Idool van Sjigir

in Wikipedia, die vrye ensiklopedie
Die houtbeeld dateer van 11 500 jaar gelede en was moontlik aanvanklik hoër as 5 m.

Die Idool van Sjigir (Russies: Шигирский идол, Sjigirski idol), of Sjigirbeeld, is sover bekend die oudste houtbeeld in die wêreld[1][2] en is in die Mesolitikum gemaak, kort ná die einde van die laaste glasiale tyd.[3] Die hout waaruit dit gekerf is, is sowat 11 500 jaar oud.[4][5]

Die beeld word ten toon gestel in die Swerdlofsk-streeksheemkundemuseum in Jekaterinburg, Rusland.[6]

Ontdekking[wysig | wysig bron]

Die beeld is op 24 Januarie 1894 sowat 4 m diep in die veengrond van Sjigir,[4] aan die oostelike hang van die Middel-Oeral sowat 100 km van Jekaterinburg af, ontdek. Ondersoeke van dié gebied het 40 jaar vroeër begin ná die ontdekking van verskeie prehistoriese voorwerpe in ’n opelluggoudmyn.

Dit is in 10 dele uitgehaal. Professor D.I. Lobanof het die hoofdele aanmekaargesit om ’n beeld van 2,8 m te herskep.[7]

In 1914 het die argeoloog Wladimir Tolmatsjof ’n variasie van die rekonstruksie voorgestel deur die ongebruikte dele ook by te voeg. Volgens dié rekonstruksie was die beeld oorspronklik 5,3 m hoog.[7] Later het van die dele weggeraak, en net Tolmatsjof se tekeninge het oorgebly.[8]

Datering[wysig | wysig bron]

Die aanvanklike radiokoolstofdatering deur G.I. Zaitsewa van die Russiese Wetenskapakademie se instituut vir die geskiedenis van materiële kulture in Sint Petersburg het op ’n ouderdom van sowat 9 500 jaar gedui, en dit is bevestig deur die akademie se geologiese instituut in Moskou. Eers is in die 1990's geglo dié datering is verkeerd omdat die jagter-versamelaars wat 9 500 jaar gelede in die gebied gewoon het, nie in staat sou wees om so ’n groot beeld te maak en versier nie.[9]Later het ’n Duitse ontleding gedui om ’n ouderdom van 11 500 jaar.[10][9] Dit is die oudste bekende houtstruktuur in sy soort in die wêreld. Gewoonlik verrot hout in die meeste omgewings, en vergaan gouer as klip en metaal.

Van die gesigte laer af op die idool kan op dié foto gesien word.

’n Versierde horing is naby die idool ontdek en dateer van dieselfde tydperk, en dit het geloofwaardigheid aan die ouderdom van 11 500 jaar verleen.[8]

Beskrywing[wysig | wysig bron]

Die Idool van Sjigir is uit lorkehout gekerf. Die jaarringe op die hout dui op ’n ouderdom van 159 jaar toe die beeld gemaak is. Klipwerktuie is gebruik om die merke te graveer. Die boonste deel is ’n kop met ’n gesig met oë, ’n neus en mond. Die lyf is plat en reghoekig. Geometriese motiewe versier die oppervlak, onder meer sigsaglyne en uitbeeldings van menslike gesigte en hande.[9] Horisontale lyne op dieselfde vlak as die keel kan ribbes voorstel. Militêre soort strepe vorm wat gewoonlik die res van die lyf genoem word.[10]

Benewens die gesig heel bo is sommige gesigte ook op verskillende plekke laer af sigbaar.[11] Die rangskikking is dieselfde as op ’n totempaal.[12]

Geleerdes het verskeie voorstelle gehad oor die moontlike betekenisse van die graveermerke. Swetlana Saftsjenko, ’n navorser aan die Swerdlofsk-streekmuseum, het voorgestel die versiering beeld die skeppingsmite uit waarin die skeppers van die idool geglo het.[7] Ander navorsers dink die merke het dalk as ’n soort kaart of navigasiehulp gedien.[7] Professor Michail Zjilin, ’n argeoloog aan die Argeologie-instituut in Moskou, meen die beeld het dalk mitologiese wesens soos woudgeeste uitgebeeld..[13] Die argeoloog Peter Vang Peterson van die Nasionale Museum van Denemarke het gedink die idool kon gedien het as ’n waarskuwing om nie ’n gevaarlike gebied te betree nie.[12]

