Laurie R. Santos

in Wikipedia, die vrye ensiklopedie

Laurie Renee Santos (gebore 1975) is 'n Amerikaanse kognitiewe wetenskaplike en professor in sielkunde aan Yale Universiteit. Sy is ook direkteur van Yale se Vergelykende Kognisie Laboratorium, Direkteur van Yale se Canine Cognition Lab, en voormalige hoof van Yale se Silliman College.[1] Sy was 'n gewilde TED- spreker[2] en is in Popular Science gelys as een van hul "Briljante Tien" jong wetenskaplikes in 2007,[3] sowel as in die tydskrif Time as 'n "Leading Campus Celebrity" in 2013.[4] In Januarie 2018 het haar kursus getiteld Psychology and the Good Life die gewildste kursus in Yale se geskiedenis geword, met ongeveer een vierde van Yale se voorgraadse studente wat daarvoor ingeskryf het.[5][6] In September 2019 het sy gasvrou geword van die podcast The Happiness Lab, wat vervaardig word deur Pushkin Industries - die mediamaatskappy onder leiding van die joernaliste Malcolm Gladwell en Jacob Weisberg.[7]

Agtergrond en opvoeding[wysig | wysig bron]

Santos is in 1975 gebore in New Bedford, Massachusetts met ouers van twee nasionaliteite. Haar pa, wie se familie van Kaap Verdiese afkoms is, was 'n programmeerder en haar ma, wat van die Verenigde State afkomstig is, was 'n voorligter by die Hoërskool New Bedford, waar Santos en haar broer Aaron ook skool bygewoon het.[8][9]

Na hoërskool het Santos Harvard Universiteit bygewoon. As tweedejaarstudent het sy 'n navorsingsassistent geword en na Cayo Santiago gereis, 'n klein 38-akker eiland oos van Puerto Rico. Cayo Santiago se aapbevolking het Santos geïnspireer en haar belangstelling in die sielkunde van diere aangespoor.[10] In 1997 het sy haar Baccalaureus Artium -graad magna cum laude in sielkunde en biologie ontvang en die jaarlikse Sielkunde Departement Voorgraadse Tesisprys gewen. Sy het haar studies as nagraadse student in die Harvard-sielkundedepartement voortgesit, in 2001 'n meestersgraad in Sielkunde behaal met 'n fokus op Kognisie, Brein en Gedrag en daarna het sy ook 'n Ph.D in dieselfde rigting in 2003 voltooi. Haar proefskrif het die Richard J. Herrnstein-prys van die Harvard Graduate School of Arts and Sciences gewen vir "die beste proefskrif wat uitstekende vakkundigheid, oorspronklikheid en omvangrykheid van denke, en 'n verbintenis tot intellektuele onafhanklikheid toon."[11]

Loopbaan en navorsing[wysig | wysig bron]

In 2003 het sy as 'n assistent-professor in sielkunde en kognitiewe wetenskap aan Yale-universiteit begin werk, en in 2009 het sy 'n aanstelling as 'n medeprofessor bekom. Haar navorsing ondersoek die evolusionêre oorsprong van die menslike verstand deur die kognitiewe vermoëns van mense en nie-menslike diere, insluitend primate en honde, te vergelyk. Santos was Yale se direkteur van voorgraadse studies in sielkunde van 2010 tot en met 2015.[12]

In Junie 2016 is sy aangewys as die hoof van Silliman College, een van die 14 voorgraadse residensiële kolleges by Yale, wat Nicholas Christakis opvolg. Santos se Yale-kursus, "Sielkunde en die goeie lewe" fokus op die beantwoording van vrae soos: "Wat maak ons eintlik gelukkig?" en "Wat kan ons doen om die goeie lewe te bereik?" Haar kursus het die gewildste klas in Yale-geskiedenis geword en gevolglik het Yale dit in Maart 2018 ekstern op die aanlyn-leerplatform Coursera beskikbaar gestel as "The Science of Well-Being." Vanaf November 2018 het meer as 170 000 mense van ten minste 170 lande vir die aanlynkursus ingeskryf.[13][9]

Blootstelling van haar werk[wysig | wysig bron]

Santos se wetenskaplike werk is gepubliseer in joernale soos Psychological Science, Animal Cognition, Developmental Science, Current Biology, Animal Behaviour, and Cognition . Haar wetenskaplike navorsing het in verskeie publikasies verskyn, insluitend The New York Times, The Los Angeles Times, The Economist, Forbes, The New Yorker, New Scientist, National Wildlife, Smithsonian Magazine, en Discover Magazine sowel as op National Public Radio en Nova.[14] Sy is die redakteur (saam met Bruce Hood) van The Origins of Object Knowledge. Sy was te siene op National Public Radio,[15][16] op Big Think, en - saam met haar kollegas Paul Bloom, Tamar Gendler en Joshua Knobe is sy ook 'n gereelde bydraer tot Bloggingheads.tv se Mind Report.

