Pedro II van Brasilië

Pedro II van Brasilië
Keiser van Brasilië
Dom Pedro II
Vorstehuis	Braganza
Titels	Keiser van Brasilië
Regeer	7 April 1831 – 15 November 1889
Kroning	18 Julie 1841
Voorganger	Pedro I
Monargie afgeskaf	Manuel Deodoro da Fonseca
Volle naam	Pedro de Alcântara João Carlos Leopoldo Salvador Bibiano Francisco Xavier de Paula Leocádio Miguel Gabriel Rafael Gonzaga de Bragança e Habsburgo
Gebore	2 Desember 1825; Rio de Janeiro, Brasilië
Oorlede	5 Desember 1891; Parys, Frankryk
Eggenoot	Teresa Cristina
Kinders	Prins Afonso Prinses Isabel Prinses Leopoldina Prins Pedro
Vader	Pedro I
Moeder	Maria Leopoldina van Oostenryk
Handtekening

Pedro II van Brasilie (Pedro de Alcântara João Carlos Leopoldo Salvador Bibiano Francisco Xavier de Paula Leocádio Miguel Gabriel Rafael Gonzaga de Bragança e Habsburgo; 2 Desember 1825 – 5 Desember 1891) met die bynaam "die Grootmoedige", was die tweede en laaste monarg van die Brasiliaanse Ryk, wat vir 'n tydperk van 58 jaar oor die land geregeer het. Hy is in die Keiserlike paleis van São Cristóvão, in Rio de Janeiro gebore. Hy was die jongste seun van keiser Pedro I van Brasilië en keiserin-gemalin Maria Leopoldina, en dus 'n lid van die Brasiliaanse tak van die Huis van Braganza. Die skielike abdikasie van sy pa en dié se vertrek na Portugal, het van Pedro op net vyf jarige ouderdom keiser gemaak. In sy jeug is druk op hom geplaas om sy tyd hoofsaaklik aan studies ter voorbereiding vir die heerskappy te spandeer, en het aldus min oomblikke van vreugde beleef óf vriende van sy ouderdom geken. Sy ervarings met paleisintriges en politieke geskille gedurende hierdie tydperk het 'n groot impak op die vorming van sy karakter gehad. Keiser Dom Pedro II het 'n man met 'n sterk pligsbesef en toewyding aan sy land en volk geword. Aan die teenkant is hy toenemend deur sy rol as monarg gegrief.

Keiserskap

Dom Pedro II omstreeks 1887

As 'n seun van vyf het Pedro die Keiser van Brasilië geword, net nadat sy vader Pedro I van Brasilië geabdikeer het om 'n politieke en militêre oorlog in Portugal te ondersteun. Laasgenoemde oorlog het daartoe gelei dat Pedro II se suster, Maria II, koningin van Portugal sou word.

Pedro II het vir 58 jaar regeer. Gedurende sy heerskappy het industriële ontwikkeling in Brasilië begin. Hy het vir aansienlike vooruitgang en ontwikkeling in sy land gesorg. Pedro II het ook na die Verenigde State gereis waar hy Alexander Graham Bell ontmoet het. Daartydens het hy die eerste Brasiliaan geword om 'n telefoon te gebruik.

Pedro II was 'n liberale leier en het slawerny op 13 Mei 1888 onwettig verklaar. Alhoewel hy 'n gewilde figuur was het hy absolute mag oor die parlement gehad en sommige het hom as 'n struikelblok op die pad na modernisme beskou. Op 15 November 1889 is hy deur 'n militêre staatsgreep onttroon, waarna hy en sy familie na Portugal gevlug het.

Hy sterf in Desember 1891 in Parys en sy eie oorskot en dié van sy vrou is in 1920 na Brasilië geneem. Hulle is in Petropolis, die voormalige somerwoning van die keiserlike familie, begrawe.

Bronne

Hierdie artikel is deels uit die Engelse Wikipedia artikel, Pedro II of Brazil, vertaal.