik as blyplekke en ook as mobiele gehuurde vakansieverblyf. Smalbote is aanvanklik gebruik as huise en vir massavervoer van boumateriaal en brandstof op kanale wat aan die begin van Nywerheidsrevolusie gebou is. Deesdae word die kanaalnetwerk grootliks vir ontspanning gebruik, maar verskil van tipiese vakansieplekke langs die see. Kanale is binnelands en gaan dikwels deur eertydse geskiedkundige dele, nywerheidsareas en woonbuurte.

Meer as 15 000 mense woon op die water in Brittanje.

Mense wat op bote bly verkies dié lewenstyl vir baie redes, waaronder:

  • Die spaarsaamheid om 'n tuiste en plesier te kombineer;
  • Die nabyheid aan die natuur;
  • Kameraadskap;
  • Ontsnapping van die daaglikse druk van die lewe op land.
'n Huisboot op die Dalmeer in Srinagar, Kashmir.

Verskeie vasmeerplekke strek van Broadness Creek en Benfleet Creek in die laer deel van die Londense hawegesondheidsowerheidgebied tot by Twickenham in die hoër deel. [8]

Noord-Amerika[wysig | wysig bron]

Kanada[wysig | wysig bron]

In Kanada word huisbote al hoe gewilder in Brits-Columbië, Ontario en Quebec aangesien daar 'n oorvloed besonder gepaste riviere en mere vir huisbote is. Huisbote in Kanda het gewoonlik enjins en word vir ontspanning gebruik eerder as permanente woonplekke. Dit is veral weens geweldige koue in die winter en gevolglik gevriesde waterweë. Die Rideau-kanaalstelsel is 'n geskiedkundige waterweg wat bekend is vir sy skilderagtige omgewing en oulike dorpies. Die dorpie Sicamous op die Shuswap-meer in Brits-Columbië staan bekend as die "Huisboothoofstad van die wêreld".[9]

Huisbote op die Nageen-meer, Srinagar, Jammu & Kashmir, Indië.

Verenigde State van Amerika[wysig | wysig bron]

'n Hondhuisboot op die Charles-rivier in Cambridge, Massachusetts, VSA.
'n Huisboot in Silver Glen Springs, naby die George-meer, Florida, VSA.
'n Huisboot op die Bigeaux-meer, naby Henderson, Louisiana, VSA.

Seattle is die tuiste van 'n taamlik groot versameling huisbote (wat met hul eie krag kan beweeg) en "drywende huise" (huise wat op vlotte gebou is) in etlike woonbuurte, veral op Unionmeer en Portagebaai. Hulle het te voorskyn gekom kort na die tydperk van die eerste Europese nedersettings. Op hul hoogtepunt in die eerste helfte van die 20ste eeu was daar meer as 2 500 sulke huise in die stad, benewens die eens seewaardige bote waarop mens kan woon. Teen 2010 was daar sowat 480 drywende huise op Unionmeer en effens minder in die res van die stad.[10] Die meeste huisbote is ontwerp vir net binnelandse mere en waterweë. Portland, Oregon het ook baie huisbote langs sowel die Willametterivier en die Columbiarivier, met die voorstad Hayden Island as 'n vername voorbeeld. Vlothuise word meestal aan die Stille Oseaankus gebruik.

Huisbote het as ontspanningsaktiwiteit in die VSA aan die einde van die 1940's begin toe mense graag langer op die water wou bly. Cumberlandmeer in Kentucky word beskou as die geboorteplek van huisbootgebruik in die VSA.[11]

Oseanië[wysig | wysig bron]

Australië[wysig | wysig bron]

Huisbote wat te huur is op die Coomerarivier, Goudkus, Australië.

In Australië, veral op die Murrayrivier en die sonnige kuslyn van Victoria, is daar baie gemotoriseerde, pontoon-gebaseerde huisbote met twee of meer slaapkamers. Party van hierdie huisbote het meer as een vlak. Baie word privaat besit as hoofverblyfplek of vakansiehuis. Baie kan gehuur word as selfbestuurde vakansiebestemmings vir van vier tot 'n dosyn mense. Die Coomera-rivier, die Groot Sandseestrate (naby Fraser-eiland) en meer onlangs die Tweed-rivier is veral gewild onder mense van Queensland en ander toeriste. Die Eildon-meer in Victoria en die Hawkesbury-rivier naby Sydney in New South Wales is gewilde plekke vir huisbote.

Nieu-Seeland[wysig | wysig bron]

In Nieu-Seeland neem verblyf op 'n huisboot as 'n vakansieaktiwiteit al hoe meer toe. Whangaroa-hawe[12] op Northland se ooskus is 'n binnelandse hawe waar jy op 'n huisboot kan bly.

Galery[wysig | wysig bron]

Voetnotas[wysig | wysig bron]

Eksterne skakels[wysig | wysig bron]