Pierre Fourie

in Wikipedia, die vrye ensiklopedie
Jump to navigation Jump to search
Pierre J. Fourie.

Pierre J. Fourie (* 23 Junie 1917, Dordrecht - † 28 November 1982, Randfontein) was ’n Afrikaanse skrywer en onderwyser. Fourie debuteer aanvanklik as 'n kortverhaalskrywer vir tydskrifte, maar begin mettertyd ontspanningslektuurromas skryf. Sy romans is meestal histories van aard en hy skryf onder meer oor die ou Kaapse tyd, die goudstormloop van die 1800's en die kultuur en leefwyse van die swart bevolking van Suid-Afrika. Hy publiseer ook die Kavalier-reeks wat oor die Anglo-Boereoorlog handel vir die jeug. Hy skryf onder sy eie naam, sowel as die skuilname Louis Joubert, Engela Karstens en Suzanne Pienaar.

Lewe en werk[wysig | wysig bron]

Pierre Johann Fourie was op 23 Junie 1917 op Dordrecht gebore en word groot in Oos-Kaapland. Hy ontvang sy skoolopleiding op Elliot en George. Hierna studeer hy verder aan die Universiteit van Stellenbosch, waar hy uitblink as hokkiespeler en provinsiale kleure verwerf en in 1945 die Maties se Intervarsity-dirigent is. Later is hy skeidsregter en keurder vir drie rugbybonde op skoolvlak. Hy behaal in 1946 die M.Ed.-graad met ’n verhandeling oor Tikskrifonderwys in Suid-Afrika en in 1950 die D.Ed.-graad met ’n proefskrif oor Die onderwys van snelskrif in Suid-Afrika: ’n kritiese studie aan die Universiteit van Stellenbosch.

Op verskeie plekke in die Kaapprovinsie en die Oranje-Vrystaat gee hy onderwys en op ’n jeugdige ouderdom word hy aangestel as hoof van die Middellande Hoër Handelskool op Cradock. Daarna word hy aangestel as departementshoof vir die opleiding van onderwysers aan die Kaapse Tegniese Kollege. Later is hy verbonde aan die Hoër Handelskool in Krugersdorp, maar hy bedank uit die onderwys in 1959 om hom toe te spits op sy vrugteboerdery buite Krugersdorp.

In 1963 begin hy egter weer skoolhou by die Tegniese Hoërskool Jan Viljoen in Randfontein, waar hy aan die einde van Oktober 1977 aftree.[1][2] Hy speel ’n groot rol in die Afrikaanse kultuurlewe en staan bekend as die vader van die volkspele in Kaapland, terwyl hy ook as koor- en orkesleier baie welslae behaal. As stigterslid is hy medeverantwoordelik vir die Middellandse Kunswedstrydvereniging en hy dien ook op een van die komitees van die Publikasieraad.

In 1945 trou hy met Catharina Engelbrecht van Cradock en uit hierdie huwelik word twee seuns gebore, Pierre en Elbré.

Vir die laaste tien jaar van sy lewe is hy getroud met Toetsie en hulle woon in hulle aftreehuis in Greenhills in Randfontein.

Hy is op 28 November 1982 aan ’n hartaanval oorlede.[3]

Skryfwerk[wysig | wysig bron]

Aanvanklik skryf hy verhale vir tydskrifte, maar na 1960 begin hy meer ernstig skryf aan ontspanningslektuur. Twee van sy boeke, Die Kavaliers en Die Kruger miljoene, word ook verfilm. Verskeie van sy werke is romans teen ’n historiese agtergrond.

Historiese romans[wysig | wysig bron]

’n Lelie van die Laeveld (1966) speel in die 1890’s in die Laeveld af, in die tyd van die goudstormloop. Daar is vele karakters, onder andere die geneesheer Daan Roos, besiel met ’n ideaal vir hierdie land, en die minsame natuurkind Bokwa Scholtz, wat sal veg tot die bitter einde as gevaar sy lelie bedreig.

Die nagwind ween is ’n verhaal oor die verskrikking van die St. Bartolomeusnag in Frankryk, toe die Protestante op groot skaal uitgemoor is.

Die Ou-Kaap is die tema van etlike romans. Die goue sleutel (1967) is ’n ou Kaapse verhaal. Danie Rossouw kan nie glo dat hy die markies se dogter Mariette in die Kaap sou aantref nie, na hulle mekaar in Frankryk een keer as jong kinders raak geloop het. In die Kaap word sy gevange gehou en Danie vind uit dat die revolusionêre bewind in Frankryk die goue sleutel om haar nek wil bekom, ongeag die koste. Wat hy nie weet nie, is dat haar vader in Frankryk in die martelkamer lê, omdat die bewindhebbers wil weet waar die goue sleutel en sy dogter is. Uur van vergelding (1970) is ’n ou Kaapse verhaal. Henri du Plessis keer van Europa na die Kaap terug wanneer hy hoor dat sy vader deur die jong Willem du Bruyn in ’n swaardgeveg gewond is. Familie-eer bepaal dat hy op sy beurt vir Willem tot ’n tweegeveg moet uitdaag. Hierdie tweegeveg vind egter nie plaas nie en daar is verskeie aanslae op die lewens van Henri en sy vader. Om sake te bemoeilik is Henri se jong sussie Anne-Marie verlief op een van die Du Bruyn-broers, Dirk. Hy raak self verlief op Rita, wat ook in die Du Bruyn-kamp is. Eindelik besluit Henri dat die uur van vergelding aangebreek het. Hy skryf ook speur- en spioenasieverhale.

