Pieter Jacobus Conradie

in Wikipedia, die vrye ensiklopedie
Jump to navigation Jump to search
Prof. dr. Pieter Jacobus Conradie.

Pieter Jacobus Conradie was professor in Grieks aan die Universiteit van Stellenbosch en kenner van die drama, wat verskeie boeke oor hierdie onderwerpe skryf.

Lewe en werk[wysig | wysig bron]

Ds. Willem Stephanus Conradie, Pieter Conradie se vader, was ten tyde van sy oudste seun se geboorte leraar van die NG gemeente Grahamstad (1929–1935).

Pieter Jacobus Conradie is op 7 Februarie 1931 in Grahamstad gebore as die oudste seun van die NG predikant ds. W.S. Conradie. Vanaf 1935 woon die gesin in die Bo-Karoo terwyl ds. Conradie leraar was van die NG gemeente Loxton en in 1941 verhuis hulle na die Kaap toe ds. Conradie 'n beroep aanneem na die NG gemeente Rondebosch, waar hy sou bly tot hy in 1948 'n beroep aanneem na sy laaste werkkring, die NG gemeente Stellenbosch. Pieter Conradie matrikuleer in 1947 aan die Hoërskool Nassau in Mowbray. Hierna studeer hy verder in die klassieke tale aan die Universiteit van Kaapstad, maar gaan ná sy eerste jaar oor na die Universiteit van Stellenbosch (moontlik omdat sy ouers in sy eerste jaar Stellenbosch toe verhuis het nadat hulle in die Rondebosse pastorie 'n hanetree van die Ikeys-kampus af gewoon het). Hier behaal hy in 1950 die B.A.-graad met lof, met Grieks en Latyn as hoofvakke en Geskiedenis en Afrikaans as byvakke. Hy behaal ook die B.A. Honneurs-graad en die M.A.-graad, terwyl hy vanaf 1951 as junior lektor ’n beginnersklas in Latyn en Grieks aanbied. In sy studie vir die M.A.-graad voltooi hy ook ’n derdejaarskursus in Hebreeus. Vanaf September 1954 studeer hy aan die Rijksuniversiteit in Utrecht in Nederland, waar hy in 1958 promoveer met ’n D.Litt. et Phil.-graad. Sy proefskrif is oor “Herakles en die Griekse tragedie”, wat ook later gepubliseer word. Hy sluit met sy terugkeer na Suid-Afrika as lektor aan by die akademiese personeel van die Universiteit van Stellenbosch en word in 1972 bevorder tot medeprofessor en in 1974 tot professor in Grieks. Wanneer die legendariese professor J.P.J. van Rensburg in 1977 aftree, word hy hoof van die departement, ’n pos wat hy tot met sy aftrede in 1994 beklee. Sy besondere belangstellingsveld is Griekse mites en tragedie en die invloed daarvan op moderne letterkunde en hy beskou die gewildheid van sy driejarige kursus in Griekse drama as sy belangrikste prestasie. In sy dienstydperk is hy ook grootliks instrumenteel met die instel van Klassieke Kultuur as ’n aparte studieveld.

Hy is ’n aktiewe lid van die Klassieke Vereniging van Suid-Afrika en dien ook in 1975 en 1976 as voorsitter van hierdie liggaam. In 2003 word hy verkies tot ere vise-president van hierdie liggaam ter erkenning van sy status as lektor en akademikus. Hy is ook lid van die raad van die Suid-Afrikaanse Nasionale Biblioteek en dien die Suid-Afrikaanse Akademie vir Wetenskap en Kuns in verskeie kapasiteite. Vanaf 1987 tot 1995 is hy redakteur van die Stellenbosch Klassieke Nuusbrief wat later hernoem word tot die klassieke joernaal Akroterion. In 1990 word hy verkies tot voorsitter van die Afrikaanse Skrywerskring se werkgemeenskap op Stellenbosch en is hy sekretaris van die Universiteit Onderwysvereniging op Stellenbosch. Sedert 1976 is hy ook ’n aktiewe lid van die Bergklimklub van Suid-Afrika.

Skryfwerk[wysig | wysig bron]

Hy bundel sewe opstelle oor die drama in die letterkundige bundel [1]Spanning en ewewig”, terwyl [2]Niks is in sy tyd gesluit[3]opstelle oor veral die klassieke maar ook die[4][5]moderne drama bevat. “Herakles en die Griekse tragedie” is sy gepubliseerde proefskrif. “Avonture van die Griekse helde en gode” verwerk verhale uit die Griekse mitologie vir skoolgebruik. Hy skryf blokboeke oor “Germanicus” van N.P. van Wyk Louw en “Hoe om ’n drama te ontleed”. Verder publiseer hy meer as sewentig artikels in vaktydskrifte soos Acta Classica, Teater S.A., South African Journal for Literature, Journal for the Humanities, Standpunte, Literator en die S.A. Theatre Journal. Hierdie artikels sluit in ’n reeks met vergelykings tussen Griekse en Afrika-dramas, wat na sy aftrede in die S.A. Theatre Journal verskyn.

Publikasies[wysig | wysig bron]

Jaar Publikasies
1958 Herakles en die Griekse tragedie
1963 The treatment of Greek myths in modern French drama
1964 Avonture van die Griekse helde en gode
1966 Germanicus van N.P. van Wyk Louw
1968 Hoe om ’n drama te ontleed
1974 Spanning en ewewig
1976 Niks is in sy tyd gesluit
1998 Die drama, ’n inleidende studie

Bronnelys[wysig | wysig bron]

Boeke[wysig | wysig bron]

  • HAUM “Stellenbosse Galery” HAUM-Uitgewers Kaapstad en Pretoria 1974
  • Kannemeyer, J.C. “Geskiedenis van die Afrikaanse literatuur 2” Academica, Pretoria, Kaapstad en ohannesburg Eerste uitgawe Eerste druk 1983
  • Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria Eerste uitgawe 2005

Tydskrifte en koerante[wysig | wysig bron]

  • Claassen, Jo-Marie “Pieter Jacobus Conradie: An appreciation” “Acta Classica” vol.51 Januarie 2008

Internet[wysig | wysig bron]

Resensies[wysig | wysig bron]

  1. Brink, André P. “Rapport” 13 Oktober 1974
  2. Van der Walt, P.D. “Die Transvaler” 28 Augustus 1976
  3. Brink, André P. “Rapport” 6 Junie 1976
  4. Van Zyl, Hannes “Beeld” 3 Mei 1976
  5. Louw, J.P. “Tydskrif vir Letterkunde” Nuwe reeks 15 no. 2, Mei 1977