Kenney O’Kennedy

in Wikipedia, die vrye ensiklopedie
(Aangestuur vanaf Kenney O'Kennedy)
Jump to navigation Jump to search
Ds. Kenney O'Kennedy, afgeneem in die jare sestig.
Ds. Jan Momsen van die NG gemeente Rondebosch op die Wes-en-Suid-Kaaplandse Sinode van 2015 saam met drie van ds. O'Kennedy se predikante-seuns. Van links: di. André O'Kennedy van Goudini, Johan O'Kennedy van Swartland en dr. Danie O'Kennedy van Helderberg. Hulle het almal grootgeword in die Rondebosse pastorie by Argyleweg 9, Nuweland.

Dr. John Nicholas Francis (Kenney) O’Kennedy (4 Junie 1925 in distrik Moorreesburg17 Februarie 2005 op Hermanus) was 'n predikant in die Nederduitse Gereformeerde Kerk.

O’Kennedy is op die plaas Egbertsvlei in die distrik Moorreesburg gebore. Sy groot-grootjie was John Morgan O’Kennedy, ’n stoere Katoliek wat in 1830 van Clonmel, Ierland, na Suid-Afrika verhuis het. Hy matrikuleer in 1942 aan die Hoërskool Dirkie Uys op Moorreesburg waar hy C.S.V.-leier, hoofseun en rugbykaptein was. Die volgende jaar vertrek hy na Stellenbosch, waar hy die B.A. (Admissie) behaal en word na sy studie aan die Kweekskool einde 1950 as leraar gelegitimeer. Op Stellenbosch was hy drie jaar lank primarius van die koshuis Wilgenhof, voorsitter van die studenteraad en kaptein van die universiteit se eerste tennisspan.

O’Kennedy trou in 1951 met Cinie Steyn van Morgenster in Rhodesië. Op 22 Julie 1951 word hy in die NG gemeente Robertson georden en bevestig. Daar stig hy ’n KJV en beywer hom vir die bou van kerksaal waarin die eerste K.J.V.-kongres aangebied word. Einde 1956 verlaat hulle Robertson omdat O’Kennedy hom vir Transkei-sending gaan aanmeld. Hy begin die sendingstasie Canzibe naby Umtata. In 1962 ontvang hy ’n beurs vir verdere studie in die V.S.A. . Ná ’n jaar studieverlof aanvaar hy in 1963 ’n beroep na die NG gemeente Pierneef in Pretoria. Hoewel die gesin gelukkig was in die Jakarandastad, bly O’Kennedy in sy hart ’n Bolander en aanvaar daarom in 1966 ’n beroep na die NG gemeente Rondebosch, destyds ’n groot gemeente aan die vooraand van die afstigting van die NG gemeente Keurboom met grense oor vyf voorstede. Die ampswoning Groote Schuur val binne die gemeentegrense en destyds het die meeste ministers in die gemeente gewoon. In 1966 ontvang hy ook die M.Th.-graad in die teologie met die skripsie: "Die aktivering van die kerklike jeug tot sendingaksie."

Op 1 November 1974 word hy bevestig as leraar van die NG gemeente op Kleinmond. In 1977 voltooi hy sy studies en verwerf die doktorsgraad in Praktiese Teologie aan die Universiteit van Stellenbosch. In September 1982 word O’Kennedy predikant in Sinodale diens met opdrag Ampsbediening en Evangelisasie van die Wes-Kaapse Sinode en die gesin vestig hulle op Stellenbosch, vanwaar hy tot vyf optredes per naweek in gemeentes lewer.

Hy aanvaar in 1990 op 65 jaar sy emeritaat en die egpaar bly op Stellenbosch. Vier van hulle vyf seuns volg in hulle vader se voetspore en word ook leraars: John, André, Wouter en Danie. Tommy was tot 2004 skoolhoof op Porterville. Na sy aftrede skryf hy drie boeke en preek nog gereeld tot hy begin siek word. ’n Seldsame kankergewas is in die sinusholtes gediagnoseer, wat later newe-effekte tot gevolg gehad het was sy brein geaffekteer het. Hy sterf op 17 Februarie 2005 in die hospitaal op Hermanus, nadat hy en sy vrou die laaste drie jaar van sy lewe in ’n aftreeoord op die dorp gewoon het.