Laguna Colorada

in Wikipedia, die vrye ensiklopedie
Jump to navigation Jump to search
Laguna Colorada
James's Flamingoes in Laguna Colorada, Bolivia.jpg
James se flaminke in Laguna Colorada
Laguna Colorada Bolivia.jpg
Foto van Laguna Colorada, geneem deur Nasa Earth Observatory
Koördinate:22°11′S 67°46′W / 22.183°S 67.767°W / -22.183; -67.767Koördinate: 22°11′S 67°46′W / 22.183°S 67.767°W / -22.183; -67.767
Ligging:Bolivië
Soort:Binnemeer, vlakwatermeer, soutmeer
Oppervlakte:60 km² (220 myl²)
Gemiddelde diepte:0,35 meter
Maksimum diepte:1,5 meter
Volume:21 km³
Lengte:10,7 km
Breedte:9,7 km
Omtrek:35 km
Invloei:Rio Sulor

Laguna Colorada is 'n vlakwatermeer in die Boliviaanse nasionale natuurreservaat Reserva Nacional de Fauna Andina Eduardo Abaroa, geleë in die suidelike deel van die hoogplato Altiplano en naby die grens met Chili op 'n hoogte van 4 278 bo seevlak. Administratief behoort die meer aan die provinsie Sur Lípez in die Departamento Potosí.

Die meer het sy naam aan sy opvallende rooi kleur te danke wat deur rooi alge en die hoë gehalte aan mineraalstowwe veroorsaak word. Die rooi mikroörganismes is die gunstelingdieet van flaminke en gee aan hierdie voëls hul eie kenmerkende pienkerige kleur.[1] Laguna Colorada se gemiddelde diepte is slegs 0,35 m, sy diepste punt is 1,5 m. Die meer is temidde van 'n landskap met warmwaterbronne, vulkane en indrukwekkende rotsformasies geleë.

Andesflaminke
'n Oewertoneel van Laguna Colorada
Die rooi kleureffek word deur wind en sonwarmte veroorsaak en gerwoonlik vanaf elf uur soggens waargeneem

Die meer en sy omgewing is in 1990 tot 'n natuurreservaat verklaar om die plaaslike fauna van die Andes-bergwêreld te beskerm. Laguna Colorada staan as habitat vir drie spesies flaminke bekend - die Chileense flamink (Phoenicopterus chilensis), Andes-vlamink (Phoenicoparrus andinus) en James se flamink (Phoenicoparrus jamesi). Daarnaas word 'n tagtigtal ander voëlspesies hier aangetref. Die plaaslike flora word oorheers deur quinoa-plante en queñua-struike.

Verwysings[wysig | wysig bron]

  1. David Atkinson: Bolivia - the Bradt Travel Guide. Chalfont St Peter, Bucks: Bradt Travel Guides, bl. 176