Santos moes twee wetenskaplike referate terugtrek weens koderingsfoute wat in haar laboratorium plaasgevind het.[17]

Podcast: 'The Happiness Lab'[wysig | wysig bron]

Sedert September 2019 het Santos die podcast The Happiness Lab aangebied, wat die jongste wetenskaplike navorsing ondersoek oor faktore wat menslike welstand en geluk beïnvloed.[18] Die program het sy eerste seisoen van 10 episodes in November 2019 voltooi,[19] en het 126 dae op die Amerikaanse Podcasts Chart deurgebring, met 'n hoogtepunt op nommer 3.[20] Santos het ook verdere episodes van haar podcast vervaardig.[21] Die podcast word gepubliseer deur Pushkin Industries,[7] die mediamaatskappy wat onder leiding van die joernaliste Malcolm Gladwell en Jacob Weisberg staan, voorheen van die tydskrif Slate.

Fiona Sturges het in die Financial Times geskryf: “Santos is die stem van gesonde verstand, om nie eers te praat van noukeurige navorsing nie. [Sy is] ’n warm, dog gesaghebbende, gasheer wat vir ons die teenstrydighede in ons sielkundige impulse uitwys.”[22]

Eerbewyse en toekennings[wysig | wysig bron]

In 2007 was Santos in Popular Science te siene as een van die tydskrif se “Briljante Tien” jong wetenskaplikes. In 2008 is sy bekroon met die Stanton-prys vir uitstaande vroeë-loopbaanbydraes tot interdissiplinêre navorsing in filosofie en sielkunde deur die Vereniging vir Filosofie en Sielkunde[23] en die Arthur Greer-gedenkprys vir uitstaande vakkundige publikasie of navorsing deur Yale Universiteit.[24] In 2010 was sy 'n spreker by die TED Global Conference in Oxford, in die Verenigde Koninkryk.

In 2011 is sy as die Vereniging vir Sielkundige Wetenskap Presidensiële Simposium Spreker uitgewys.[25] In 2012 is sy bekroon met Yale Universiteit se Lex Hixon-prys vir onderrig uitnemendheid in die sosiale wetenskappe, die hoogste onderrigprys wat by Yale College toegeken word,[26][27] en die American Psychological Association se Distinguished Scientific Award for Early Career Contribution to Psychology.[28]

In 2013 is sy aangewys as een van die tydskrif Time se voorste kampus-beroemdes.[29] In 2016 het sy gedien as die president van die Vereniging vir Filosofie en Sielkunde.[30] In 2018 het sy 'n Genius-toekenning van die Liberty Science Centre in New Jersey ontvang.[9]

Popularisering van wetenskap[wysig | wysig bron]

Santos het in 2018 in die Netflix-dokumentêre program The Most Unknown[31] verskyn oor wetenskaplike navorsing onder regie van Ian Cheney.

Persoonlike lewe[wysig | wysig bron]

Santos is getroud met die filosoof Mark Maxwell.[12]

Verwysings[wysig | wysig bron]

