Jukskeirivier

Jukskeirivier
Die Jukskeirivier naby Gillooly's Farm Die Jukskeirivier naby Gillooly's Farm
Stroomgebied	Gauteng
Oorsprong	Johannesburg
Monding	Krokodilrivier
Oorsprong-hoogte	1711 m
Monding-hoogte	1233 m
Jukskeirivier
Koördinate: 25°52′33″S 27°55′38″O

Die Jukskeirivier is 'n sytak van die Krokodilrivier en ontspring in Johannesburg. Die rivier het sy naam op 8 Oktober 1853 by die prospekteerder Pieter Jacob Marais gekry. Marais het goud op die rivieroewer ontdek asook 'n jukskei wat daar rondgelê het.

Ontstaan en roete

Die Jukskeirivier ontstaan in Ellispark in Johannesburg, hoewel die oorspronklike fontein op die voormalige Doornfontein plaas was, en sedertdien verdwyn het as gevolg van stedelike ontwikkeling. Nou verskyn die water van die Jukskei vir die eerste keer bogronds in 'n stormwater-afloop in Bertrams by die kruising van Queenstraat en Sportsweg. Die rivier vloei in 'n noord-oostelike rigting tot by Gillooly's waar dit dan noordwaarts vloei deur Alexandra. Dit vloei onder deur die N3 by Buccleuch en dan onder deur die N1 naby Midrand. Van hier af vloei dit weswaarts verby Kyalami, Lone Hill en Dainfern. Dit vloei onder deur die N14, verby Lanseria-lughawe en vloei dan verder noord totdat dit by die Krokodilrivier aansluit.