Gaan na inhoud

Mariëtta Alberts

in Wikipedia, die vrye ensiklopedie
Mariëtta Alberts
Mariëtta Alberts
Gebore16 September 1948 (1948-09-16) (77 jaar oud)
NasionaliteitSuid-Afrika
Alma materUniversiteit van Pretoria
BeroepTerminoloog & Terminograaf
TitelDoktor

Dr. Mariëtta Alberts (16 September 1948 - ) is 'n Afrikaanse taalkundige, terminoloog en terminograaf wat vir 16 jaar van 1996 tot 2012 op die Taalkommissie gedien het. Sy is veral bekend in terminologie- en leksikografiekringe, met ander woorde by die mense wat woordeboeke maak en termlyste saamstel.[1][2] Sy is mede-samesteller van die 2002 (negende) en 2009 (tiende) uitgawes van die Afrikaanse woordelys en spelreëls.[3][4] In 2019 laat sy die toonaangewende Terminologie en Terminografie: ʼn Handleiding die lig sien.

Lewensloop

[wysig | wysig bron]

Alberts behaal die grade, B.A. (1969), B.A. (Hons) (1971) en M.A. (1983) aan die Universiteit van Pretoria en D.Litt et Phil (1991) aan Unisa. Sy begin haar loopbaan in 1971 as terminoloog by die Terminologiediens van die Taaldiensburo, Departement van Nasionale Opvoeding. Sy was sekretaris van die Koördinerende Vaktaalraad (KOVAK) en lid van LANGTAG, die taaltaakgroep van die Departement van Kuns, Kultuur, Wetenskap en Tegnologie (DKKWT). Sy doen navorsing oor leksikografie, terminologie en rekenaarlinguistiek by die Raad vir Geesteswetenskaplike Navorsing (1982–1994). AFRILEX, the Afrika Vereniging vir Leksikografie, kom to stand in 1995 met die inset van haar en Prof. William Branford.[5] Terug by die DKKWT as Hoof: Navorsingsontwikkeling, Nasionale Terminologiediens skryf sy die wetsontwerp vir die totstandkoming van die Nasionale Leksikografiese Eenhede (NLEe). Sy neem vir 23 maande waar as Hoof: Terminologieafdeling, Departement van Kuns en Kultuur (2000-2002).[6]

Sy gaan in 2002 na die Pan-Suid-Afrikaanse Taalraad (PanSAT) as bestuurder van die Nasionale Leksikografiese Eenhede. Sy besoek al die NLEe reg oor die land op gereelde basis en gee opleiding in leksikografiese prosesse, praktyk en bestuur. In 2010 tree sy vroeg af as Direkteur: Terminologieontwikkeling en Standaardisering (PanSAT).[6]

Sy is steeds by terminologieprojekte betrokke en was medeouteur van die Regsterminologievakwoordeboek: Straf , Strafproses- en Bewysreg (Eng/Afr-Afr/Eng (2015); Eng/Xho/Afr-Xho/Eng/Afr-Afr/Xho/Eng (2019) (SRTAT) en die Verklarende Politieke Woordeboek (2017) (CEPTSA).[6][7]

Pryse en toekennings

[wysig | wysig bron]
  • As Taalkommissie-lid medeontvanger van die CJ Langenhovenprys (2003) van die SAAWK en van die ATKV-prys (2006) vir die samestelling van die Afrikaanse Woordelys en Spelreëls (AWS) se 2002-uitgawe.
  • As Taalkommissie-lid medeontvanger van die C.L. Engelbrechtprys vir die 2009-uitgawe van die AWS.
  • As lid van die Sentrum vir Politieke en Verwante Terminologie in Suider-Afrikaanse Tale (CEPTSA) medeontvanger van die SAAWK se Stalsprys (2011) vir die Nuwerwetse Politieke Woordeboek, en van die SAVI-woordeboekprys (2018) en die ATKV-Woordveertjie (2018) vir die Verklarende Politieke Woordeboek.
  • As lid van die Sentrum vir Regsterminologie in Afrikatale (SRTAT) medeontvanger van die SAVI-woordeboekprys (2015) en die ATKV-Woordveertjie (2016) vir Regsterminologie: Straf , Strafproses- en Bewysreg (2015, tweetalig) en in 2020 die ATKV-Woordveertjie vir Regsterminologie: Straf , Strafproses- en Bewysreg (drietalig, 2019), SRTAT.
  • Die Suid-Afrikaanse Akademie vir Wetenskap en Kuns se Erepenning vir Geesteswetenskappe (2024).[6]

Boeke gepubliseer

[wysig | wysig bron]
  • Terminology and Terminography: Principles and Practice. A South African Perspective (2017) MLA Publications, ISBN 978-0-9947129-0-5.[1]
  • Terminologie en Terminografie: ʼn Handleiding (2019).

Verwysings

[wysig | wysig bron]
  1. 1 2 Jana Luther (28 Augustus 2017). Terminografie deur Mariëtta Alberts. VivA.
  2. ↑ "International Information Centre for Terminology". www.infoterm.info. Besoek op 5 Februarie 2026.
  3. ↑ https://prabook.com/web/marietta.alberts/3677666
  4. ↑ "Taaldinge 16 Maart 2025 - [[Taaldinge]]". omny.fm (in Engels). Besoek op 5 Februarie 2026. {{cite web}}: URL–wikilink conflict (hulp)
  5. ↑ "About The African Association for Lexicography". Afrilex (in Engels). Besoek op 5 Februarie 2026.
  6. 1 2 3 4 Dr. Mariëtta Alberts, Verkorte CV, 2024.
  7. ↑ Alberts, Marietta (2015-01). "Centre for Political and Related Terminology in Southern African Languages (CEPTSA) - translating and explanatory dictionaries". Lexikos. 25 (1): 461–494. doi:10.10520/EJC180574. {{cite journal}}: Gaan datum na in: |date= (hulp)
Ontsluit van "https://af.wikipedia.org/w/index.php?title=Mariëtta_Alberts&oldid=2924161"