La Plata
La Plata | |
|---|---|
Stad | |
 Die neogotiese katedraal van La Plata | |
 Vlag  Wapen | |
| Byname: Ciudad de las Diagonales, Capital del Primer Estado Argentino | |
  La Plata | |
| Koördinate: 34°55′17″S 57°57′16″W / 34.92139°S 57.95444°W | |
| Land |  Argentinië |
| Provinsie | Buenos Aires |
| Stigting | 19 November 1882 |
| Hoogte | 26 m (85 ft) |
| Bevolking | |
| • Stad | 794 253 |
| • Metro | 890 000 |
| Tydsone | UTC-3 (ART) |
| Poskode | 1900 |
| Skakelkodes | 0221 |
| Webwerf | laplata.gov.ar |
La Plata is die hoofstad van die provinsie Buenos Aires (Argentinië), sowat 35 myl (56 km) suid van Buenos Aires, met 'n oppervlakte van 940,38 km² en 794 000 inwoners (2010). Die stad lê in die pampa húmeda ("vogtige pampa") met sy gematigde klimaat. Die gemiddelde jaarlikse temperatuur is 16,3 °C en die jaarlikse reënval sowat 1 000 mm.
Geskiedenis
[wysig | wysig bron]
Die stad is op 19 November 1882 deur Dr. Dardo Rocha gestig en volgens 'n roosterpatroon met kruisstrate aangelê. Die stadsontwerp van Pedro Benoit het die vorm van 'n reghoek, met genommerde horisontale en vertikale strate en diagonale lane. Aangesien Rocha en Benoit lede van die Vrymesselaarsbeweging was, het hulle by die beplanning van die stad sterk gebruik van vrymesselaarsimboliek gemaak.
La Plata was in 1884 die eerste stad in Latyns-Amerika wat elektriese straatverligting gekry het. In 1885 het die bevolking reeds 21 792 inwoners beloop (waarvan 8 918 Argentiniërs en 12 874 Italianers), wat destyds nog oorwegend in houtgeboue gewoon het. In dieselfde jaar het die bou van 'n dubbelkanaal begin, wat La Plata met die hawe Ensenada, vyf kilometer noord-oos van die stad, sou verbind.
Tussen 1952 en 1955 het die stad die naam Eva Perón gedra.
La Plata is vandag 'n sentrum van die yster- en staalbedryf en beskik oor 'n olieraffinadery. Parke in die stadsentrum soos die Paseo del Bosque verleen La Plata die tipiese voorkoms van baie provinsiale stede in Argentinië.
Besienswaardighede
[wysig | wysig bron]
Die Plaza Moreno vorm die sentrum van La Plata. Hier lê die hoeksteen van die stad en sy belangrikste besienswaardigheid, die gotiese katedraal van La Plata, wat vanaf 1885 as een van die grootste kerke in Suid-Amerika ontstaan het.
Die Plaza San Martín spog met 'n aantal statige geboue soos die setel van die provinsiale parlement, die Paleis van die Provinisiale Regering en die Pasaje Dardo Rocha. Ander bekende geboue in die stadsentrum is die Stadspaleis (Palacio Municipal) en die Teatro Argentino.
Die park Paseo del Bosque met sy pragtige mere huisves die dieretuin van La Plata, 'n sterrewag, die Natuurwetenskaplike Museum met sy uitstekende geologiese, soölogiese en argeologiese versamelings, wat oorwegend deur die Argentynse navorsers Perito Francisco Moreno en Florentino Ameghino saamgestel is, en die Teatro Martín Fierro. Die Museo Provincial de Bellas Artes, naby die uitgestrekte kampus van die Universidad Nacional de La Plata, behandel die Argentynse skilder- en beeldhoukuns.
Eksterne skakels
[wysig | wysig bron]- Die amptelike webwerf van La Plata Geargiveer 26 September 2011 op Wayback Machine
