Jag (plesierboot)

in Wikipedia, die vrye ensiklopedie
Die Amerikaanse seiljag Yampa in 1893
Die 80 voet-motorjag Lazzara Alchemist (hier afgeneem langs die kus van die deelstaat Kalifornië) is in 2003 deur die Lazzara-skeepswerf in Florida vervaardig[1]
Die Italiaanse superjag Taransay met 'n lengte van 40 m is deur die werf Rossinavi volgens die klassieke voorbeelde van jagte uit die 1930's ontwerp en van modernste tegnologie voorsien[2]
Sailing Yacht A (stuurboord), 'n motorjag wat deur seile gesteun word. Hierdie superjag met 'n lengte van meer as 142 meter is deur die Duitse werf Nobiskrug in Kiel vir die Russiese nyweraar, miljardêr en filantroop Andrei Melnitsjenko gebou en in 2015 geloods. Die jag is in Hamilton op die Bermuda-eilande geregistreer
Die megaseiljag Black Pearl in Rotterdamhawe, Nederland, in 2017 vervaardig deur die Oceanco-skeepswerf. Vir die vervaardiging van die skeepsmaste is koolstofvesel gebruik
Black Pearl, syaansig
Die moderne jaghawe Yachthafenresidenz Hohe Düne in die Duitse Oosseehawestad Rostock

Die term jag (afgelei van Nederlands jacht, 'n verkorte vorm van die Middelnederlandse jachtschip "jaagskip, vinnige skip") verwys tans na 'n watervoertuig wat vir sportdoeleindes of as plesierboot gebruik word en - met enkele uitsonderings - van 'n dek en tenminste een kajuit voorsien is. Jagte het 'n vaste kiel en 'n romplengte van gewoonlik tussen ses en 160 meter; korter watervoertuie word as boot beskou. Jagte word as tradisionele seiljagte of as motorjagte vervaardig. Die belangrikste kriterium, waarvolgens jagte van ander watervoertuie onderskei word, is hul uitsluitlike gebruik vir ontspanningsdoeleindes en die feit dat hulle òf deur hul eienaar geloods (of as selfbestuur-jag verhuur) word òf 'n ervare kaptein hiervoor aangestel word. Hul kapasiteit (onder meer die maksimum aantal passasiers en hul reikwydte) is 'n verdere kenmerk wat hulle van groot kommersiële plesierbote onderskei. Kleiner jagte is geskik vir dagtoere, terwyl groter jagte toegerus mag wees vir langer seereise.

Tot in die sewentigerjare van die 20ste eeu is sogenaamde klassieke jagte van materiale soos hout, aluminium en staal gebou. Vervolgens het werwe geleidelik begin oorskakel na glasveselversterkte plastiek - 'n materiaal wat ondanks sy ligte massa stewigheid aan die romp verleen en daarnaas deur hoë digtheid gekenmerk word. Terwyl die onderhoud daarvan vergemaklik word, maak die nuwe materiaal die grootskaalse vervaardiging van jagte in enige gewenste vorm moontlik. Selfs ongewone ontwerpe kan maklik verwesenlik word. Jagte uit hierdie moderne vervaardigingsperiode word "moderne klassiekes" (modern classics) genoem.[3]

Moderne motorjagte is gesofistikeerde tegniese stelsels wat deur gespesialiseerde bootswerwe vervaardig en van modernste posisie-, navigasie- en stabiliseerstelsels voorsien word. Vir die grootste en modernste motorjagte word 'n hele ingewikkelde infrastruktuur van leweransiers benodig wat 'n groot verskeidenheid onderdele en toerusting verskaf, asook bekwame spesialiste soos skeepsbou-ingenieurs, ontwerpers en ambagslui. Die grootste jagte word derhalwe in gevorderde nywerheidslande soos Duitsland, Italië, Frankryk en die Verenigde State vervaardig. Van die modernste superjagte word van hibriedenjins voorsien.

Baie groot jagte met 'n lengte van meer as 100 meter val binne 'n besondere kategorie en word algemeen as super- of megajagte geklassifiseer. 'n Ander belangrike kriterium, waarvolgens ook kleiner jagte vanaf 24 meter by die definisie ingesluit mag word, is die fokus op gerieflikheid, spoed en reikwydte. Dikwels het super- en megajagte 'n vaste professionele bemanning wat saam met die jag gehuur kan word. Die grootste superjagte is in staat om kleiner watervoertuie soos motorbote te vervoer, in enkele gevalle selfs 'n helikopter. Daar is dikwels ook 'n swembad, sonterras, rolprentteater of konsertsaal aan boord. Hierdie soort jagte is - afhangende van die seisoen - veral gewild in die Mediterreense en Karibiese See.

Verwysings[wysig | wysig bron]

Eksterne skakels[wysig | wysig bron]

Vereniging van jagvervaardigers van Duitsland

Internasionale bootboubedryf