Jehovah se Getuies

in Wikipedia, die vrye ensiklopedie
Spring na: navigasie, soek
Jehovah se Getuies preek van huis tot huis in Lissabon, Portugal.
Watchtower.svg
Bybelstudie
Charles Taze Russell (1852-1916).
Distrikskonvensie van Jehovah se Getuies.
Die Wagtoring, van 6 000 eksemplare in een taal (1879) tot meer as 45 944 000 in meer as 213 tale (2014)

Jehovah se Getuies is 'n Christelike gemeenskap wat in die 19de eeu deur Charles Taze Russell, 'n boorling van Pittsburgh (VSA), gestig is en in 2013 sowat 7,96 miljoen aktiewe lede gehad het. Die huidige internasionale hoofkwartier is in Brooklyn (New York-stad).

Die beweging beweer dat hulle die enigste ware opvolgers van die oorspronklike 1ste-eeuse Christendom is en handhaaf geen betrekkinge met ander Christelike kerke en groeperings nie. Jehovah se Getuies beskryf hulleself dan ook as die "Christendom" en verwys na die ander Christelike kerke en sektes as die "Christenheid". Die leerstellings is hoofsaaklik gebaseer op die apokaliptiese boeke van die Bybel, veral Daniël en Openbaring.

Jehovah se Getuies is bekend vir hulle toegewyde sendingwerk en politieke neutraliteit, waarvolgens lede nóg aan die politieke lewe mag deelneem nóg diensplig mag doen. Alhoewel hulle geen politieke invloed wil uitoefen en nie in politieke sake inmeng nie, het hulle in lande soos Duitsland regstappe gedoen om dieselfde status en erkenning as die groot Christelike kerke te kry.

Net soos die Romeinse Christene in die 1ste eeu glo Jehovah se Getuies aan die wederkoms van Jesus Christus en 'n ewige lewe op aarde in sy Koninkryk. Net 144 000 uitverkore Christene uit alle geskiedkundige periodes sal saam met Jesus hierdie Koninkryk op aarde vanuit die hemel regeer.

Alhoewel hulle min of meer by die fundamentalistiese stromings van die Christendom gereken kan word wat slegs die Bybel as bron van godsdienstige leerstellings aanvaar, word Bybeltekste in die algemeen krities bestudeer. Hulle aanvaar dus geen leerstellings dat die aarde letterlik in sewe dae geskep is of dat mense 'n onsterflike siel het nie.

Geskiedenis[wysig]

Jehovah se Getuies is in 1872 deur Charles Taze Russell in Pittsburgh (Pennsilvanië) onder die naam International Bible Students Association ("Internasionale Vereniging van Bybelstudente") gestig. Onder sy opvolger, Joseph Franklin Rutherford (1869-1942), is die organisasie se naam in 1931 gewysig tot die huidige "Jehovah se Getuies".[1] Vanweë die toegewyde predikingswerk het die beweging in 2013 tot meer as 7,96 miljoen lede in 239 lande gegroei.

Bestuur en vergaderings[wysig]

Die beweging word vanuit die hoofkwartier in New York-stad bestuur deur 'n liggaam van "ervare ouer manne" op 'n nie-demokratiese, outoritêr-teokratiese manier. Hulle organiseer ook die internasionale sendingwerk. Daar is meer as honderd takkantore in ander lande. Vroue is van alle ampte uitgesluit.

Sogenaamde ouer manne of opsieners en bedieningsknegte, wat hulle bystaan, is verantwoordelik vir die onderrig van die gemeente.

Die plaaslike gemeentes vergader in 'n sogenaamde "Koninkryksaal", meestal 'n eenvoudige gebou wat deur vrywilligers opgerig en deur vrywillige bydraes gefinansieer is. Daar is gewoonlik drie vergaderings per week. Groter byeenkomste met spesiale Bybelonderrig vind jaarliks plaas en sluit die doop van nuwe dissipels in.

Verwysings[wysig]

Eksterne skakels[wysig]

Commons-logo.svg
Wikimedia Commons het meer media verwant aan:
Jehovah se Getuies (kategorie)