Matteo Messina Denaro

in Wikipedia, die vrye ensiklopedie
Jump to navigation Jump to search
Matteo Messina Denaro
Foto op Messina Denaro se rybewys.
Foto op Messina Denaro se rybewys.
Gebore  26 April 1962 (1962-04-26) (57 jaar oud)
Castelvetrano, Sisilië, Italië
Land  Vlag van Italië Italië
Bynaam  "Diabolik"
Beroep  Mafioso
Misdaadbesonderhede
Misdaad  Terreuraanvalle
Beweging  Sisiliaanse Mafia
Voorganger  Bernardo Provenzano
Vonnisbesonderhede
Vonnis  Lewenslange tronkstraf
(in absentia)
Status  Voortvlugtig

Matteo Messina Denaro (gebore 26 April 1962), ook bekend as "Diabolik", is ’n baas van die Sisiliaanse Mafia. Hy het sy bynaam gekry van die Italiaanse strokieskarakter met dieselfde naam. Hy word beskou as een van die nuwe leiers van Cosa Nostra ná die inhegtenisneming van Bernardo Provenzano op 11 April 2006 en van Salvatore Lo Piccolo in November 2007. Messina Denaro het 12 April 2001 nasionaal bekend geword toe die tydskrif L'Espresso hom op hul voorblad plaas met die opskrif "Hier is die nuwe Mafiabaas". Hy is sedert 1993 voortvlugtig en is volgens Forbes onder die 10 mees gesoekte misdadigers in die wêreld.[1][2] Met die dood van Provenzano in 2016 en Salvatore Riina in 2017 word Messina Denaro beskou as die onbetwiste capo di tutti capi ("baas van base") in die Italiaanse Mafia.

Persoonlikheid[wysig | wysig bron]

Messina Denaro word dikwels uitgebeeld as ’n roekelose pierewaaier-mafioso en rokjagter wat met ’n duur Porsche-sportmotor ry en ’n Rolex Daytona-horlosie, Ray Ban-sonbril en duur klere van Giorgio Armani en Versace dra. Hy is glo ook die pa van ’n buite-egtelike kind, wat ongewoon is in die konserwatiewe kultuur van die Sisiliaanse Mafia. Hy lei ’n vinnige lewe en het al ’n Sisiliaanse hoteleienaar vermoor wat hom daarvan beskuldig het dat hy jong meisies bed toe neem.[3][4] Hy verskil dus baie van die tradisioneel konserwatiewe Mafiabase soos Salvatore Riina en Bernardo Provenzano.

Mafiabedrywighede[wysig | wysig bron]

Ná die natuurlike dood van sy pa, ook ’n mafioso, in November 1998 het Messina Denaro capo mandamento (baas van ’n distrik van drie Mafiafamilies) van die gebied geword, insluitende Castelvetrano en naburige stede, terwyl Vincenzo Virga beheer gehad het oor die stad Trapani en die omgewing. Ná Virga se arres in 2001 het Messina Denaro die leierskap van die Mafia in die provinsie Trapani oorgeneem.[5] Hy het glo sowat 900 mense onder hom en het blykbaar die Mafiafamilies in Trapani in ’n enkele mandamento georganiseer wat apart is van die res van Cosa Nostra. Die Trapani's word beskou as die magtigste Mafia buiten die families in Palermo.

Messina Denaro maak sy geld met ’n uitgebreide beskermingsnetwerk en openbare boukontrakte (die familie besit talle sandgroewe). Hy is ook aktief in die internasionale dwelmhandel. Sy onwettige bedrywighede strek so ver as Venezuela, België en Duitsland.[6]

Messina Denaro het glo sterk bande met Mafiafamilies in Palermo, veral die Graviano-clan. Die broer van dié familie se waarnemende baas is sy swaer. Hulle is saam betrokke in kokaïensmokkelary saam met nog ’n Mafiafamilie asook ’n ander misdaadorganisasie.[7][8]

1992/'93-bomaanvalle[wysig | wysig bron]

Ná die bomaanvalle waarin die anti-Mafiamagistrate Giovanni Falcone en Paolo Borsellino dood is, die inhegtenisneming van Salvatore Riina op 15 Januarie 1993 en die instelling van streng tronkregulasies wat gevangenes se kontak met die buitewêreld beperk, het Cosa Nostra ’n terreurvedltog gevoer waarin Messina Denaro ’n groot rol gespeel het.

Die oorblywende Mafiabase, onder andere Messina Denaro, Giovanni Brusca, Leoluca Bagarella, Antonino Gioè, Giuseppe Graviano en Gioacchino La Barbera, het ’n paar keer op ’n landgoed van die mafioso Leonardo Greco ontmoet om ’n strategie uit te werk om die staat sover te kry om hul aanslag op die Mafia te beëindig. Die gevolg was ’n reeks bomaanvalle in 1993 in Florence, Milaan en Rome waarin 10 mense gedood en 93 beseer is, terwyl ook skade aan kultuurerfenisse aangerig is.[9]

Messina Denaro het na bewering ook die bewegings van Falcone en die minister van wet en orde, Claudio Martelli, in 1991 dopgehou. Ná die 1993-bomaanvalle het hy begin wegkruip en hy is nog nie weer gesien nie. Op 6 Mei 2002 is hy in absentia lewenslange tronkstraf opgelê vir sy rol in die terreuraanvalle.