Die ontdekking van die beeld het geleerdes se siening oor wanneer mense rituele kuns begin maak het, op sy kop gekeer. Hulle het vroeër geglo komplekse kuns, soos dié van die Idool van Sjigir, het sowat 8 000 jaar gelede in die landbougemeenskappe van die Midde-Ooste begin.[9]

Verwysings[wysig | wysig bron]

  1. ↑ Понизовкин, Андрей (September 2003). Куда шагал Шигирский идол? (PDF). Наука Урала (in Russies). No. 20–2003 [848]. Russiese Wetenskapakademie. Geargiveer vanaf die oorspronklike (PDF) op 5 Maart 2016. Besoek op 8 Junie 2020.
  2. ↑ Waugh, Rob (29 Augustus 2015). "Mysterious Russian Statue Is 11,000 Years Old - Twice As Old As The Pyramids" (in Engels). Yahoo News. Geargiveer vanaf die oorspronklike op 8 Junie 2020. Besoek op 30 Augustus 2015.
  3. ↑ "Is this the original face of god?". NewsComAu (in Engels). Geargiveer vanaf die oorspronklike op 6 Mei 2020. Besoek op 25 Mei 2018.
  4. ↑ 4,0 4,1 Geggel, Laura (25 April 2018). "This Eerie, Human-Like Figure Is Twice As Old As Egypt's Pyramids". Live Science (in Engels). Geargiveer vanaf die oorspronklike op 10 Desember 2019. Besoek op 28 April 2018.
  5. ↑ Liesowska, Anna (26 Augustus 2015). "Shigir Idol is oldest wooden sculpture monument in the world, say scientists" (in Engels). The Siberian Times. Geargiveer vanaf die oorspronklike op 20 September 2019. Besoek op 31 Augustus 2015.
  6. ↑ Petricevic, Ivan (28 November 2014). "The Shigir Idol, A Wooden Statue Twice As Old As The Pyramids Of Egypt" (in Engels). Ancient-code.com. Geargiveer vanaf die oorspronklike op 11 Maart 2020. Besoek op 2 Desember 2014.
  7. ↑ 7,0 7,1 7,2 7,3 http://siberiantimes.com/science/casestudy/features/is-this-the-worlds-oldest-secret-code/
  8. ↑ 8,0 8,1 Zhilin, Mikhail; Savchenko, Svetlana; Hansen, Svend; Heussner, Karl-Uwe; Terberger, Thomas (April 2018). "Early art in the Urals: new research on the wooden sculpture from Shigir". Antiquity. 92 (362): 334–350. doi:10.15184/aqy.2018.48. ISSN 0003-598X.
  9. ↑ 9,0 9,1 9,2 9,3 McKie, Robin (20 Mei 2018). "Carved idol from the Urals shatters expert views on birth of ritual art". the Guardian (in Engels). Geargiveer vanaf die oorspronklike op 27 Februarie 2020. Besoek op 25 Mei 2018.
  10. ↑ 10,0 10,1 Liesowska, Anna (28 Augustus 2015). "Revelations on Shigir Idol 'change our understanding of ancient civilisations'" (in Engels). The Siberian Times. Geargiveer vanaf die oorspronklike op 2 Maart 2020. Besoek op 29 Augustus 2015.
  11. ↑ https://huffingtonpost.com/entry/shigir-idol_55e3e761e4b0aec9f353b08d
  12. ↑ 12,0 12,1 "This 11,000-year-old statue unearthed in Siberia may reveal ancient views of taboos and demons". Science | AAAS. 24 April 2018. Besoek op 25 Mei 2018.
  13. ↑ "Shigir Idol could be oldest piece of monumental art: study". Salon (in Engels). 28 April 2018. Geargiveer vanaf die oorspronklike op 10 Junie 2020. Besoek op 25 Mei 2018.

Skakels[wysig | wysig bron]

Koördinate: 57°22′51″N 60°08′27″O / 57.3809°N 60.1407°O / 57.3809; 60.1407

Ontsluit van "https://af.wikipedia.org/w/index.php?title=Idool_van_Sjigir&oldid=2473610"