Held van die Russiese Federasie

in Wikipedia, die vrye ensiklopedie
Held van die Russiese Federasie
Goue Ster-medalje van ’n Held van die Russiese Federasie
Goue Ster-medalje van ’n Held van die Russiese Federasie
Tipe Eretitel
Toegeken vir Heldedade tot diens van Rusland
Status Aktief
Ingestel 20 Maart 1992
Totaal toegeken Amper 1 000
Soortgelyke eerbewyse Held van die Sowjetunie
Held van die Oekraïne
Held van Belarus

Held van die Russiese Federasie (Russies: Герой Российской Федерации, Geroi Rossijskoi Federatsii) is ’n toekenning en die hoogste eretitel wat ’n burger van Rusland kan ontvang. Die president van Rusland ken dit toe aan mense wat helde- en ander voortreflike dade verrig het tot diens van die staat. Dit is sedert sy instelling al amper 1 000 keer toegeken, hoofsaaklik aan ruimtevaarders en vir militêre dapperheid in Tsjetsjnië. Verskeie kunstenaars, politici, ekonome en atlete het dit ook al ontvang.

Instelling[wysig | wysig bron]

Die titel is op 20 Maart 1992 deur pres. Boris Jeltsin ingestel in die plek van die titel Held van die Sowjetunie. Dit is die hoogste eerbewys wat die Russiese president aan enigiemand kan toeken. Anders as met die Sowjet-heldetitels word geen ander toekenning daarmee saam gedoen nie.

Die titel kan toegeken word aan enigiemand wat ’n heldedaad verrig tot diens van die staat en volk en kan dus deur militêre en burgerlikes ontvang word. Dit kan ook nadoods toegeken word as die heldedaad die persoon se lewe geëis het. Dit is al sowat 340 keer nadoods toegeken, veral aan mense wat betrokke was by die Tsjetsjniese oorloë.

Een van die laaste ontvangers was Michail Kalasjnikof, die ontwerper van die AK-47-aanvalsgeweer. Hy het dit op 10 November 2009 op sy 90ste verjaardag ontvang.[1] Een van die laaste nadoodse toekennings was op 24 Maart 2010 aan Ewgeni Tsjernisjof. Hy was die hoof van die Moskouse brandweer wat op 20 Maart 2010 in ’n brand gesterf het terwyl hy ander se lewens gered het.

Ontwerp[wysig | wysig bron]

Die ontwerp van die Goue Ster-medalje is soortgelyk aan dié van die Goue Ster van die Sowjetunie. Die band se ontwerp is geskoei op dié van die Russiese vlag. Op die agterkant verskyn die woorde "Held van Rusland" (Герой России, Geroi Rossii). Die serienommer dui aan die hoeveelste keer dit is dat die medalje toegeken word. Die medalje self is van goud gemaak en weeg sowat 21,5 gram.

Wanneer die medalje in die openbaar gedra word, is dit aan die linkerkant van die baadjie bo enige ander medaljes van Rusland of die Sowjetunie.

Ontvangers[wysig | wysig bron]

Pres. Dmitri Medwedef oorhandig die titel Held van die Russiese Federasie aan Oleg Moetowin.

Die meeste van die ontvangers tot dusver was ruimtevaarders en deelnemers aan die Tsjetsjniese oorloë. Terwyl elke ruimtevaarder wat die ruimte betree die medalje outomaties ontvang, kry deelnemers aan die oorlog dit hoofsaaklik vir heldedade vir die regering tydens gevegte. Sommige ontvangers, soos Sergei Krikalef, was ook ontvangers van die titel Held van die Sowjetunie sowel as die Orde van Lenin.

Iemand buite dié twee hoofgroepe wat die titel ontvang het, was Gennadi Ljatsjin, kaptein van die duikboot Kursk wat in 2000 ná ’n ontploffing gesink het. Hy het die titel nadoods ontvang vir sy heldhaftige pogings om die lewens van die bemanning te red, terwyl sy bemanningslede die Order van Dapperheid ontvang het.[2]

Die atleet Larisa Lazutina het die titel gekry vir verskeie medaljes wat sy op die Olimpiese Winterspele van 1998 in Nagano, Japan, gewen het.[3] Nog ’n atleet, Aleksander Karelin, het die titel gewen vir sy Olimpiese sukses in stoei.[4] Op 10 Januarie 2008 is die titel toegeken aan drie lede van die Arktika 2007-ekspedisie wat die eerste mense was wat by die Noordpool na die seebodem afgesak het: Anatoli Sagalewitsj, Jewgeni Tsjernjajef en Artoer Tsjilingarof.[5]

Verwysings[wysig | wysig bron]

Hierdie artikel is vertaal vanuit die Engelse Wikipedia
  1. "argiefkopie". Geargiveer vanaf die oorspronklike op 13 November 2009. Besoek op 13 November 2009.
  2. Felgenhauer, Pavel. "Drowning Reality of Kursk" (in Russies). Moscow Times. Archived from the original on 2001-03-09. http://web.archive.org/web/20010309235336/http://www.cdi.org/russia/117.html##2. Besoek op 2005-10-05. 
  3. "The Voice of Russia (Olympic Games 2002)". http://www.vor.ru/Olymp/history_eng.html#21. Besoek op 2005-10-06. 
  4. "Summer Olympics 2000 Champion turned politician seeks fourth gold". ESPN. http://static.espn.go.com/oly/summer00/wrestling/s/2000/0906/726828.html. Besoek op 2009-03-14. 
  5. "Президент России" (in Russies). Geargiveer vanaf die oorspronklike op 15 Maart 2009. Besoek op 10 Januarie 2008.

Eksterne skakels[wysig | wysig bron]