Ná die arres van Bernardo Provenzano op 11 April 2006 word Messina Denaro dikwels genoem as sy opvolger,[10][11] veral ná die arres van ’n ander aanspraakmaker, Salvatore Lo Piccolo in November 2007.[12]

Die polisie glo Messina Denaro kruip naby sy huis in sy geboortestad, Castelvetrano, weg.[13] Op 18 November 2008 het Italiaanse owerhede beslag gelê op €700 miljoen se bates van die supermarkkoning van Sisilië, Giuseppe Grigoli, wat na Messina Denaro teruggespoor kan word. Dit het ingesluit 12 besighede, 220 eiendomme (insluitende villas en woonstelblokke) en 133 stukke grond van altesaam 60 hektaar.[14][15] Grigoli is in Desember 2007 in hegtenis geneem nadat die owerhede dokumente ontdek het wat hom verbind aan Messina Denaro.[16][17] In November 2009 het die polisie beslag gelê op bates van €200 miljoen van die boumagnaat Francesco Pecora en in Januarie 2010 op boumaatskappye, villas, winkels en voertuie van €550 miljoen van nog ’n boumagnaat, Rosario Cascio, wat vermoedelik een van Messina Denaro se grootste geldwassers is. Dit is bates van meer as €1,4 miljard en dui op die enorme ekonomiese mag van Messina Denaro.[18] In September 2010 het die polisie beslag gelê op bates van €1,5 miljard van ’n sakeman, Vito Nicastri, wat glo met Messina Denaro saamwerk. Hy het in wind- en sonernergiebronne belê as ’n manier om geld te was.[19]

Deur die inhegtenisneming van talle van sy ondergeskiktes en die beslaglegging op bates van miljarde euro's, probeer die polisie om Messina Denaro vas te trek. Volgens die minister van binnelandse sake, Roberto Maroni, "span die net al hoe nouer om die no. 1-voortvlugtige". Die hoofaanklaer van Palermo, Francesco Messineo, het bygevoeg die doel van dié strategie teen Messina Denaro is "om die water waarin hy swem op te droog".[20]

Verwysings[wysig | wysig bron]

  1. The World's 10 Most Wanted Fugitives, Forbes Magazine, 13 Mei 2010
  2. Who is now on the World's Most Wanted list? The Guardian, 4 Mei 2011
  3. (it) Ecco il nuovo capo della mafia, L’Espresso, 12 April 2001
  4. (it) Cosa Nostra cerca il nuovo padrino Geargiveer 26 April 2008 op Wayback Machine, La Stampa, 13 April 2006
  5. (it) Relazione conclusiva Final report of the Antimafia Commission, presided by senator Roberto Centaro, Januarie 2006
  6. (it) Il ruolo di Matteo Messina Denaro, La Sicilia, 18 April 2004
  7. (it) Attività di analisi, progettualità e strategia operativa, Direzione Investigativa Antimafia, 2° semestre 2003
  8. (it) Le indagini «Igres», in the 2006 Final Report of the Italian Antimafia Commission
  9. (it) Ordinanza di custodia cautelare in carcere Geargiveer 7 Desember 2008 op Wayback Machine, Tribunale di Caltanissetta, Ufficio del giudice per le indagini preliminari, 11 April 1994
  10. (it) Mafia cerca il confronto con lo Stato, Sebastiano Gulisano, Polizia e democrazia, September 2001
  11. Prosecutors fear capture of mafia boss will spark bloody war of succession, deur John Hooper, The Guardian, 13 April 2006
  12. (it) 'Vincere Cosa nostra? Arresti e lavoro'. Intervista al magistrato De Lucia Geargiveer 5 Oktober 2008 op Wayback Machine, Ateneonline, 20 November 2007
  13. Changing face of new godfather, The Scotsman', 10 April 2007
  14. Mafia banker's assets seized, Reuters, 18 November 2008
  15. Sequestrati i beni al re dei market allo Stato un impero da 700 milioni, La Repubblica, 19 November 2008
  16. Italian police arrest supermarket owner suspected of Mafia links, International Herald Tribune, 20 Desember 2007
  17. (it) Mafia, arrestato re dei supermercati; era vicino a Matteo Messina Denaro, La Repubblica, 20 Desember 2007
  18. Mafia seizure hits Cosa nostra head, ANSA, 27 January 2009
  19. Italy makes 'record' Mafia asset seizure, BBC News, 14 September 2010
  20. Biggest-ever Mob seizure from man 'close to No.1', La Gazzetta del Mezzogiorno, 14 September 2010

Eksterne skakels[wysig | wysig bron]