  1. ↑ https://yaledailynews.com/blog/2023/01/18/laurie-santos-steps-down-as-silliman-head-of-college/
  2. ↑ Santos, Laurie. "Laurie Santos | Speaker | TED". ted.com.
  3. ↑ Mone, Gregory; Wenner, Melinda; Thompson, Kalee; Aaronson, Lauren; Svoboda, Elizabeth (2007-10-03). "PopSci's 6th Annual Brilliant Ten". Popular Science.
  4. ↑ Laurie Santos listed by Time Magazine as a “leading campus celebrity”: https://caplab.yale.edu/news/laurie-santos-listed-time-magazine-leading-campus-celebrity
  5. ↑ Shimer, David (2018-01-26). "Yale's Most Popular Class Ever: Happiness". The New York Times. ISSN 0362-4331
  6. ↑ Santos course breaks enrollment record: https://yaledailynews.com/blog/2018/01/22/santos-course-breaks-enrollment-record/
  7. ↑ 7,0 7,1 "The Happiness Lab". The Happiness Lab (in Engels (VSA)). Besoek op 8 Februarie 2020.
  8. ↑ Ferreira, Becky; Rogers, Kaleigh; Koebler, Jason (18 Oktober 2018). "What Monkeys and 'Dognition' Can Teach Us About the Human Brain". Vice (in Engels (VSA)). Besoek op 8 Julie 2019.
  9. ↑ 9,0 9,1 9,2 "Professor Laurie Santos is Teaching the Good Life". Inteligencia (in Engels (VSA)). 12 November 2018. Geargiveer vanaf die oorspronklike op 8 Julie 2019. Besoek op 8 Julie 2019.
  10. ↑ Thinking Like a Monkey: https://www.smithsonianmag.com/science-nature/thinking-like-a-monkey-8265488/
  11. ↑ Yale Psychologist Laurie Santos Chosen as Commencement Speaker at Providence College: https://thericatholic.com/stories/yale-psychologist-laurie-santos-chosen-as-commencement-speaker-at-providence-college,12285?
  12. ↑ 12,0 12,1 "Psychologist Laurie Santos named new head of Silliman College". news.yale.edu (in Engels). 16 Junie 2016. Besoek op 8 Julie 2019.
  13. ↑ "At Yale Well event, professors serve up the pursuit of happiness three ways". yale.edu. 5 April 2018.
  14. ↑ Nova. "Secret Life of Scientists". pbs.org. Geargiveer vanaf die oorspronklike op 4 Februarie 2012. Besoek op 8 April 2023.
  15. ↑ LeMoult, Craig (1 Desember 2011). "Monkeys love discounts too". marketplace.org.
  16. ↑ NPR. "Sex, Evolution and Human Nature". Geargiveer vanaf die oorspronklike op 14 Maart 2013. Besoek op 8 April 2023.
  17. ↑ "Psychology researcher explains how retraction-causing errors led to change in her lab": https://retractionwatch.com/2014/01/15/psychology-researcher-explains-how-retraction-causing-errors-led-to-change-in-her-lab/
  18. ↑ Manning-Schaffel, Vivian (August 29, 2019). "Can you actually learn how to be happier". nbcnews.com.
  19. ↑ "The Happiness Lab with Dr. Laurie Santos on Apple Podcasts". podcasts.apple.com (in Engels (VSA)). Besoek op 8 Februarie 2020.
  20. ↑ "iTunesCharts.net: 'The Happiness Lab with Dr. Laurie Santos' by Pushkin Industries (International iTunes Chart Performance)". itunescharts.net. Besoek op 8 Februarie 2020.
  21. ↑ Carter, Liz (25 September 2020). "New season of Laurie Santos' podcast approaches". yaledailynews.com (in Engels). Besoek op 28 November 2020.
  22. ↑ Sturges, Fiona (Sep 22, 2019). "The podcast that shows us how to be happy". financialtimes.com. London: Financial Times.
  23. ↑ "Society for Philosophy and Psychology (SPP)". socphilpsych.org. Besoek op 2 Junie 2018.
  24. ↑ "January/February 2009 | Yale College | School Notes | Yale Alumni Magazine". yalealumnimagazine.com (in Engels). Besoek op 2 Junie 2018.
  25. ↑ Jaffe, Eric (2011-07-29). "Presidential Symposium: Broadband Social Cognition". APS Observer. 24 (6).
  26. ↑ Gonzalez, Susan (20 April 2012). "In her lectures, Laurie Santos inspires curiosity and potential colleagues". Yale News.
  27. ↑ "Dr. Laurie Santos – Emerge Summit". millennialawards.com. Besoek op 8 Julie 2019.
  28. ↑ Fote, Gianna (16 Maart 2012). "Laurie Santos Honored by the APA". Yale Scientific Magazine (in Engels (VSA)). Besoek op 8 Julie 2019.
  29. ↑ The Hottest Seats in Class: https://nation.time.com/2013/09/05/the-hottest-seats-in-class/
  30. ↑ "Society for Philosophy and Psychology (SPP)". socphilpsych.org. Besoek op 8 Julie 2019.
  31. ↑ "The Most Unknown (2018) - IMDb". www.imdb.com (in Engels (VSA)). Besoek op 9 Junie 2021.
Ontsluit van "https://af.wikipedia.org/w/index.php?title=Laurie_R._Santos&oldid=2625680"