Vredendal

Vredendal
Dorp
Die NG moederkerk in die middedorp.
Vredendal  Vredendal se ligging in Wes-Kaap
Koördinate: 31°39′52″S 18°30′22″O
Land	Suid-Afrika
Provinsie	Wes-Kaap
Distrik	Weskus
Munisipaliteit	Matzikama
Oppervlak
• Totaal	23,08 km2 (8,91 vk. myl)
Bevolking  (2011)
• Totaal	18 170
• Digtheid	787/km2 (2 040/vk. myl)
Rasverdeling (2011)
• Wit mense	15.7%
• Indiërs/Asiërs	0.7%
• Bruin mense	67.8%
• Swart mense	12.3%
• Ander	3.6%
Taal (2011)
• Afrikaans	86.6%
• Xhosa	7.5%
• Engels	2.3%
• Ander	3.6%
Poskode (strate)	8160
Poskode (posbusse)	8160
Skakelkode	027

Vredendal is een van die jongste en dus ook modernste dorpe in die Wes-Kaap en ook een van die snelgroeiendste.

Ligging

Die dorp is 322 km noord van Kaapstad aan die spoorlyn na Bitterfontein en langs die Olifantsrivier geleë. Dit val binne die Olifantsrivier-besproeiingsgebied. Vanrhynsdorp en Klawer is elk 24 km per pad van die dorp geleë en Lutzville ietwat verder.

Geskiedenis

Die dorp het sy ontstaan te danke aan die besproeiingskema wat hier gebou is. Dit is vroeg in 1945 as dorp gestig en het eers op 1 Maart 1963 munisipale status verkry. Ingevolge die huidige munisipale bedeling is Vredendal deel van die Matzikama Plaaslike Munisipaliteit, waarvan dit die setel is.

Wapen

Vredendal se munisipale raad het in 1972 'n wapen by die Buro vir Heraldiek geregistreer : Ingeboe kepersgewys verdeel van rooi en silwer, in die skildhoof twee gousblomme van goud en in die skildvoet 'n aansiende olifantskop van natuurlike kleur. Die helmteken was 'n wit duif met 'n takkie in sy bek, en die wapenspreuk was Prosperitas per pacem. Die wapen is deur dr. Cornelis Pama ontwerp.

NG gemeente

Die hoofartikel vir hierdie afdeling is: NG gemeente Vredendal.

Die gemeente is op 13 November 1933 onder die naam "Olifantsrivier" met 1 000 lede van Vanrhynsdorp afgestig. Die gemeente het aanvanklik swaar gekry, omdat die nedersetters van die skema noustrop getrek het. Eredienste op Vredendal is eers in 'n klein skoolgeboutjie gehou. Vir Nagmaaldienste moes die kerkgangers in die oopte onder 'n bloekombos byeenkom. Die eerste predikant was ds. P.F. Greyling. Die gedeelte van die gemeente wat aanvanklik as Neersetting bekendgestaan het, is in 1937 as Lutzville afgestig. In 1940 besluit die Sinode om die naam van die gemeente Olifantsrivier na Vredendal te verander. Die huidige kerkgebou is op 23 September 1950 ingewy, sonder skuld. Die NG gemeente Klawer het in 1949 hoofsaaklik van die NG gemeente Vanrhynsdorp afgestig, buiten 10 huisgesinne wat van Vredendal weggesny en by Klawer gevoeg is. Vredendal-Wes is in 1974 afgestig en vandag het die twee gemeentes saam meer as 2 500 doop- en belydende lidmate.

Onderwys

Volgens die Wes-Kaapse Onderwysdepartement het Vredendal in 2016 sewe skole gehad. Twee was preprimêre skole, drie laerskole (Vergenoeg RK Primêre Skool, Vredendal-Noord Primêre Skool en die Laerskool Vredendal) en twee hoërskole (Vredendal Sekondêre Skool en die Hoërskool Vredendal). Van die laerskole het Vergenoeg 876 leerders van gr. R tot 7 gehad, Vredendal-Noord 1 091 in dieselfde grade en Vredendal 573. Vredendal Sekondêr het 1 059 leerders gehad en die Hoërskool Vredendal 468.

Sien ook

• Lys van dorpe in Suid-Afrika

Bronne

• Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-uitgewers.
• (en) (af) Kelly, Maureen. 1986. Amptelike Suid-Afrikaanse Munisipale Jaarboek. Johannesburg: HELM Publikasies.

Eksterne skakels

• Toerisme Vredendal Geargiveer 29 September 2007 op Wayback Machine (in Engels).