Hendrik Aucamp

H.B. Aucamp.

Aucamp en sy vrou se graf in die begraafplaas op Bethulie.

Hendrik Barnardus Aucamp (Burgersdorp, Kaapkolonie, 9 Junie 1877 – Bethulie (waarskynlik), 1 Augustus 1964) was ’n boer, Kaapse Rebel, een van die eerste lede van die Nasionale Party en ’n leier van die party in die Noordoos-Kaap.

Aucamp se ouers was Pieter Louis Stefanus en Hester du Plessis. Sy vader het omstreeks 1850 saam met sy ouers uit die distrik Graaff-Reinet na die distrik Albert verhuis. Sy vader was een van die stigters van die Gereformeerde kerk Burgersdorp, die eerste in die Kaapkolonie, op 21 Januarie 1860; sy naam verskyn as sodanig in die gemeente se eerste lidmaatskapsregister. Hy het ook in die grensoorloë diens gedoen.

Aucamp het sy opvoeding op Burgersdorp ontvang en by die uitbreek van die Tweede Vryheidsoorlog in Oktober 1899 as Kaapse Rebel by kmdt. Steenekamp aangesluit. Op 5 Maart 1900 is hy gevang en eers na Oos-Londen gestuur, van daar per skip na Kaapstad en ná 10 maande na die eiland Sint Helena. Eers ses maande ná die vrede in Mei 1902 is hy terug na Suid-Afrika gestuur. Ná die vrede het hy nog ses maande tronkstraf gekry.

Sy vrou was in die konsentrasiekamp te Norvalspont. Al hul besittings is tydens die oorlog gekonfiskeer. Ook sy vader is na die kamp gestuur toe hy reeds 78 jaar oud was en daar het die familie 14 maande lank gebly.

Aucamp was een van die eerste lede van die Nasionale Party. Van die tak Knapdaar was hy agt jaar sekretaris en daarna voorsitter van die tak Kareepoort en ondervoorsitter van die distriksbestuur van Venterstad, waar hy op die plaas Rus geboer het. Hy was afgevaardigde van Burgersdorp op die Herenigingskongres in Bloemfontein, en na partykongresse te onder meer Victoria-Wes, Oudtshoorn en Ceres. Ook het hy meermale in die verkiesingskommissie van sy party gedien.

Hy is op 11 Januarie 1897 op sy geboortedorp met Hester Maria van der Walt (1881–1973) getroud. Sewe kinders is uit dié huwelik gebore. Die egpaar het blykbaar hul laaste jare op Bethulie deurgebring.

Bronne

• (af) (en) Reitz, Hjalmar en Oost, Harm (reds.), Goodman, I.M. (samesteller). 1931. Die Nasionale Boek. 'n Geskiedenis van die ontstaan en groei van die Nasionale Party van Suid-Afrika en wat dit bereik het, tesaam met belangwekkende Artiekels in verband daarmee. Johannesburg: Nasionale Boek Maatskappy, 1931.