Eva Perón

in Wikipedia, die vrye ensiklopedie
Eva Perón
Eva Perón
Eva Perón in 1947

Presidentsvrou van Argentinië
Ampstermyn
4 Junie 1946 – 26 Julie 1952
President Juan Perón
Voorafgegaan deur Conrada Victoria Torni de Farrell
Opgevolg deur Mercedes Villada Achával de Lonardi

Persoonlike besonderhede
Gebore 7 Mei 1919
Los Toldos
Sterf 26 Julie 1952 (op 33)
Buenos Aires
Eggenoot/-note Juan Perón (1895-1974)
Religie Rooms Katoliek
Handtekening

Eva Maria Duarte de Perón (Los Toldos, 7 Mei 1919 - Buenos Aires, 26 Julie 1952) was die tweede eggenoot van die Argentynse president Juan Perón (1895-1974). Sy was gevolglik van 1946 tot haar dood in 1952 die eerste dame van Argentinië. Alhoewel sy nie tot enige politieke posisie verkies is nie, het sy 'n groot invloed op regeringsbeleid gehad. Sy het talle bewonderaars onder armes en die werkersklas gehad, wat belangrik vir haar man se magsposisie was. Kort voor haar dood het die kongres haar as die Geestelike Leier van die Nasie aangewys. Sy word liefkosend Evita genoem (die Spaanse verkleiningsvorm, soortgelyk aan die Afrikaanse Evatjie). Die tipiese beeld van haar tydens toesprake was met die hare in 'n bolla en die gebalde vuis voor 'n mikrofoon.

Beknopte biografie[wysig | wysig bron]

Evita (Eva Duarte de Perón)
Borsbeeld van Evita Peron in La Plata

Eva Maria Ibarguren is op 7 Mei 1919 in die dorpie Los Toldos in die provinsie Buenos Aires gebore. Sy was die vyfde kind van Juan Duarte (1872-1926) en Juana Ibarguren (1894-1971). In 1934, op 15-jarige ouderdom, trek sy na die hoofstad om 'n loopbaan as 'n verhoog-, radio-, en filmaktrise te begin. Sy ontmoet kolonel Juan Perón op 22 Januarie 1944 tydens 'n liefdadigheidsfunksie by die Luna Park-stadion ten behoewe van die slagoffers van 'n aardbewing in San Juan. Hulle is die daaropvolgende jaar getroud en Juan Perón is in 1946 tot president van Argentinië verkies.

Oor die volgende ses jaar het sy een van die magtigste vroue in Argentinië geword. Sy het die Eva Perón-stigting opgerig om hulp aan behoeftiges te verleen. Die vereniging het huise en skole gebou en mediese sorg aan arm mense beskikbaar gestel. Sy het ook die vroue-afdeling van die Peronistiese beweging gestig. Dit was die eerste politieke vrouebeweging in Argentinië gewees.

In 1951 wou sy die adjunkpresident word, maar die militêre leiers, maatskaplike elite en haar eie eggenoot oortuig haar om van haar planne af te sien. In plaas daarvan word die titel 'Geestelike Leier van die Nasie' in 1952 aan haar toegeken.

Sy is tydens 'n histerektomie in November 1951 met kanker gediagnoseer. Dokters is gevra om dit stil te hou sodat dit nie die presidensiële veldtog negatief beïnvloed nie. Sy sterf op 26 Julie 1952 op 33-jarige ouderdom aan servikale kanker, waarna haar liggaam gebalsem is. Nadat haar man se regering omver gewerp is, het haar liggaam vir 20 jaar weggeraak. Dit is later in Italië gevind, na Argentinië teruggeneem, en saam met haar man begrawe nadat hy in 1974 oorlede is.

Die musiekrolprent, Evita (1996) is op haar lewe gebaseer. Madonna het die hoofrol vertolk.

Eksterne skakels[wysig | wysig bron]