Nag bring die onheil (1976) is ’n spioenasieverhaal in die Klub 707-reeks. Daan Uys tref vir Alice Whittaker dood in haar woonstel aan. Dit is duidelik dat sy kort tevore gesterf het en hy kom gou agter dat hy nie die enigste lewende persoon in die woonstel is nie. Die raaisel van Rooikrans (1976) speel in 1838 af. Herhaalde strooptogte word op Rooikrans in die Worcester distrik uitgevoer en Petra Marais is seker dit is die werk van iemand wat hulle finansieel wil verwoes, maar sy weet nie waarom nie. Haar pa, André Marais, kan weens ’n beenbesering nie sake op die plaas hanteer nie en Petra moet hierdie taak op haar neem. Eindelik kry sy ’n vreemdeling om haar te kom help, waarna die poppe begin dans.

Die kultuur en leefwyse van die swart mense word in etlike romans uitgebeeld en hierdie boeke word gereeld deur die Departement vir Bantoe-onderwys voorgeskryf. Hierdie verhale sluit in Chilembe en die slawehandelaars, Mkhono, Die avonture van Matembe, Dayama en Duma .

Jeugverhale[wysig | wysig bron]

Onder sy jeugverhale is dit veral die reeks oor die Kavaliers wat tydens die Anglo-Boereoorlog afspeel wat bekend word. Die kavaliers: Die verhaal van ’n honderd ruiters word in Engels vertaal as The cavaliers. Ander verhale in hierdie reeks is Die kanonne, Die kartetse en Die kolonel.

Vervolgverhale[wysig | wysig bron]

Verskeie vervolgverhale van hom verskyn in koerante en tydskrifte, insluitende Sabotasie in Die Brandwag, Skimme oor La Rochelle in Pronk, Lanzerac se baas in Uitspan, Die goue nimf van Batavië in Pronk, U swaard asseblief Mademoiselle in Uitspan, Die goue swaard in Rapport, Nag bring die onrus in Brandwag en Jagstories in Trompie. Sommige hiervan word later in boekvorm uitgegee.

Ander skryfwerk en skuilname[wysig | wysig bron]

Hy skryf ’n groot aantal verhale saam met sy lewenslange vriend, Carlos Pienaar, ’n neef van Sangiro. Hierdie boeke verskyn onder die skuilname Louis Joubert, Suzanne Pienaar en Engela Karstens.

Gewaagde wraak verskyn onder die naam Suzanne Pienaar. ’n Geselskap soek na juwele wat na bewering deur ’n seerower in ’n grot aan die Weskus versteek is. Die diepseeduiker Karel van Graan sterf tydens die soektog en sy verloofde, Cynthia Marais, vermoed dat dit nie ’n blote ongeluk was nie. Sy is die sekretaresse van Allan Hammond, een van die soektog se finansiers wat ook op haar verlief is. Allan se optrede is vir haar verdag. Cynthia besluit om Karel se dood te wreek en sy vertel speursersant Pieterse in ’n brief van haar vermoedens. So begin die polisie se ondersoek en Cynthia se onafhanklike ondersoek. Nog ’n moord word gepleeg en iemand probeer ook om vir Cynthia te vermoor.

Publikasies[wysig | wysig bron]

Jaar Publikasies
Pierre J. Fourie[4][5][6][7][8]
1960 Die smokkelbende
1961 Die dood dreig
Goud oor die horison
Sy swaard verbode
1962 Die avonture van Matembe
Die kavaliers: Die verhaal van ’n honderd ruiters
Die nagwind ween: Die verhaal van die verskrikking van St. Bartholomeusnag
Die skim van Oranje
Vlug eer die daeraad
1963 The Cavaliers
Chilembe en die slawehandelaars
Vegters vir vryheid
1964 Fanie Louw
Getemde hartstog
1965 Lokkende glinstering
1966 Dayama
Duma
’n Lelie van die Laeveld
Swaard en masker
Die swierbol
1967 Die goue sleutel
Die kanonne: ’n verhaal van die Kavaliers
Vaarwel my lief en Sanger van die Suiderland
Die vondeling
1968 Oumatjie se groot seun
Die verre horison
Die silwer kris
Tromme in die skemering
1969 Die kartetse: ’n verhaal van die Kavaliers
Nag bring die onheil
Om middernag
Uur van vergelding
Oumatjie se grootseun
Die verre horison
1970 Uur van vergelding
1974 Die kolonel: ’n verhaal van die Kavaliers
1976 Die raaisel van Rooikrans
1977 Marie Antoinette
1983 Die goue nimf van Batavia
Die goue swaard
1985 U swaard asseblief, Mademoiselle
Louis Joubert[9]
1965 Mkhono
Om middernag
1966 Operasie meesterbrein
Tot die volmaan
1967 Beminlike snip
1970 Nuusman Lorraine
1971 Die blinde mol
Engela Karstens[10]
1968 Die silwer kris
Suzanne Pienaar[11]
1963 Voor die vuurherd
1964 Gewaagde wraak
1965 Die driehoek
Dwaalweë
1967 Linda Landman
1968 Sjarmante misdadiger

Bronnelys[wysig | wysig bron]

Boeke[wysig | wysig bron]

  • Kannemeyer, J.C. Geskiedenis van die Afrikaanse literatuur 2. Academica, Pretoria, Kaapstad en Johannesburg  Eerste uitgawe Eerste druk 1983

Verwysings[wysig | wysig bron]