Matzikama Plaaslike Munisipaliteit

Matzikama Plaaslike Munisipaliteit
Provinsie	Wes-Kaap
Distriksmunisipaliteit	Weskus
Tipe	Plaaslike Munisipaliteit
Munisipale kode	WC011
Burgemeester	Mnr J. van der Hoven (DA)
Hoofstad	Vredendal
Grootste tale	Afrikaans, Xhosa
Area	12 981 km²
Bevolking	67 147 (2011)

Matzikama is die mees noordelike plaaslike owerheid in die provinsie Wes-Kaap, binne die gebied van die Weskus-distriksmunisipaliteit. Dit word begrens deur die Atlantiese Oseaan in die weste, die Namakwa-distriksmunisipaliteit in die noorde, die Cederberg Plaaslike Munisipaliteit in die suide en die provinsie Noord-Kaap in die ooste.

Die hoofdorp is Vredendal, met ander belangrike dorpe Vanrhynsdorp, Klawer, Koekenaap, Strandfontein, Doringbaai en Lutzville. Die totale oppervlak van die munisipaliteit is sowat 5 549 km². Die naam is ontleen aan die Matsikammaberge, sowat 10 km suid van Vanrhynsdorp, tussen die Troe-Troe en Wiedourivier.

Matzikama is die enigste munisipaliteit in Suid-Afrika wat Afrikaans as eerste taal gebruik.

Nedersettings

Nedersettings in die munisipaliteit sluit in:

• Klawer
• Lutzville
• Vanrhynsdorp
• Vredendal
• Ebenhaeser
• Strandfontein
• Doringbaai (Doornbaai)
• Koekenaap

Wapen

Die munisipale raad het in 2003 'n wapen by die Buro vir Heraldiek geregistreer.

Die wapen is: Ingeboë kepersgewys verdeel van groen en silwer, in die skildhoof regs 'n silwer druiwetros goud gestengel en geblaar, links 'n madelief gestengel en geblaar van goud, en in die skildvoet vyf golwende blou dwarsbalke, daaroorheen 'n kreef van natuurlike kleur; op 'n skildhoof 'n voorstelling van die Maskamberg van goud. Die helmteken is 'n groen en goud muurkroon en die wapenspreuk is Prosperitas per labor.

Bevolking

Die totale bevolking volgens die sensus van 2011 was 67 147. Van die totaal was 50 185 bruin, 9 968 wit, 5 705 swart en 400 Indiërs. Die oorgrote meerderheid van die bevolking is Afrikaanssprekend (byna 60 000), gevolg deur Xhosasprekendes (2 293) en Engelssprekendes (1 160).

Opvoeding

Daar was in 2006 30 staats- en privaat skole binne die munisipale grense. Die hoërskole was: Vanrhynsdorp, Lutzville, Vredendal en Vredendal Sekondêr.

Polisiestasies

Polisiestasies is op Vredendal, Vanrhynsdorp, Klawer, Lutzville en Doringbaai beskikbaar.

Gesondheid

Benewens klinieke op die meeste dorpe, is die enigste provinsiale hospitaal op Vredendal.

Media

Radio Namakwaland saai daagliks uit van Vredendal en het 'n Christelike inslag. Ons Kontrei is 'n weekblad wat op Vredendal uitgegee word, terwyl die Swartland en Weskus Herald van 2006 tot 2008 weekliks 'n uitgawe vir die Olifantsrivier-gebied gepubliseer het. Die Herhald is opgevolg deur die weekblad Tempo, met sy hoofkantoor op Vredendal.

Besienswaardighede

Die gebied word jaarliks druk besoek deur blommekykers, wat spesifiek hierheen kom om die pragtige lenteblomme te bekyk, of op pad is na Namakwaland, noord van Matzikama.

Eksterne skakels

• 'n Gedetailleerde kaart van die Weskus in PDF-formaat
• Toeriste-inligting
• Webwerf van die Weskus-toerismeorganisasie