Maud Sumner

in Wikipedia, die vrye ensiklopedie
Jump to navigation Jump to search
Maud Sumner
Geboortenaam Maud Eyston Sumner
Gebore 1902
Johannesburg, Transvaal
Sterf 1985
Johannesburg, Suid-Afrika
Nasionaliteit Vlag van Suid-Afrika Suid-Afrika
Veld Skildery

Maud Eyston Sumner (1902–1985) is in 1902 in Johannesburg gebore. Sy het reeds as kind begin teken en hoewel sy van 'n vroeë ouderdom af kuns haar loopbaan wou maak, het sy in 1925 eers formele kunsonderrig ontvang. Haar vader het daarop aangedring dat sy eers 'n akademiese opleiding moes ondergaan en in 1922 het sy haar by die Oxford-universiteit in Engeland vir 'n kursus in die Engelse letterkunde laat inskryf.

Sy het haar studies voltooi en haar in 1925 by die Westminster School of Art laat inskryf. Terwyl sy 'n student was, het sy 'n besoek aan Parys gebring, en in 1927 het sy Londen verlaat om in Parys te studeer en te werk. Tussen 1927 en 1932 het sy dan ook van tyd tot tyd kunsonderrig in Parys ontvang. Tydens haar verblyf in Frankryk het sy gereelde besoeke aan Engeland en Suid-Afrika gebring. Sy het trouens haar eerste eenmanstentoonstelling in die periode (1931) in Suid-Afrika gehou.

Na die uitbreek van die Tweede Wêreldoorlog het sy in Suid-Afrika gebly (van 1941 tot 1946) en 16 eenmanstentoonstellings gehou. Sedert die sestigerjare is sy in Suid-Afrika woonagtig, maar werk nog steeds soms in Frankryk. Sumner se werk is aanvanklik baie deur die Franse tradisionaliste beïnvloed. In 1938 het daar egter ’n vernuwing in haar werk gekom: sy het van helderder kleure begin gebruik maak en sy het haar komposisies met duidelike lyne in kleurvlakke verdeel.

Teen die middel van die vyftigerjare was haar styl heeltemal individualisties, nie net vanweë 'n nuwe tegniese benadering nie, maar ook vanweë ’n nuwe geestelike benadering ten opsigte van haar kuns. Teen die einde van die vyftigerjare het sy abstrakte ruimtelikheid "ontdek": baie van haar later werke is uitgestrekte lug- en woestynlandskappe, temas wat sy na haar reise na Israel en die woestyngebied van die Midde-Ooste (na die Tweede Wêreldoorlog) en die Namibwoestyn (1965) behandel het.

Ruimte en stilte het die twee belangrikste elemente van haar werk geword. Sy het uitgebreid in Londen, Parys, Venesië, Nederland en die groot stede van Suid-Afrika uitgestal en haar werk is in al die groot kunsmuseums van Suid-Afrika en in talle buitelandse galerye opgeneem. Maud Sumner is in 1985 in Johannesburg oorlede.

Bronnelys[wysig | wysig bron]

Eksterne skakels[wysig | wysig bron]