Krestofski-eiland

in Wikipedia, die vrye ensiklopedie
Krestofski-eiland
Inheemse naam: Крестовский остров
Die ligging van Krestofski-eiland (no. 4 op die kaart)
Die ligging van Krestofski-eiland (no. 4 op die kaart)
Geografie

Ligging Golf van Finland

Oppervlakte 4,2 km2

Administrasie
Vlag van Rusland Rusland
Stad Sint Petersburg

Krestofski-eiland (Russies: Крестовский остров, Krestofski ostrof) is ’n eiland van 4,2 km2 in Sint Petersburg, Rusland, wat in die delta van die Newarivier lê tussen die Klein- en die Middel-Nefka. Dit val in die administratiewe distrik Petrograd. Die eiland is met ’n paar brûe verbind aan Petrogradski-, Jelagin- en Kamenni-eiland. Dit kan ook bereik word deur die Krestofski Ostrof-moltreinstasie.

Naam[wysig | wysig bron]

Die naam Krestofski ostrof kan vertaal word as "Kruiseiland". Daar is verskeie verhale oor waar die naam vandaan kom. Een is dat daar voor die stigting van Sint Petersburg ’n kapel met ’n groot kruis gestaan het. ’n Ander is dat toe Pieter die Grote se suster, Natalia, ’n huis daar laat bou het, ’n groot kruis in die grond gekry is. Dit kan ook sy naam kry van die meer in die middel van die eiland wat die vorm van ’n kruis het.

In die Sowjet-tyd het die eiland saam met Kamenni- en Jelagin-eiland die Kirof-eilande gevorm.

Geskiedenis[wysig | wysig bron]

Die eiland het in die 18de eeu aan die howeling graaf Kirill Razoemofski behoort en is in 1803 deur prins Aleksander Michailowitsj Belosselski-Belozerski gekoop, wie se familie dit tot met die Russiese Rewolusie van 1917 besit het. Hulle het ’n huis daarop laat bou wat later in ’n klein paleis omskep is.

Die oostelike deel van die eiland het sedert die 1900's verstedelik. Tans is verskeie projekte vir duurder behuising aan die gang.

Die eiland het ’n tradisie van sport en ontspanning. ’n Nuwe stadion, wat die tuiste sal wees vir die Zenit Sint Petersburg-sokkerklub, word tans in die westelike deel van die eiland gebou in die plek van die ou Kirof-stadion.[1] Dit het nog nie ’n naam nie en word voorlopig in Russies "die stadion in die westelike deel van Petrofski-eiland" genoem. Dit sal waarskynlik in 2015 klaar wees, nadat die datum verskeie kere uitgestel is,[2] en sal plek hê vir 62 000 mense. Daar is ook heelwat tennis-, boot- en roeiklubs.

Verwysings[wysig | wysig bron]

  1. (ru) Tender-aankondiging Geargiveer 3 Junie 2019 op Wayback Machine
  2. "New St Petersburg stadium to adorn Russia 2018" (in Engels). FIFA.com. 26 April 2012. Geargiveer vanaf die oorspronklike op 22 Januarie 2014. Besoek op 27 Mei 2012.

Eksterne skakels[wysig | wysig bron]

Koördinate: 59°58′12″N 30°15′36″O / 59.97°N 30.260°O / 59.97; 30.260